AMAZWE NABANTU
Ukuvakashela E-Ireland
I-IRELAND iyisiqhingi esingamazwe amabili: elikhulu kuwo yizwe elizimele i-Republic of Ireland, kanti elincane yiNingizimu Ireland, eyingxenye ye-United Kingdom.
Giant’s Causeway
I-Ireland ibizwa ngokuthi yi-Emerald Isle ngenxa yokuthi izimvula zakhona ezina njalo zenza izindawo ezisemaphandleni zibe luhlaza cwe. Amachibi akhona amahle kanye nemifula kuhlanganise nezintaba ezigudle ugu namagquma kuyenezela ebuhleni bemvelo bale ndawo.
Indlu efulelwe ngotshani
Abantu base-Ireland baye bakhuthazelela ubunzima obukhulu. Ngokwesibonelo, abanye balinganisela ukuthi cishe phakathi no-1845 kuya ku-1851, kwafa abantu abangaba yisigidi ngenxa yendlala nezifo okwabangelwa ukonakala kwesivuno samazambane esoniwa isifo sezitshalo. Ukuze babalekele indlala eyayinzima, abaningi bathuthela emazweni anjenge-Australia, iBrithani, iCanada kanye ne-United States. Namuhla, izakhamuzi zaseMelika eziyizigidi ezingu-35 ziyizizukulwane zabantu abadabuka e-Ireland.
Abantu base-Ireland baziwa ngokuba nobungane nokungenisa izihambi. Imidlalo abayithandayo ihlanganisa ukugibela amahhashi nemidlalo yeqembu, njengowekhilikithi, ibhola lombhoxo, unobhutshuzwayo kanye nebhola lezinyawo okuthiwa yi-Gaelic (liyefana nonobhutshuzwayo). Abesifazane bathanda kakhulu umdlalo okuthiwa yi-camogie, othi awufane ne-hockey.
Abantu base-Ireland bayakuthanda nokuxoxa, kanti futhi bayawuthanda umculo. Umdanso wakhona okuthiwa yi-Irish step dance udume umhlaba wonke. Abadansayo bamisa ingxenye engenhla yomzimba wabo iqonde kuyilapho benza umdanso osheshayo nowubunyoninco ngezinyawo zabo.
Iqembu lomculo lase-Ireland
Sekuyiminyaka engaphezu kwekhulu kunoFakazi BakaJehova e-Ireland. Sikhuluma nje, kunoFakazi abangu-6 000 abahlala khona futhi bamatasa ekufundiseni ngeBhayibheli.
Umculo womdabu wase-Ireland usebenzisa izinsimbi zomculo ezinjengalezi eziboniswe ngezansi, kusukela kwesobunxele kuya kwesokudla: ihabhu, i-Irish bagpipes (umtshingo), uhlobo oluthile lwevayolini, uhlobo lwenkositini, umtshingo nesigubhu
INGABE BEWAZI?
I-Giant’s Causeway, esogwini olusenyakatho yeNyakatho Ireland, iyindawo ephakeme enezinkulungwane zamatshe amnyama abushelelezi amise okwezinsika akheka ngesikhathi udaka olushisayo lwentaba-mlilo luphola lapho luhlangana namanzi olwandle.
Okunye Ongase Ukuthande
PHAPHAMA!
Ukuvakashela ENew Zealand
Nakuba iyisiqhingi esikude, akumangazi ukuthi iNew Zealand ivakashelwa abantu abaqhamuka kwezinye izindawo abangaphezu kwezigidi ezintathu ngonyaka, ngenxa yobuhle bayo. Yini ekhanga abantu kangaka kule ndawo?
PHAPHAMA!
Ukuvakashela EKazakhstan
Kudala, amaKazakh ayengahlali endaweni eyodwa isikhathi eside futhi ayehlala kuma-yurt. Indlela aphila ngayo manje iwabonisa kanjani amasiko okhokho bawo?
PHAPHAMA!
Ukuvakashela ESpain
Izwe laseSpain linezindawo ezingafani nabantu abahlukahlukene. Kunohlobo lokudla oluthandwa kakhulu iSpain esikukhiqiza kakhulu kunamanye amazwe.
PHAPHAMA!
Ukuvakashela EKyrgyzstan
Abantu baseKyrgyzstan baziwa ngokungenisa izihambi nenhlonipho. Yimaphi amasiko alawula ukuphila komndeni?
PHAPHAMA!
Ukuvakashela E-Uzbekistan
Funda okwengeziwe nge-Uzbekistan nangomlando ophathelene nokushintsha kwezinhlamvu zamagama akhona.
