Ingabe Iziprofetho Ezabikezelwa NgoMesiya Zifakazela Ukuthi UJesu WayenguMesiya?

IDLALE

Impendulo yeBhayibheli

Yebo. Ngesikhathi esemhlabeni uJesu wagcwalisa iziprofetho eziningi ezazimayelana ‘noMesiya uMholi,’ owayezoba ‘uMsindisi wezwe.’ (Daniyeli 9:25; 1 Johane 4:14) Nangemva kokufa kwakhe, uJesu waqhubeka egcwalisa iziprofetho ezazimayelana noMesiya.—IHubo 110:1; IzEnzo 2:34-36.

Kusho ukuthini ukuthi “Mesiya”?

Igama lesiHebheru elithi Ma·shiʹach (Mesiya) nelesiGreki elithi Khri·stos (Kristu) womabili asho ukuthi “Ogcotshiwe.” Ngakho ukuthi “uJesu Kristu” kusho ukuthi “uJesu Ogcotshiwe” noma “uJesu uMesiya.”

Ngezikhathi zeBhayibheli, uma umuntu egcotshwa ukuba abe sesikhundleni esikhethekile wayethelwa ngamafutha ekhanda. (Levitikusi 8:12; 1 Samuweli 16:13) UJesu wagcotshwa uNkulunkulu ukuba abe uMesiya, okuyisikhundla esiphezulu. (IzEnzo 2:36) Nokho kunokuba agcobe uJesu ngokumthela ngamafutha, uNkulunkulu wamgcoba ngomoya ongcwele.—Mathewu 3:16.

Ingabe iziprofetho ezimayelana noMesiya zazingagcwaliswa abantu abaningi?

Cha. Njengoba imigqa yeminwe ingeke ikhombe abantu abaningi, neziprofetho zeBhayibheli zazizogcwaliseka kumuntu oyedwa kuphela owayezoba uMesiya noma uKristu. Nokho iBhayibheli lixwayisa ngokuthi “kuyovela oKristu bamanga nabaprofethi bamanga futhi bayokwenza izibonakaliso ezinkulu nezimangaliso ukuze badukise ngisho nabakhethiweyo, uma kungenzeka.”—Mathewu 24:24.

Ingabe uMesiya uzovela esikhathini esizayo?

Cha. IBhayibheli labikezela ukuthi uMesiya wayeyovela ozalweni lwenkosi yakwa-Israyeli uDavide. (IHubo 89:3, 4) Nokho kubonakala sengathi amarekhodi ohlu lozalo lukaDavide alahleka lapho amaRoma enqoba iJerusalema ngo-70 C.E. a Kusukela ngaleso sikhathi, kunzima ukuba umuntu akwazi ukufakazela ukuthi uvela ohlwini lozalo lukaDavide. Nokho ngesikhathi uJesu esemhlabeni ayekhona lawo marekhodi, ngisho nezitha zakhe zahluleka ukuphikisa ukuthi wayevela ohlwini lozalo lukaDavide.—Mathewu 22:41-46.

Zingaki iziprofetho eziseBhayibhelini ezikhuluma ngoMesiya?

Kunzima ukusho ngokuthe ngqo ukuthi zingaki iziprofetho ezikhuluma ngoMesiya. Ziyahluka izindlela zokubala iziprofetho emiBhalweni ekhuluma ngoMesiya. Ngokwesibonelo, u-Isaya 53:2-7 ukhuluma ngezinto eziningi ezaziyokwenzeka kuMesiya. Abanye bangabala wonke la mavesi njengesiprofetho esisodwa esibikezela ngoMesiya, kanti abanye bangathi ingxenye ngayinye echaza okwakuzokwenzeka iyisiprofetho esisodwa esizimele.

Ezinye iziprofetho ezimayelana noMesiya ezagcwaliswa uJesu

Isiprofetho	Sitholakala	Ukugcwaliseka kwaso
Wayezovela ozalweni luka-Abrahama	Genesise 22:17, 18	Mathewu 1:1
Wayezovela ozalweni luka-Isaka indodana ka-Abrahama	Genesise 17:19	Mathewu 1:2
Wayezozalwa esizweni sakwaJuda	Genesise 49:10	Mathewu 1:1, 3
Wayezovela ozalweni lweNkosi uDavide	Isaya 9:7	Mathewu 1:1
Wayezozalwa intombi nto	Isaya 7:14	Mathewu 1:18, 22, 23
Wayezozalelwa eBhetlehema	Mika 5:2	Mathewu 2:1, 5, 6
Wayezobizwa ngokuthi u-Imanuweli b	Isaya 7:14	Mathewu 1:21-23
Wayenganakekile ekuqaleni	Isaya 53:2	Luka 2:7
Izingane zabulawa ngemva kokuzalwa kwakhe	Jeremiya 31:15	Mathewu 2:16-18
Wabizwa ukuba aphume eGibhithe	Hoseya 11:1	Mathewu 2:13-15
Wabizwa ngokuthi umNazaretha c	Isaya 11:1	Mathewu 2:23
Wandulelwa yisithunywa	Malaki 3:1	Mathewu 11:7-10
Wagcotshwa ukuba abe nguMesiya ngo-29 C.E. d	Daniyeli 9:25	Mathewu 3:13-17
UNkulunkuku wathi uyiNdodana yaKhe	IHubo 2:7	IzEnzo 13:33, 34
Wayenetshiseko ngendlu kaNkulunkulu	IHubo 69:9	Johane 2:13-17
Wayezoba ummemezeli wezindaba ezinhle	Isaya 61:1	Luka 4:16-21
Ukushumayela kwakhe eGalile kwakuzoletha ukukhanya okukhulu	Isaya 9:1, 2	Mathewu 4:13-16
Wenza izimangaliso njengoMose	Duteronomi 18:15	IzEnzo 2:22
NjengoMose wayekhuluma okuvela kuNkulunkulu	Duteronomi 18:18, 19	Johane 12:49
Welapha abaningi	Isaya 53:4	Mathewu 8:16, 17
Akazifunelanga udumo	Isaya 42:2	Mathewu 12:17, 19
Wabazwela ababecindezelekile	Isaya 42:3	Mathewu 12:9-20; Marku 6:34
Wabonisa ubulungisa bukaNkulunkulu	Isaya 42:1, 4	Mathewu 12:17-20
UMeluleki Omangalisayo	Isaya 9:6, 7	Johane 6:68
Wazisa abanye igama likaNkulunkulu	IHubo 22:22	Johane 17:6
Wakhuluma ngemifanekiso	IHubo 78:2	Mathewu 13:34, 35
UMholi	Daniyeli 9:25	Mathewu 23:10
Abaningi abazange bamkholwe	Isaya 53:1	Johane 12:37, 38
Waba itshe elikhubekisayo	Isaya 8:14, 15	Mathewu 21:42-44
Abantu bamphika	IHubo 118:22, 23	IzEnzo 4:10, 11
Wazondwa ngaphandle kwesizathu	IHubo 69:4	Johane 15:24, 25
Wangena eJerusalema egibele imbongolo	Zakariya 9:9	Mathewu 21:4-9
Wadunyiswa yizingane	IHubo 8:2	Mathewu 21:15, 16
Weza egameni likaJehova	IHubo 118:26	Johane 12:12, 13
Wadayiswa umuntu ayemethemba	IHubo 41:9	Johane 13:18
Wadayiswa ngezinhlamvu zesiliva ezingu-30 e	Zakariya 11:12, 13	Mathewu 26:14-16; 27:3-10
Abangane bakhe bamshiya	Zakariya 13:7	Mathewu 26:31, 56
Abantu bafakaza izinto ezingamanga ngaye	IHubo 35:11	Mathewu 26:59-61
Wathula lapho bembeka amacala	Isaya 53:7	Mathewu 27:12-14
Bamkhafulela	Isaya 50:6	Mathewu 26:67; 27:27, 30
Bamshaya ekhanda	Mika 5:1	Marku 15:19
Bambhaxabula	Isaya 50:6	Johane 19:1
Akazange alwisane nalabo ababemshaya	Isaya 50:6	Johane 18:22, 23
Izikhulu zikahulumeni zahlangana ukuze zimelane naye	IHubo 2:2	Luka 23:10-12
Izandla nezinyawo zakhe zabethelwa esigxotsheni	IHubo 22:16	Mathewu 27:35; Johane 20:25
Benza inkatho (bagembula) ukuze bathole izingubo zakhe	IHubo 22:18	Johane 19:23, 24
Wabalwa kanye nezoni	Isaya 53:12	Mathewu 27:38
Wazondwa, wagconwa	IHubo 22:7, 8	Mathewu 27:39-43
Wahlupheka ngenxa yezoni	Isaya 53:5, 6	1 Petru 2:23-25
Kwabonakala sengathi uNkulunkulu umlahlile	IHubo 22:1	Marku 15:34
Wanikwa uviniga nenyongo ukuze aphuze	IHubo 69:21	Mathewu 27:34
Wayomile ngaphambi kokuba afe	IHubo 22:15	Johane 19:28, 29
Wanikela umoya wakhe kuNkulunkulu	IHubo 31:5	Luka 23:46
Wanikela ngokuphila kwakhe	Isaya 53:12	Marku 15:37
Waba isihlengo ukuze kususwe izono	Isaya 53:12	Mathewu 20:28
Amathambo akhe awazange aphulwe	IHubo 34:20	Johane 19:31-33, 36
Bamgwaza	Zakariya 12:10	Johane 19:33-35, 37
Wangcwatshwa nabantu abacebile	Isaya 53:9	Mathewu 27:57-60
Wavuswa ekufeni	IHubo 16:10	IzEnzo 2:29-31
Isikhundla sowamdayisa sathathwa omunye	IHubo 109:8	IzEnzo 1:15-20
Wayezohlala ngakwesokunene sikaNkulunkulu	IHubo 110:1	IzEnzo 2:34-36

a I-Cyclopedia kaMcClintock noStrong ithi: “Kubonakala sengathi imibhalo yohlu lwezizwe zakwaJuda nemindeni yazo yalahleka lapho kubhujiswa iJerusalema, hhayi ngaphambi kwalokho.”

b Igama lesiHebheru elithi Imanuweli, elisho ukuthi “UNkulunkulu Unathi,” liyichaza kahle indima kaJesu njengoMesiya. Ukufika kwakhe emhlabeni nomsebenzi awenza, kwabonisa ukuthi uNkulunkulu uzinakile izinceku zaKhe.—Luka 2:27-32; 7:12-16.

c Igama elithi “umNazaretha” kubonakala sengathi liqhamuka egameni lesiHebheru elithi neʹtser okusho ukuthi “ihlumela.”

d Ukuze uthole imininingwane mayelana nezenzakalo ezikhomba ukuthi u-29 C.E. uwunyaka uMesiya avela ngawo, bheka isihloko esithi “Indlela Isiprofetho SikaDaniyeli Esibikezela Ngayo Ukufika KukaMesiya.”

e Lesi siprofetho sisencwadini kaZakariya kodwa umbhali wencwadi yeBhayibheli uMathewu uthi ‘kwakhulunywa ngoJeremiya umprofethi.’ (Mathewu 27:9) Kubonakala sengathi incwadi kaJeremiya yayisekuqaleni eqoqweni lemiBhalo ebizwa ngokuthi “abaProfethi.” (Luka 24:44) Ngakho kungenzeka ukuthi uMathewu wayesebenzisa igama elithi “Jeremiya” lapho ebhekisela kulelo qoqo lezincwadi elalihlanganisa nencwadi kaZakariya.

Okunye Ongase Ukuthande

PHAPHAMA!

https://cms-imgp.jw-cdn.org/img/p/502018132/univ/art/502018132_univ_sqr_xl.jpg

ijwbq isihloko 146

OFakazi BakaJehova

Ingabe Iziprofetho Ezabikezelwa NgoMesiya Zifakazela Ukuthi UJesu WayenguMesiya?

Impendulo yeBhayibheli

Kusho ukuthini ukuthi “Mesiya”?

Ingabe iziprofetho ezimayelana noMesiya zazingagcwaliswa abantu abaningi?

Ingabe uMesiya uzovela esikhathini esizayo?

Zingaki iziprofetho eziseBhayibhelini ezikhuluma ngoMesiya?

Ezinye iziprofetho ezimayelana noMesiya ezagcwaliswa uJesu

Okunye Ongase Ukuthande

Okushiwo YiBhayibheli NgoMesiya

UJesu—Isizathu Sokuba Afe

Intokazi EngumJuda Ichaza Ngokwayenza Yaphinde Yahlola Izinkolelo Zayo

Zama Isifundo Sethu SeBhayibheli