Yaca, Gudxlio reʼ diti sanitlóni, nili saʼijni nili sioʼ stoib xalagaryni. La Biblia rasuidy que Dios bisaʼ Gudxlio par nabés buñ loni por tipzó.

•   «Buñ ni rony xinésni xtunyibu sac gudxlio né sabanyibu loni por tipzó» (Salmo 37:29).

•   «Láabu ma bisaʼbu gudxlio xalagaryni; dipa sioʼ ni satzaʼ xalagaryni» (Salmo 104:5).

•   «Gudxlio sioʼni por tipzó» (Eclesiastés 1:4).

•   «Ni bisaʼ gudxlio, ni bunytzaay né bisagaʼdxich láani, diti xilaʼsi bisaʼbu gudxlio, xalagary ngú bisaʼbu láani par tzoʼ ni guibany loni» (Isaías 45:18).

 Dios diti sadudy lagary que buñ guinitló Gudxlio xtol contaminación, guerr o stipnés cós. Xalagary ngú la Biblia ná que sanitló: «Guirá buñ ni caxin gudxlio» (Apocalipsis 11:18). ¿Ximod sonybu láani?

 Dios sabeʼbu guirá gobiernos ni noʼ, ni diti nan ximod gan Gudxlio, né xalagaryni coʼbu toib Gobierno ni diti nap galkié (Daniel 2:44; Mateo 6:9, 10). Ni gony mandary Gobierno reʼ láabu ngú Jesucristo, Xiin Dios (Isaías 9:6, 7). Órni goyoʼ Jesús ló Gudxlio labúu biscueʼsbu buroʼdant (Marcos 4:35-41). Jesús ni nac rey de Gobierno xtuny Dios, sony mandarybu Gudxlio né guirá cós ni napni. Sony copybu Gudxlio par guiaʼanni xomod góc jardín de Edén (Mateo 19:28; Lucas 23:43).

 Yaca. Ndeʼ nac toib galrraché órni buñ diti rien ni ná 2 Pedro 3:7, ni ná: «Guibá né gudxlio ni noʼ nigoreʼ noʼni par guinitlóni ló guii». Guienno chop cós ni rasacgoluʼ par guienno diitz reʼ:

1.   Ló la Biblia, diitz guibá, Gudxlio né guii labúu guidudyni diitz xidal cós. Por ejemplo, Génesis 11:1 ná: «Guidopynac gudxlio caniʼ toibsi diitz». Reʼ «gudxlio» radudyni diitz guirá buñgudxlio.

2.   Ló stipnés versículos rarexa 2 Pedro 3:7 xi radudy diitz «guibá» «gudxlio» né «guii». Versículos 5 né 6 radudyni diitz ni góc ló xtzú Noé. Gudxliogox cu binitló, per Gudxlio diti binitló. Ni binitló Guiérodann cu góc buñ mal, ndeʼ radudy diitz «gudxlio» (Génesis 6:11). Láaca binitlóni «guibá», ndeʼ radudy diitz, buñ ni buny mandary ló dzúcu. Ma bienno Gudxlio reʼ diti binitlóni, xalagary ngú ni binitló ngú buñ mal. Noé né xfamil bilaa órni binitló Gudxliogox cu né bibanyibu después ni godudy Guiérodann né goyoʼ más xiinyibu (Génesis 8:15-18).

 Xomod Guiérodann, «guii» o galrranitló ni rasetlaa 2 Pedro 3:7, sanitlóni guirá buñ mal, diti Gudxlio ro rabésno. Dios raiby lóono que «noʼ toib guibá copy né toib gudxlio copy xomod bidudybu xtiitzbu guidudybu lóono né lagarycu guirá buñ sony xinésni» (2 Pedro 3:13). «Gudxlio copycu», o buñ ni rony xinésni, sapyibu toib «guibá copy», o toib gobierno, ni nac Gobierno xtuny Dios. Né Gobierno reʼ sony que gacni toib lagary sacróyen (Apocalipsis 21:1-4).