La Biblia diti raquiin diitz aborto par guidudyni diitz nompa guitudy buñ xiin. Per xidal versículos ni sieed ló la Biblia racnéni lóono guienno ximod rabiʼ Dios vida xtuny buñgudxlio, dada vida xtuny toib mbioxien ni yása gaal.

 Vida nacni toib galrrascad xtuny Dios (Génesis 9:6; Salmo 36:9). Guirá clas vida rasacni par Dios, né ndeʼ raguiñani vida xtuny toib mbioxien ni noʼ lainy xpidzan xinaʼ. Por ngú, órni toib buñ ragaity toib mbioxien ni yása gál, cayonybu toib galkié.

 Ley ni bidudy Dios a israelitas goniʼni: «Pal tipnés buñguieeu ro cacalsaʼ ronynayibu toib buñgonaʼ ni nacxiin né xiin buñgonaʼ reʼ ralseʼ, per ni toibyibu raity, buñguieeu ni nap dool non quiixbu midid mal ni bunybu mod canab tzeʼel buñgonaʼ reʼ. Non quiixbu midid ranab jueces quiixbu. Per pal noʼ ni raity, naplo xi de guidudylo vida por vida» (Éxodo 21:22, 23). a

•  ¿Pu ór rasaló vida xtuny toib buñ?

•  ¿Labúu gony perdonar Dios toib buñ ni nompa bitudy xiin la?

•  ¿Mal láani guitudy toib buñgonaʼ xiin pal rioʼbu ló riesga o pal xpadaʼbu rioʼ ló riesga la?

 Par Dios, vida xtuny toib buñ rasalóni desde dzú rac xiin toib buñgonaʼ. Ló xtiitzbu, la Biblia, Dios guirá ór radudybu diitz toib mbioxien ni yása gál xomod toib buñ. Guibiʼno tipnés ejemplos ni rasuidy que Dios toibsi midid rabiʼbu toib badaʼ ni noʼ lainy xpidzan xinaʼ né toib badaʼ ni ma gool.

•   Por xcalnadip Dios, rey David gochbu Dios ndeʼ: «Bisalólo bibi’ naʼ dada órni cayaʼya lainy xinaʼya» (Salmo 139:16). Por ngú, par Dios, David ma nac toib buñ, ná yása gálbu.

•   Guibiʼno stoib ejemplo. Dios ma nap toib dxiin par profeta Jeremías ná yása ñálbu Dios góoch láabu: «Antes de nasaʼya looy lainy xinaʼlo, ma bimbuya looy; né antes de ñalo, buny nayaaya looy. Buni profeta looy par guirá gudxrop» (Jeremías 1:5).

•   Lucas, toib buñguieeu ni bicaʼ la Biblia ni láaca góc doctor, biquiimbu toibsi diitz griego par toib badaʼ ni yása gál né toib ni ma gool (Lucas 1:41; 2:12, 16).

 Scú, Dios labúu gony perdonar toib buñ ni bitudy xiin. Pal rabiʼbu vida xomod rabiʼ Jehová láani, diti non guisacbu mal por ni ma bunybu. La Biblia ná: «Jehová ronladx né natzayxatbu [...]. Dios riné xcalkiéno sitgoluʼ, xomod sit noʼ ro ralainy govitz né ro riaʼis govitz» (Salmo 103:8-12). b Jehová satudybu scásiʼ xcalkié buñ ni rac arrepentir né guidopy xcalnabany de guirá galkié ni bunybu ló dzú ni see, né raguiñani buñ ni ratudy xiin (Salmo 86:5).

 Mod raniʼ la Biblia vida de toib badaʼ ni yása gál, diti noʼ razón par guitudy buñ xiin ná pal láabu o xiimbu noʼ ló riesga.

 ¿Né xí ñac pal órni cayál xiimbu noʼ riesga ñaity toibtica de layibu né non nabúbu chú guilaa? Ná ndeʼ diti tampa rasaclóo buñ láani, nosi xfamilbu guiniʼ chú guilaayibu.