Armagedón nacni toib guerr xtuny Dios né gobiernos ni noʼ ló Gudxlio. Guirá gobiernos reʼ né xpiin diti rasobyibu ni rony mandary Dios (Salmo 2:2). Guerr ni laa Armagedón sanitlóni guirá gobiernos xtuny buñgudxlio (Daniel 2:44).

 Diitz Armagedón, láaca racáni modreʼ Har–Magedón, toibsi buelt sieedni ló la Biblia, sieedni ló libro Apocalipsis. Ló profecía reʼ náni que «guirá reyes ni noʼ ló guidopynac Gudxlio» sadopyibu «ló guerr de xtzú rodann Dios, ni nap Xiroʼgolu galnadip». Guerr reʼ sácni «lagary ni ló diitz hebreo laa Armagedón» (Apocalipsis 16:14, 16).

 ¿Chú layibu sadíil ló guerr ni laa Armagedón? Ángeles ni noʼ lainy guibá né Jesucristo guisanir nislóyibu, layibu sonyibu gan xi enemig Dios (Apocalipsis 19:11-16, 19-21). Buñ ni diti rasob xcalmandary Dios né ni rabixladx a Dios, guiráyibu diti sonyibu gan (Ezequiel 39:7).

 ¿Noʼpa toib lagary ló Gudxlio ro gac Armagedón la? Yaca. Guerr Armagedón sácni ló guidopynac Gudxlio, diti noʼpa toib lagary ro gacni (Jeremías 25:32-34; Ezequiel 39:17-20).

 Diitz Armagedón (ló diitz hebreo, Har Meghiddóhn) radudyni diitz «Dainy Meguidó». Meguidó gocni toib gudx ni goyoʼ lainy gudx Israel. Historia rasetlaa que gaxca cú godíil buñ. La Biblia rasetlaa tipnésni (Jueces 5:19, 20; 2 Reyes 9:27; 23:29). Per Armagedón diti labúu radudyni diitz de toib lagary ni laa Meguidó, portín lagarycu diti noʼ toib dainy. Ló láach Jezreel, ronoʼ Meguidó, lagarycu diti labúu ñoʼ guirá ni nadíil né Dios. Ni nacni la, Armagedón nacni toib guerr ro sacaló potencias políticas a Gobierno xtuny Dios.

 ¿Xí láani gac ló guerr ni laa Armagedón? Diti nanno ximod saquiin Dios xcalnadip, per nandxichno que saquiimbu guirá ni biquiimbu ló dzú ni see: guié laver, ro rodann, guiérodann, guii né azufre, galrriapnís né galguitz ni ragaity xidalguixo buñ (Job 38:22, 23; Ezequiel 38:19, 22; Habacuc 3:10, 11; Zacarías 14:12). Buñ sanit xcalrrien, né ngú sony que xi enemig Dios guigaity saʼ, ná después sadudyibu cuent que Dios ngú ni cachiin layibu gonyibu ngú (Ezequiel 38:21, 23; Zacarías 14:13).

 ¿Sanitlóni Gudxlio ló Armagedón la? Gudxlio reʼ diti sanitló ló Armagedón. Gudxlio goyaʼni par guibany buñ loni por tipzó (Salmo 37:29; 96:10; Eclesiastés 1:4). Por ngú, Armagedón diti sanitlóni guiránac cós ni noʼ. Ni máspa la, Armagedón labúu sonyni que guilaa «xidalguixo buñ» ni rony ni ná Dios (Apocalipsis 7:9, 14; Salmo 37:34).

 ¿Per xí diti rasuidy la Biblia que Armagedón sanitlóni gudxliogoxreʼ la? Ló tipnés versículos diitz gudxlio radudyni diitz lagary ro rabésno. Per láaca la Biblia raquiin diitz reʼ par guisetlani de xidal buñ ni diti rasob ni ná Dios (1 Juan 2:15-17). Labúu guinino que Armagedón sanitlóni gudxliogoxreʼ (Mateo 24:3).

 ¿Pú dzú saló guerr ni laa Armagedón? Órni ranino de toib «gran tribulación» ni salox ló Armagedón, Jesús goniʼ xi gac dzúcu: «Dzú né ór diti noʼ chú nan láani, nili ángeles ni noʼ lainy guibá, nili naʼ; nosi Bixiosa» (Mateo 24:21, 36). La Biblia rasetlaa que Armagedón sácni ló tiemp ni ma noʼ Jesús, ni gosaló íz 1914 (Mateo 24:37-39).