¿Ximod labúu ganlo balaati midid nís ni notz alcohol gueʼlo?

TONY, ni bisetlano ló primer artículo, labúu narecaabu galán pal nadudybu cuent que cacalóbu toib galnagan. Godudy midid goʼbu né ralooypani diti noʼ xi bunyni láabu, por ngú bunybu crer que diti noʼ xi ñacbu. ¿Ximod biscúbu láacabu?

Portín alcohol bicaa láabu par diti nadudybu cuent xi cayacbu. Diti bidudybu cuent, yoobguicbu diti gocné láabu par ñanbu xi cayacbu ló sentido físico, mental né emocional. Né laʼga más reʼbu más ranit xcalrriembu.

Diti labúu bichocbu loni portín nigolú gopbu gan ñeʼbu alcohol. Alberto ngúca gosaclóo. Diti cuacuentbu que reʼbu alcohol. Láabu nábu: «Nagachca gooya alcohol, né órni godudy midid goʼbu alcohol, goniʼbu que diti sasaclobu xitcal. Né ni goloʼya guica láani ngú: gueeya alcohol né diti guisiana láani». Por ngú Tony né Alberto, ná stipnés góoch layibu que reʼyibu alcohol layibu goniʼyibu que alcohol diti rony mandary layibu. Per xalagary ñacni scú: alcohol buny mandary layibu. ¿Né buñ ni cadudy ló galnagan de clas reʼ xí labúu gonyibu?

Non coʼlo guiclo gonylo ndeʼ

Xidal buñ ni ma bisian alcohol bisobyibu consej ni bidudy Jesús: «Ppal bisalólo ni naplo ladbuʼ cachel ñeʼlo, gohx láani né bisal láani sit. Portín más galán guisnitlo toibticani, xalagary guisnitlo guidopy laidylo ló Gehena» (Mateo 5:29).

Órni bisetlaa Jesús guirá ndeʼ. Bislooybu que toib buñ non guisian guirá cós mal par labúu guidzakbu Dios sacró. Né ná ndeʼ labúu guisioʼobni buñ, sacnéni lóono par gonyno pensary sacró né par diti tzaguiabno ló alcohol. Né pal buñ cayaiby looy que nigolú reʼlo alcohol, gop cuidad. Ma diti guegoluʼlo alcohol. * Né pal radudylo cuent que diti labúu guisianlo láani, buny xtem par diti gueʼlo xitcal. Ná guisac naganlo gonylo láani, más feo ngú gaitylo.

Per ¿né pal toib buñ ni diti nac alcohólico per radudy midid reʼbu ga? ¿Xí labúu gony toib buñ par gueʼbu alcohol né midid?

¿Pu lagary labúu guidzelo galrracné?

1. Buny oración guirá ór. Guirá buñ ni nap fe lóo Dios né nainy láayibu gonyibu cós ni rioladx Dios, la Biblia rasetlaa xi láani gonyibu: «Diti tzoʼto ló galrrasaʼ por nitisi cós. Xalagary ngú, gonyto oración guinabto lóo Dios né guidudyto guixquix láabu; modreʼ Dios gan xi canabto, né paz xtuny Dios que ni toib buñ diti labúu rien, san xcalnabanyto né xpensaryto por Cristo Jesús» (Filipenses 4:6, 7). Per ¿xí labúu guisetlalo ló oración né modreʼ sadudy Dios paz looy?

Ni raquiin gonylo ngú guiniʼlo que, diti labúu rasianlo alcohol né guicacuentlo guirá ni raguiñani. Né pal raibylo Dios ni ma goloʼlo guiclo gonylo, láabu sacnébu looy par guisianlo vis reʼ né par diti guicalólo stipnés galnagandaʼ. Xomod ná Proverbios 28:13: «Ni racach xcalkié diti sarebuʼ ni gony, per ni raset né ma diti rony láani sacaʼ galrronladx». Jesús buny animar lóono nanabno lóo Dios: «Né diti guidudylo lagary lóodo guiabdo ló tentación, xalagary ngú bilaa lóodo ladxña ni nigolú mal» (Mateo 6:13). ¿Xí labúu gonylo par guislooylo que oración xtunylo rareʼni lainy xcalnabanylo? ¿Né pu lagary guidzelo galrracapy de guirá oración xtunylo?

2. La Biblia sadudy fuers looy. Bisetnaladx que «xtiitz Dios nabanyni, né napni galnadip, [...] né labúu rabeʼxilatni ni noʼ ló xpensary buñ né lainy xcalnabany buñ» (Hebreos 4:12). Ni racné a guirá buñ ni regoluʼ alcohol láani ngú ni roʼolyibu tipnés textos ni sieed ló la Biblia guirá dzú né ronyibu pensary loni. Xomod goniʼ salmista, «nakit rioʼ buñ ni diti rasaa ló xilitz buñ mal, [...] xalagary ngú rioladxbu xiley Jehová; dzú né gueʼel roʼolbu láani né ronybu pensary loni». Né después náni: «Guirá ni gonybu sarebuʼni» (Salmo 1:1-3).

Xomod Alberto, gopbu galnadip par labúu bisiambu vis reʼ portín bisuidybu la Biblia né testigos xtuny Jehová. Láabu nábu: «Nandxichi que pal diti nasudi la Biblia diti labúu nasiana vis reʼ, diti labúu nasiana alcohol né ma goti naa».

3. Buny por gony mandarylo looyca. Mod ná la Biblia, tipnés buñ antes de ñacyibu de congregación cristiana gosochyibu per gocyibu nayaa né espíritu xtuny Dios (1 Corintios 6:9-11). ¿Ximod? Espíritu santo gocné layibu par labúu buny mandaryibu láacayibu né labúu bisianyibu galrrasoch né guirá cós yox ni bunyibu. Por ngú, Xtiitz Dios ná: «Diti sochto né vino xalagary ngú colgap espíritu» (Efesios 5:18; Gálatas 5:21-23). Né ni máspa la, Jesucristo goniʼ que Bixiosbu «ni noʼ lainy guibá sadudy espíritu santo ni canab láani». Por ngú goniʼbu: «Colguinab guirá ór né sacaʼto» (Lucas 11:9, 13).

Scú láani, guirá buñ ni raniiny que guibaladx xcalnabany Dios raquiin guisuidyibu gonyibu gan láacayibu. Né toib ni más galán láani ngú goʼolyibu né guisuidyibu la Biblia né gonyibu oración guirá ór né guireʼni desde lainy xcalnabanyibu. Né pal rareʼganno, guisetnaladxno texto reʼ: «Ni cadxiʼp né rony pensary ló espíritu sabany tipzó. Por ngú diti guisianno de gonyno cós tzaay, portín sadxin dzú satopno cosech pal diti rareʼganno» (Gálatas 6:8, 9).

4. Gop cuidad xi clas buñ radzaklo. Proverbios 13:20 ná: «Buñ ni rasané buñ ni noʼ xcalrrien sadxin sac buñ ni noʼ xcalrrien, per ni radzak buñ ngaʼal sarecaa mal». Por ngú, raquiin gaibylo ximiglo que ma diti tampa reʼlo alcohol. Né diti guidziguiaʼlo pal noʼ tipnés buñ ni rony borla looy o rayopy mod par tzaguiablo loni. La Biblia goniʼ que xidal buñ sadziguiaʼ né saniʼbu mal de guirá buñ ni ná guisian toib vis, o órni náyibu guisianyibu vino o stipnés galnakit  (1 Pedro 4:3, 4). Órni casaclolo modreʼ más galán diti guidzaklo layibu.

5. Goloʼ guiclo xi láani gonylo. Romanos 12:2 náni scareʼ: «Ma diti guibanyto mod nabany buñ ló naareʼ; xalagary ngú, colguitzaʼ mod ronyto pensary, modcu stiplóocato ganto xi láani ngú cós tzaay, xi láani ngú ni racacuent né ni raniiny Dios gonyto». ¿Nainy looy gonylo cós ni rioladx Dios la? Por ngú goloʼ guiclo xi láani gonylo par guisoblo ni sieed ló la Biblia, né diti ni rony buñ pensary ni noʼ ló gudxliogoxreʼ. Per ¿ximod labúu ganlo balaati midid alcohol gueʼlo?

Ni diti nagan: Pal moda ranit xcalrrienlo né radxe guiclo ngú radudy diitz que ma godudy midid goʼolo. Por ngú, pal ragoʼlo guiclo gueʼlo goniʼ balaati midid labúu gonylo láani. Cuá cuidad xi ni ma cayonyni looy. Bisetnaladx: más galán coʼlo xcalrrienlo que guiablo ló vis cu.

6. Raquiin guiniʼlo yaca. Ló stoib diitz, xomod goniʼ Jesús: «Pal guiniʼto scú, gacni scú, pal guiniʼto yaca la, gacni yaca» (Mateo 5:37). Pal toib buñ cayaiby looy gueʼlo alcohol goniʼ yaca. Per diti guialadxlo gonylo láani né mod, xomod ná Colosenses 4:6: «Diitz ni guiniʼto guirá ór gacni né mod, gapni suudy, par ganto ximod guicapyto tigaaga buñ».

7. Biyopy galrracné. Biyopy ximiglo ni ronladx looy par gacnébu looy ló sentido espiritual né par gacnéyibu looy par diti guegoluʼlo alcohol. La Biblia ná: «Más galán ngú chop buñ que toib, portín racaʼyibu más galnasác por dxiin nadip ni ronyibu. Pal toibtica de layibu riab, xcompañerbu labúu gacné láabu guiásbu» (Eclesiastés 4:9, 10; Santiago 5:14, 16.) Ndeʼ láaca rasetlaa Instituto Nacional sobre el Abuso del Alcohol né Al­coholismo, de Estados Unidos: «Órni buñ rasac nagan guichocbu ló gan par gueʼbu, labúu guinabbu xcalrracné xfamilbu o ximigbu».

8. Gosagaʼ ló xtiitzlo. Santiago 1:22, 25 náni scareʼ: «Colgony ni ná xtiitz Dios né diti nosi guicadiagto ni náni, pal diti ronyto láani scú caguitquelto lóocato. Per buñ ni rabiʼtzay ló ley ni diti raché ni radudy lagary gonyno ni nainy lóono, né riodieʼbu loni, diti nosi racadiagbu né maca rialadxbu, xalagary ngú ronybu dxiincu; sioʼbu nakit ló guirá ni gonybu».

Par labúu guisianlo vis

Diti guirá buñ ni radudy midid reʼ alcohol radxin rac toib alcohólico. Per ni regoluʼ o reʼ guirá ór ma alcohol rony mandary layibu, tanli laidybu xomodca xpensarybu. Né par guisiambu vis cu, diti nosi guiniiny láabu guisiambu láani né guicaʼbu galrracné espiritual. Alberto rasetnaladx: «Órni biyobi mod nasiana galrrasoch nili tip biniʼ diti gooya né nigolú bitudyni naʼ ló galrrioʼob. Órcu bienna que diti nosi caquiinna galrracné espiritual, caquiinna remeidy».

Xidal buñ alcohólicos láaca modreʼca raniʼ. * Par labúu guiguaʼyibu sacró né gonyibu ni ná Dios, tipnés ma goyee hospital par gony guantaryibu síndrome de abstinencia o par guicaʼbu remeidy par diti guiniiny layibu gueʼyibu. Xiin Dios ni labúu buny galrradziguiaʼ goniʼ: «Órni bicadiagbu, Jesús góoch layibu: buñ ni nasac diti raquiin tzee ló doctor, per buñ ni caxoʼ scú. Diti bieela par guiyobi buñ ni rony xinésni, xalagary ngú bieela par guiyobi buñ galkié» (Marcos 2:17).

Tipnés razón par guicadiagno Dios

Consej tzaay ni sieed de Dios ni nigolú sieedni de Dios ni nigolú. Nainy láabu guiguaʼno sacró, diti nosi tidxósi tiemp xalagary ngú por tipzó. Alberto, ni bisian alcohol de goloʼ veinticuatro íz, dada nigoreʼ rioʼ nakitbu órni rasetnaladxbu mod godudybu. «Bidxin lainy xcalnabani ni bisudi que labúu guisiana galrrasoch, que Jehová nainy gacnébu naʼ né riembu né rioʼbu galrrasaʼ por naʼ, né racnébu naʼ órni más caquiinna láani. Dipa salox guidudy guixquix láabu por guirá ni ma bunybu por naʼ».

Pal radudy midid reʼlo o ma diti labúu rasianlo alcohol, diti guireʼganlo. Alberto nac toib de xidal buñ ni gosaclóo mod casaclolo, per ma diti tampa reʼbu alcohol o dada ma diti reʼbu. Layibu diti rac arrepentiryibu por xtem ni bunyibu, né looy láaca diti sac arrepentirlo.

Tanli pal ragoʼlo guiclo ma diti guegoluʼlo, o pal ragoʼlo guiclo ma diti gonylo prueby ni tip biniʼ, guirá ór bisetnaladx ni goniʼ Jehová: «¡Pal looy nasoblo ni rony mandary looy! Órcu paz xtunylo nadxin ñac xomod toib guʼuc, né justicia xtunylo ñac xomod xcuann nisdaʼ» (Isaías 48:18).

[Ñeʼ guiich]

[Cuadriyen né dibuj]

 «¿Ma diti labúu roni mandary láani la?»

Gonabdiitz looy

• «¿Reeya más alcohol que nírcu la?»

• «¿Reeya guirá ór la?»a

• «¿Alcohol ni reeya ma más nadipienni la?»

• «¿Reeya par diti tzoʼya ló galrrasaʼ o par guialadxi galnagan ni napa la?»

• «¿Ma góoch toibtica buñ naʼ ximiga o xfamila que radudy midid reeya la?»

• «¿Ma goloʼ alcohol galnagan lidxi, ló xchiina o órni noʼya de vacaciones la?»

• «¿Rasac nagana diti gueeya tip xomal la?»

• «¿Diti rasaca sacró que stipnés buñ diti gueʼ la?»

• «¿Diti raseta balaati reeya la?»

Pal racapylo que scú a toib o más de galrranabdiitz reʼ, sigory non guichoclo loni.

[Cuadriyen né dibuj]

Par diti gac arrepentirlo

Antes de gueʼlo alcohol, buny pensary:

• «¿Láani ngú gueeya, o diti gueeya la?»

Consej: Pal nanlo que rasacnaganlo guichoclo loni, más galán diti gueʼlo.

• «¿Balac cop gueeya?»

Consej: Buny pensary balac gueʼlo antes de gony mandary alcohol looy.

• «¿Pu ór gueeya?»

Consej: Dipa gueʼlo órni caxonylo camión o órni cayonylo tipnés dxiin ro raquiin tzónalo, nili órni ronylo dxiin de religión xtunylo. Láaca diti gonylo láani órni nac xiinlo, nili órni cayeʼlo remeidy.

• «¿Pu lagary gueeya?»

Consej: Dipa gonylo láani ro diti nap buñ permís gony láani, diti gonylo láani nagach nili nisló buñ ni diti rabiʼ sacró ni reʼ buñ.

• «¿Né chú layibu labúu gueeya?»

Consej: Né ximiglo o xfamilo ni naní guic; dipa gueʼlo né buñ ni nigolú rasoch.

[Cuadriyen né dibuj]

Ni gosaclóo stoib buñ ni gosoch

Supot, ni rabés gudx Tailandia, nigolú goʼgolubu. Primer nosi goʼbu goxin, per dxoga dxoga goʼbu rosil né galadzú. Guirá ór goʼbu par nasochni láabu. Per después gosaló bisuidybu la Biblia né testigos xtuny Jehová né bisuidybu que Dios diti rioladxbu buñ ni rasoch. Por ngú, bisiambu galrrasoch per diti por xidzú tiemp. Órni biabbu loni stoib, nigolú bioʼobni xfamilbu.

Láabu bidxinbu gondxiʼbu Jehová né goniiny laabu ñony adorarbu Jehová xinésni. Ximigbu ni nac cristianos gocnéra láabu, dada buny animaryibu xfamilbu que diti nareʼgan né nadudy más tiemp né láabu. Órcu ni ná 1 Corintios 6:10 ro ná que buñ ni rasoch diti sioʼ ló Gobierno xtuny Dios bixalni bisalóbu né bibiʼbu que nirodann ngú ni cayonybu. Órcura bidudybu cuent que non nasiambu galrrasoch.

Órcu ma goloʼbu guicbu guisiambu láani. Né xcalrracné espíritu santo xtuny Dios, mod ragonés la Biblia né xcalrracné xfamilbu né congregación, bidudyni fuers láabu par labúu bunybu láani. Xfamilbu nigolú goyoʼ nakit órni bibiʼyibu que goyonisbu xomod Testigo. Nigoreʼ Supot radzaktzaybu Dios ni goniiny láabu guirá ór, né racnébu stipnés buñ guimbu Dios.