1, 2. a) ¿Xigony goniʼ apóstol Pablo que galnadxiʼ nacni toib cualidad ni «rasac»? b) ¿Xí galrranabdiitz guisuidyno?

 ÓRNI apóstol Pablo goniʼ de cualidades xomod fe, esperanza né galnadxiʼ, bilox goniʼbu ndeʼ: «Ni más rasac ladni láani ngú galnadxiʼ» (1 Cor. 13:13). ¿Xigony goniʼbu ngú? Portín ló dzú ni sietra diti saquiin gapno fe ló promesas xtuny Dios de Gudxlio copy, portín esperanza xtunyno ma góc cumplirni. Per guirá ór non gandxiʼno Jehová né buñ. Galnadxiʼcu saniʼsrani né diti saloxni.

² Guirá ór guislooyno que napno galnadxiʼ, guisuidyno tzón galrranabdiitz reʼ. Primer, ¿xigony non gandxiʼno saʼno? Ni rarop, ¿ximod labúu guislooyno que nadxiʼno saʼno? Né ni rion, ¿ximod labúu gony nadipno galnadxiʼ ni napno saʼno?

3. ¿Xí razón napno par gandxiʼno saʼno?

³ ¿Xigony rasac gandxiʼno saʼno? Toibtica razón láani ngú, portín órni ronyno láani raslooyno que nacno cristianos ni nigolú. Jesús gochbu apóstoles xtunybu ndeʼ: «Modcu guirá buñ san que lóoto nacto xpiina: pal nadxiʼto saʼto» (Juan 13:35). Galnadxiʼ ronyni que guiguaʼno toibsi. Por ngú, Pablo goniʼ que «galrronladx racnéni buñ guiguaʼ toibsi» (Col. 3:14). Né noʼ stoib razón ni rasac ni non gandxiʼno saʼno. Apóstol Juan bicaʼbu par xhermanbu: «Ni gandxiʼ Dios láaca non gandxiʼbu xhermanbu» (1 Juan 4:21). Órni raslooyno galnadxiʼ saʼno raslooyno que nadxiʼno Jehová.

4, 5. Bisetlaa toib ejemplo ni raslooy mod radzak galnadxiʼ ni napno Dios né galnadxiʼ ni napno saʼno.

 ⁴ ¿Ximod galnadxiʼ ni napno Dios radzakni né galnadxiʼ ni napno xhermanno? Par guienno láani, gonyno pensary ximod xcalnabanyno radzakni guirá ni noʼ laidyno. Toib doctor labúu guiembu ximod noʼ xcalnabany toib buñ ni cayony tenderbu, nosi guicaʼbu aparat yainy ña buñcu. ¿Xí rasuidy ejemplo reʼ lóono?

⁵ Xomodca doctor labúu sanbu ximod noʼ xcalnabany buñ ni cayony tenderbu pal pulso xtuny xcalnabanybu cayonyni dxiin galán o yaca, lóono láaca labúu ganno ximod noʼ galnadxiʼ ni napno Jehová pal rabiʼno que galnadxiʼ ni napno saʼno noʼni nadip. Pal radudyno cuent que galnadxiʼ ni napno xhermanno cachichni, pentzi galnadxiʼ ni napno Jehová láaca ma cayacni scú. Per, pal riaʼno raslooyno que ronladxno xhermanno, ngú radudy diitz que galnadxiʼ ni napno Jehová noʼni galán.

6. ¿Xigony non tzoʼno galrrasaʼ pal galnadxiʼ ni napno xhermanno ma bichichni? (1 Juan 4:7-9, 11).

⁶ ¿Xigony non tzoʼno galrrasaʼ pal galnadxiʼ ni napno xhermanno ma bichichni? Portín ngú labúu guidudyni diitz que mod radzakno Jehová noʼni ló riesga. Modcu raslooy ni bicaʼ apóstol Juan: «Pal diti ronladxbu xhermanbu ni rabiʼbu, ximod labúu gonladxbu Dios ni diti rabiʼbu» (1 Juan 4:20). ¿Xí rasuidyno? Labúu coʼ nakitno xcalnabany Jehová pal raslooyno galnadxiʼ saʼno (bíil 1 Juan 4:7-9, 11).

7, 8. ¿Ximod labúu guislooyno que nadxiʼno saʼno?

⁷ Ló la Biblia radzelno xidal buelt mandamiento reʼ: «Gonladxto saʼto» (Juan 15:12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Galnadxiʼ raniʼsni dada lainy xcalnabanyno; né diti noʼ chú labúu guibiʼ láani. Per, ¿ximod labúu guislooyno láani par guibiʼ stipnés ni noʼ lainy xcalnabanyno? Por mod ranino né mod ronyno.

⁸ Noʼ xidal mod ni labúu guislooyno que ronladxno xhermanno. La Biblia radudy tipnés ejemplos lóono. Non guiniʼto «ni nigolú né saʼto» (Zac. 8:16). «Diti tíilto né saʼto» (Mar. 9:50). «Primer lóoto guislooyto respet saʼto» (Rom. 12:10). «Colguicacuent sacró saʼto» (Rom. 15:7). «Colguituidy scásiʼ xcalkié saʼto» (Col. 3:13). Colgacné «ni cacaló galnagan» (Gál. 6:2). «Diti guiañ guisialdóto saʼto» (1 Tes. 4:18). «Colgacné saʼto par niʼsto» (1 Tes. 5:11). «Colguinab lóo Dios por saʼto» (Sant. 5:16).

9. ¿Xigony ranino que ni guisialdóno xcalnabany stipnés nacni toib mod ni guislooyno galnadxiʼ? (Láaca bibiʼ retrat).

⁹ Guisuidytzayno toibtica mod ni guislooyno galnadxiʼ ni bibiʼno ló párrafo ni ma godudy. Pablo goniʼ: «Diti guiañ guisialdóto saʼto». ¿Xigony ranino que ni guisialdó buñ xcalnabany stipnés nacni toib mod ni rasac ni guislooy buñ galnadxiʼ? Toib obra de consulta bíblica rabexa que diitz griega ni biquiin Pablo par «guisialdó» buñ xcalnabany stipnés radudyni diitz «guisagaʼ buñ cueʼ toib buñ par gony  animar buñ láabu órni cacalóbu toib galnagan». Por ngú, órni rasialdóno xcalnabany toib herman ni cadudy ló galrrioʼob, racnéno láabu par saabu ló néz ni riné guibany buñ tipzó. Guirá ór ni toib hermano o toib hermana caquiimbu toib xic toib buñ par cudxaʼbu né noʼno cueʼbu cayaibyno láabu que nadxiʼno láabu (2 Cor. 7:6, 7, 13).

10. ¿Xigony ranino que ni rasacno galrronladx né ni guisialdóno xcalnabany stipnés radzakni saʼni?

¹⁰ Ni gonladxno né ni guisialdóno xcalnabany stipnés radzakni saʼni. ¿Xigony ranino láani? Portín, órni toib buñ ronladx a toib ni cadudy ló galrrioʼob, nainy guisialdóbu xcalnabany buñreʼ né noʼ ni nainy gonybu par gacnébu buñreʼ. Por ngú, primer ronladxno buñcu né galrronladxcu rachiin lóono guisialdóno láabu. Ngúca rac né Jehová. Pablo ná que galrronladx ni rasac Dios por buñ rachiinni láabu guisialdóbu xcalnabany buñ. Pablo goniʼ que Jehová nac «Bixiosno ni ronladx lóono né rasialdóbu xcalnabanyno» (2 Cor. 1:3). Né diitzreʼ «ronladx lóono», Pablo radudy diitz que nacni toib galrronladx ni rasac toib buñ. Né rabeʼbu laa Jehová «Bixiosno» ro ralainy galrronladx portín ndeʼ ralanyni de láabu. Né galrronladxcu rachiinni láabu guisialdóbu lóono «ló guirá galnagan» (2 Cor. 1:4). Xomodca nís ni rareʼ lainy toib dxilany rascueʼsni galrralán nís ni nap buñ, Jehová rascueʼs né rasialdóbu xcalnabany buñ ni cadudy ló galrrioʼob. ¿Xí sacné lóono par gonladxno né guisialdóno xcalnabany stipnés xomodca rony Jehová láani? Gapno cualidad ni gony que guisialdóno xcalnabany stipnés. Guisuidyno tipnésni.

11. Mod ná Colosenses 3:12 né 1 Pedro 3:8, ¿xí cualidad sacné lóono par gandxiʼno né guisialdóno xcalnabany stipnés?

¹¹ ¿Xí láani sacné lóono par gandxiʼrano né guisialdóno xcalnabany buñ dzúna dzú? Gonyno por gapno cualidades reʼ xomod, tzoʼno xalagary buñ, cariño fraternal né galnatzaay (bíil Colosenses 3:12; 1 Pedro 3:8). Órni galrronladx né stipnés cualidad ni nac xomodca ndeʼ radxin rapno láani, ralanyni lainy xcalnabanyno par guisialdóno stipnés ni cadudy ló galnagan. Jesús golexa láani modreʼ: «Roʼ buñ raniʼ ni noʼ lainy xcalnabany. Buñtzay rabeʼ cós tzaay de cós ni rasac de galnatzaay ni napbu» (Mat. 12:34, 35). Riendxichni que ni rasialdóno xcalnabany xhermanno nacni toib mod ni rasac ni raslooyno xcalnadxiʼno láayibu.

12. a) ¿Xigony non gapno cuidad? b) ¿Xí galrranabdiitz tzacapyno?

¹² Guiráno nainy guisobno mandary reʼ: «Guirá ór gandxiʼno saʼno» (1 Juan 4:7). Per, diti non guialadxno ni goniʼ Jesús: «Xidal buñ ma diti sonladx saʼ» (Mat. 24:12). Né diitzreʼ, Jesús diti bidudybu diitz que xpiimbu ma diti nandxiʼ saʼ. Ná scú, non guicaano cuidad que diti non guicá mod nac buñ lóono ló naareʼ, ni ma nanno láani, guibiʼno ximod rarexa galrranabdiitz ni sieed reʼ: ¿noʼ toib mod ni labúu ganno pal galnadxiʼ ni napno xhermanno nadipni la?

13. ¿Xí labúu nagoʼ prueby galnadxiʼ ni napno?

¹³ Toib mod ni labúu ganno pal galnadxiʼ ni napno saʼno nadipni láani ngú  ganno ximod ronyno né tipnés cós ni racalóno ló xcalnabanyno (2 Cor. 8:8). Toibtica de láani bisetlaa apóstol Pedro: «Ni más raquiin gonyto ngú gandxidoʼto saʼto, portín galnadxiʼ ratudyni scásiʼ xidal galkié» (1 Ped. 4:8). Por ngú, galnadxiʼ ni napno xhermanno rioʼni ló prueby órni rachéyibu o órni ronynayibu lóono.

14. Mod ná 1 Pedro 4:8, ¿xí clas galnadxiʼ raquiinno? Bisetlaa toib ejemplo.

¹⁴ Guisuidytzayno ni bicaʼ Pedro. Ro rasaló versículo 8 raibyni lóono xi clas galnadxiʼ non gapno: gandxidoʼtno. Diitz griega ni biquiin Pedro par gandxidoʼtno radudyni diitz «ni rabíl». Ro ralox versículocu raniʼni xi láani rony galnadxiʼcu: ratudyni scásiʼ ni rony xhermanno. Nacni suusi tlaʼ lairy ni nachíl buñ né nachíl dada nasiegni diti toib o chop, sino «xidal galkié». Ló contexto reʼ, ni guisieg buñ ló toib galkié radudyni diitz «guitudy buñ láani scásiʼ». Xomodca tlaʼ lairy labúu guisiegni ló toib manch galnadxiʼ labúu guisiegni ló debilidad né ló galkié ni nap buñ.

15. ¿Xí láani rac órni galnadxiʼ ni napno stipnés nadipni? (Colosenses 3:13).

 ¹⁵ Galnadxiʼ ni napno saʼno non gacni xiroʼ par labúu gacnéni lóono guitudyno scásiʼ xcalkié stipnés, ná pal rasacnaganno gonyno láani (bíil Colosenses 3:13). Órni ratudyno xcalkié stipnés, raslooyno que xcalnadxiʼno nadipni né láaca raniiny coʼ nakitno xcalnabany Jehová. ¿Xí más labúu gacné lóono par guitudyno xcalkié stipnés né stipnés cós ni ratzuitz lóono?

16, 17. ¿Xí más labúu gacné lóono par guitudyno scásiʼ xcalkié stipnés? Bisetlaa toib ejemplo. (Láaca bibiʼ retrat).

¹⁶ Goloʼ guiclo ló tipnés cós tzaay ni nap stipnés, diti ló cós mal ni ronybu. Labúu guinino que looy cayooylo diitz né stipnés herman né rareʼ xiretrato guiráto. Par labúu gaplo retratcu, rabeʼlo tzónni. Per rabiʼlo que noʼ toibticani ro toib hermano diti bireʼbu sacró. ¿Xí láani gonylo né retratcu? Ralitlo láani né rianélo schopcu, portín ló chopcu guiráto caxiichto.

¹⁷ Retrat ni ragoʼtzayno nacni xomod toib recuerdo. Napno recuerdo sacróyen órni rioʼ nakitno né xhermanno. Per gonyno pensary que ló toibtica buelt toib hermano goniʼ o buny ni diti galán. ¿Xí láani gonylo né recuerdocu? ¿Xigony diti ralitlo láani xomod ñonylo né toib retrat? (Prov. 19:11; Efes. 4: 32). Napno xidal recuerdo sacróyen né hermanocu, por ngú diti sasacnaganno guilitno cós ni bunybu lóono. Ni más sacró láani ngú cotzaayno né galrronladx «retrat sacróyen ni napno de láabu».

18. ¿Xí láani bireʼ loguiaʼ ló artículo reʼ?

¹⁸ ¿Xigony nainy lóono gony nadipno galnadxiʼ ni napno saʼno? Mod ma bisuidyno, portín órni raslooyno galnadxiʼ ni napno saʼno raslooyno que láaca nadxiʼno Jehová. ¿Ximod labúu guislooyno galnadxiʼ guirá xhermanno? Toibtica mod ni labúu gonyno láani ngú guisialdóno xcalnabany xhermanno. Né, par labúu gonyrano láani non gonladxno láayibu. ¿Ximod labúu gony nadipno galnadxiʼ ni napno saʼno? Gonyno rutirigaʼlni lóono par guitudyno scásiʼ ni rony stipnés lóono.

19. ¿Xigony nigolú rasac guislooyno galnadxiʼ ló naareʼ?

¹⁹ ¿Xigony nigolú rasac guislooyno galnadxiʼ saʼno ló naareʼ? Guicaano cuidad xi goniʼ Pedro: «Fin de guirá cós ma bibigaxni. Por ngú, […] ni más raquiin gonyto ngú gandxidoʼto saʼto» (1 Ped. 4:7, 8). ¿Xí láani cuésno gac laʼga guidxin fin? Órni Jesús goniʼ de xpiin, goniʼbu ndeʼ: «Guirá gudx sianladx lóoto por ni nacto xpiina» (Mat. 24:9). Par labúu gonyrano xchiin Jehová ná rianladx buñ lóono, non tzoʼno toibsi. Buñdzab nábu cuestzobu lóono de saʼno, per diti sarebuʼ ni nábu pal nadxiʼno saʼno, portín galnadxiʼ «racnéni buñ guiguaʼ toibsi» (Col. 3:14; Filip. 2:1, 2).