Xidal buñ rony pensary que pal rieeyibu scuel xirop o pal nacyibu buñ ric sabanyibu sacró ló dzú ni sietra. Náyibu que pal buñ riee scuel xirop, sareloguiaʼyibu ló xchiinyibu, sieeni galán layibu lainy xfamilyibu né sacyibu buñtzay. Láaca náyibu que pal rieeyibu toib scuel xirop sapyibu toib dxiin ro guiaxyibu galán, né pal toib buñ rony gan más bidxiich más rabaladx.

Toib buñguieeu de china ni laa, Zhang Chen ná: «Buni pensary que pal diti ñaʼya scuel xirop dipa nareʼya ló galgovin, né pal ñapa toib dxiin ro ñony gan xiroʼ bidxiich labúu nabani goxtiguie».

Xidal buñ raniiny guibany sacró ló dzú ni sietra, por ngú rieeyibu scuel xirop lainy stoib gudxrop. Nírcu ngú ni bunyibu, per nigoreʼ ma más naganni portín ma noʼ COVID-19. Ma de goló casi chii íz toib organización buny toib encuesta ro bidudyibu cuent que «más de tigalaʼ mbiox scuel ni rasuidy lainy stoib gudxrop nacyibu de Asia».

Xidal buñ rony xiroʼ xtem par labúu guisuidy xiin lainy stoib gudxrop. Qixiang toib buñguieeu de Taiwán, ná: «Bixiosa né xinaʼya diti gopyibu xiroʼ bidxiich. Ná scú, bixelyibu guidapcado scuel ni noʼ Estados Unidos». Par labúu naguiixyibu scuel xiropcu, xfamilbu, xomodca rony stipnés, goyoʼ ló xiroʼ diʼin.

Nanno que pal rioʼno toib scuel xirop noʼ ro racnéni lóono, per láaca xidal buñ ni ma goyee scuel radudy cuent que diti rarecaayibu modpa goniiny layibu. Por ejemplo, después ni ma bunyibu xiroʼ xtem né ma goyoʼyibu ló xiroʼ diʼin, xidalyibu diti radzel dxiin ni cayopy. Reportaje xtuny toib periodista ni laa Rachel Mui ni bireʼ ló Business Times, de Singapur, rasetlaa: «Ló naareʼ guirá buñ ni goyee scuel xirop ma más rasac naganyibu guidzelyibu dxiin». Jianjie de Taiwán ni goyee toib scuel xirop, ná: «Xidal buñ racacuent nitisi dxiinien ni noʼ ná goyeeyibu scuel xirop».

Tipnés radzel dxiin ni racladx, per diti nabanyibu goxt xomod goniiny layibu. Niran nacbu toib buñguieeu de Tailandia ni goyee scuel xirop ni noʼ Europa. Órni bibiguetbu xcudxbu, bidzelbu dxiin ni racladxbu. Láabu nábu: «Por ni goyaʼya toib scuel xirop bidzela dxiin ro biaxa xiroʼ bidxiich. Per, par ñoni gan más bidxiich non nareloguiaʼya né ñoni más dxiin. Bidxin midid, empresacu goleʼ xidal buñ ló dxiin, dada naʼ goleʼyibu. Bidudy cuent que guirácano labúu guisnitno xchiinno».

Buñ ric o buñ ni natzatz nabany láaca racalóyibu galnagan lainy xfamilyibu né raxoʼyibu, o nigolú rioʼyibu galrrasaʼ por xpidxiichyibu. Katsutoshi, toib buñguieeu de Japón, ná: «Ná gopgoluʼya bidxiich diti bibani goxt, portín xidal buñ goloʼ prueby né naʼ, bianladxyibu naʼ né chonan xi guirá bunyibu naʼ». Lam, toib buñgonaʼ de gudx Vietnam, ná: «Ma bibiʼya que xidal buñ rony xtem par gap toib dxiin galán né guibany sacró. Per diti rarecaani scú, nigolú rioʼyibu ló galrrasaʼ, rapyibu depresión né raxonéyibu stipnés galguitz».

Xomodca Franklin, xidal buñ ma bidudy cuent que scuel xirop o bidxiich diti tampa raquiinni. Stipnés raniiny guibany sacró ló dzú ni sietra, por ngú xalagary tzeeyibu scuel xirop o gapyibu bidxiich racyibu buñtzay né racnéyibu stipnés. ¿Ngú sacné lóono guibanyno sacró ló dzú ni sietra la? Artículo ni sieed sabexa láani.