Góoch lóodo chú looy.

Goola íz 1979, gudx Estados Unidos. Órni gopa tzón íz, bixiosa né xinaʼya bichílyibu xcaltzeʼelyibu. Xinaʼya bisniʼs naʼ xomod buñ judía, né guirá ór goyaʼya scuel judíos, ni góc laa yeshivás. Órni gopa gatz íz goyoʼdo gudx Israel; scuel cú goyoʼni kibutz, ndeʼ góc toib colonia. Después de tobiz soʼdo gudx México.

Ná diti goyoʼ toib sinagoga gaxca lidxi, gopa costumbres xtuny buñ judíos: bicaʼya guii velador dzú sábda, biila toib guiich ni laa Torá [nacni guiich sagrado xtuny buñ judíos], né buni oración né xcalrracné toib sidur, ndeʼ nac toib libro de oración. Goodxi guirá xcompañera de yolayscuel que religión xtuni ngú ni goyoʼ primer. Dipa goyoʼ dzú biila Nuevo Testamento, ni bisetlaa de Jesús né guirá ni bunybu órni goyoʼbu ló Gudxlio; xinaʼya góoch naʼ que diti non ñoola láani par diti naxinni xpensari.

¿Xigony goloʼlo guiclo goʼolo Nuevo Testamento?

Órni gopa 17 íz, bibigueta Estados Unidos par nasloxa scuel. Toib ximiga góoch naʼ que nacbu cristiano né gochbu naʼ pal diti roni crer lóo Jesús nac nacsi nabani ló Gudxlio.

Cuabi láabu: Buñ ni rony crer lóo Jesús, buñ cascú láabu.

Gonabdiitzbu naʼ: ¿Toibtica buelt ma bíilo Nuevo Testamento la?

Cuabi láabu: Yaca.

Né gochbu naʼ: ¿Xigony raniʼlo scá? Diti galán guiniʼ buñ pal diti nan toib cós.

Buni pensary ló ni gochbu naʼ, portín buni pensary ló ngúca. Ná bitoya, cuacuenta Biblia ni bidudybu naʼ né goynéya láani rioʼ par ñoola Nuevo Testamento.

¿Bioladxlo ni bíilo la?

Scú, nigolú bidziguiaʼya que Nuevo Testamento buñ judíos bicaʼ láani. Né órni más cayoola la Biblia, bibiʼya Jesús xomod toib buñ ni ronladx buñ, né nacbu buñdxo né goniiny láabu ñacnébu buñ. Dada goyaʼya biblioteca goleʼya tipnés libros ni bisetlaa de láabu. Per ni toib libro buny convencer naʼ que nacbu Mesías. Tipnés bisetlaa que nacbu Dios, per diti biluladxi. Buni pensary: «Órni Jesús buny oración, ¿lóo chú bunybu láani? ¿Lóo láacabu la?». Jesús goity, per la Biblia ná que Dios: «Diti raity». *

¿Xí bunylo órcu?

Biyobi galnigolú né buni xtem par nadzela láani. Por ngú, gonaba lóo Dios né guidopy xcalnabani né dada gorudxaʼya, né ma diti biquiinna sidur, toib libro de oración. Suusi bilox buni oración bidxin chop testigos xtuny Jehová ni godap xitz puert. Biiydo diitz né bidudyibu toibtica xfolletyibu naʼ. Guiich reʼ né mod goninéyibu naʼ buny convencerni naʼ que guirá ni raluladxyibu sieedni ló la Biblia. Por ejemplo, par Testigos, Jesús diti rioʼbu lad Trinidad, xalagary ngú nacbu «Xiin Dios» * né láaca rasetlani «ni nirdiguié bisaʼ Dios». *

Después bibigueta gudx México né cú Testigos bisudy naʼ tipnés profecías ni rasetlaa de Mesías. ¡Noʼ xidalguixo profecías! Per ná scú, moda diti biluladxi láani. Gonabdiidza naʼca: «¿Nosi Jesús buny cumplir profecías reʼ la? ¿Né pal nosi goniʼbu que nacbu Mesías par guiscuʼbu buñ gaʼ?».

¿Xí láani buny que natzaʼlo mod bunylo pensary?

Testigos bislooy tipnés profecías ni góc cumplir. Por ejemplo, más de gatzgayoʼ íz antes, Miqueas goniʼ que Mesías ñal gudx Belén. * ¿Chú labúu guiniʼ pu lagary gaal? Isaías goniʼ que Mesías ñaity xomod toib buñ mal, né nagachbu lad buñ ric. * Guirá profecías reʼ góc cumplirni lóo Jesús.

Né stoib prueby ni bisien naʼ ngú de xi famil non ñeed Jesús. La Biblia rasetlaa que Mesías nadxin de xfamil rey David. * Buñ judíos nanoydiguieʼ bicaʼyibu registros de xi famil sieedbu, né pal Jesús diti ñac de xfamil rey David, guirá xi enemigbu nimaca naniʼ ximod nacni. Per diti goniʼyibu xitcal. Dada xidalguixo buñ goniʼ que nacbu «Xiin David». *

Íz 70, treintaysiet íz después ni goity Jesús, guirá soldad romanos binitlóyibu gudx Jerusalén, né guirá registros cú binitlóni. Par labúu ñan buñ de xi famil sieedbu, Mesías non narecaa antes de ízcu.

¿Xí buny convencer looy?

Ló Deuteronomio 18:18, 19, Dios goniʼ que sadxin toib profeta xomod Moisés né goniʼbu ndeʼ: «Sanaba cuent buñ ni diti racadiag xtiitzbu, ni raniʼbu ló laaya». Órni nanoy bisudi guidopynac la Biblia, buni crer que Jesús de Nazaret nac profetacu.