PAR BUÑ NI MA NOʼ XIIN
7 Bisuidy xiinlo gap valores
¿XÍ RADUDYNI DIITZ?
Valores nacni principios ni racné buñ gony xinésni. ¿Ronylo xtem par gaclo buñ honrado la? Pal scú lainy, láaca sasuidylo xiinlo gony scúca.
Toib buñ ni nap valores láaca rony dxiin, ragobiobu nitisi buñ né rioʼbu xalagary stipnés, cualidades reʼ diti nagan gap buñ láani órni nac mbioxhlas.
NI NÁ LA BIBLIA: «Bisniʼs xiinlo ló néz ro non saabu, né diti sasiambu láani nili órni ma nacbu buñgol» (Proverbios 22:6).
¿XIGONY RASACNI?
Valores nigolú rasacni nigoreʼ ni noʼ tecnología. Karyn ná: «Pensary xiinno labúu guixinni ortísi por ni rabiʼbu ló celular o ló tableta, sobcayibu cueʼno né láaca nabiʼyibu cós mal».
NI NÁ LA BIBLIA: Buñ ni nadip xfe «guirá ór rony entrenaryibu xcalrrienyibu par guienyibu xi láani ngú xinésni né xi láani yaca» (Hebreos 5:14).
Láaca rasac gapno respet stipnés. Por ejemplo, rasac guinino «ranaba looy» né «guixquixi looy», né guislooyno que rioʼno galrrasaʼ por stipnés, portín raloyni que buñ ma más rioʼ galrrasaʼ por celular o tableta xtuny xalagary tzoʼyibu galrrasaʼ por buñ.
NI NÁ LA BIBLIA: «Láaca, xomodca nainy lóoto gony buñ lóoto, scúca colgony layibu» (Lucas 6:31).
¿XÍ LABÚU GONYLO?
Nayadit goniʼ xi valores naplo. Tipnés buñnan ná que mbioxhlas diti sonyibu galyoxh pal bixiosbu o xinaʼbu ma bisuidy láabu que malni.
NI LABÚU GONYLO: Biquiin tipnés notísy par guiniʼlo de valores xtunylo. Por ejemplo, pal racadiaglo toib notísy ro ragaity buñ saʼ o rianladxyibu saʼyibu, labúu guiniʼlo ndeʼ: «¡Nogoluʼ cós mal! Xpensarylo, ¿xigony rony buñ guirá ndeʼ?».
«Par labúu gan mbiox xi láani ngú xinésni primer raquiin ganyibu xi ngú cós tzaay né xi ngú cós mal» (Brandon).
Bisuidy layibu gapyibu respet stipnés. Dada mbioxien labúu guisuidyibu tzoʼyibu galrrasaʼ por stipnés né raquiin guiniʼyibu «ranaba looy» o «guixquixi looy». «Órni mbioxien radudy cuent que diti nosi por laʼsiyibu rioʼ buñ galrrasaʼ né órni rienyibu que raquiin gapyibu respet lainy famil, lainy yolayscuel, lainy gudx ronoʼyibu, ndeʼ sacné layibu par gonyibu cós por stipnés», ná libro ni laa, Parenting Without Borders (Padres sin fronteras).
NI LABÚU GONYLO: Colguidudy tipnés dxiinien gony xiinto par guisuidyibu gacnéyibu stipnés.
«Pal xiinto rasuidy rony tipnés mandadien rioʼ ngú sacné layibu, ma diti sasac naganyibu órni cuésyibu toibyibu. Portín maca biaʼyibu ronyibu dxiin» (Tara).
