Guirá íz, testigos xtuny Jehová rasaʼdo né rakiʼsdo scásiʼ millones de biblias né guiich; rasaʼdo Lagary ro radopdo, láaca rasaʼdo Betel né ronytzaaydo láani. Racnédo gaxt ni rony xidal mil betelitas, misioneros, né raxeldo ni caquiin xhermando ni cadudy ló desgrasy. ¿Pu lagary rareʼ bidxiich par guiax guirá ndeʼ?

Diti ranabdo bidxiich. Ná dxiin ni rasaado yoʼ por yoʼ napni xiroʼ gaxt, diti ranabdo bidxiich buñ. Más de tigayoʼ íz, rarop número de La Atalaya ni bireʼ bisetlani que napdo xcalrracné Jehová. Láaca bisetlani: «[Religión xtunydo] dipa sanabni gon lóo buñ par gacné láani». Né scú gocni (Mateo 10:8).

Guirá dxiin riaxni né bidxiich ni raduidydo scásiʼ. Xidal buñ rioladx ni rasuidydo buñ ni ná la Biblia né racnéyibu lóodo né xpidxiichyibu ni raduidyibu scásiʼ. Lóodo ni nac Testigos raduidydo xtiempdo, xfuersdo né xpidxiichdo né cós ni raquiin par gac ni ná Dios ló Gudxlio (1 Crónicas 29:9). Lagary ro radopdo né láaca lo samblia ni rapdo noʼ caj né ni ná coʼ bidxiich lainyni labúu gony láani. Láaca labúu guixel buñ bidxiich por Internet ló jw.org. Casi pór buñ ni diti nap xiroʼ bidxiich raduidy láani, né nacyibu xomod gonaʼ viod ni goyoʼ ló govinn ni Jesús góoch que galán buny láani ni goloʼbu chop centab lainy caj ni goyoʼ lainy yoʼ xiroʼ (Lucas 21:1-4). Nitisi buñ labúu cué tiplad tidxo bidxiich par guiduidy scásiʼ «xomod goníbu lainy xcalnabanybu gonybu láani» (1 Corintios 16:2; 2 Corintios 9:7).

Nandxichdo que Jehová diti sasian guichiin buñ par guiduidy cós ni rasac ni nap par gacné dxiin ni cayac ló guidopynac Gudxlio né modreʼ guidxin gac ni goníbu (Proverbios 3:9).

• ¿Xí rony que religión ni nóono ló diti nacní xomod stipnés religión?

• ¿Ximod raquiinno bidxiich ni raduidyno scásiʼ?