1, 2. ¿Xí ranabdiitzno lóocano?

MBIOXIEN ranabdiitz xidal cós. Órni noʼ ni raibyno layibu, nimaca ranabdiitzyibu: «¿Xigony?». Órni rayopyno mod cuéxano ni canabdiitzyibu, ranabdiitzyibu stoib: «Né ¿xigony?».

² Ná nacno mbioxhlas o buñgol, guiráno ronyno galrranabdiitz. Sigory ranabdiitzno ximod guiguaʼno goxt né xfamilno, pu dzú gonyno galtzeʼel o xi sasaclono órni gacno buñgol. Órni diti radzelno ximod rarexani, sigory ma diti ronyno por guiyopyno láani.

3. ¿Xigony xidal buñ rony pensary que diti labúu sadzelyibu ximod rarexa galrranabdiitz ni ronyibu?

³ Xidal buñ ranabdiitzyibu cós ni rasac. Per diti ronyibu por guiyopyibu ximod rarexani. ¿Xigony? Tipnés buñ ná que ló la Biblia rarexa ni ranabdiitzyibu, per rasac naganyibu guienyibu láani. Sigory ronyibu pensary que nosi mextra né buñnan nan ximod rarexani. Né stipnés buñ diti ronyibu por guiyopyibu láani, portín ratoyibu guiniʼyibu que diti nanyibu. ¿Looy xí nálo?

4, 5. a) ¿Xí ranabdiitzlo looy? b) ¿Xigony non guiyopylo ximod rarexani?

⁴ Sigory dada looy ranabdiitzlo: «¿Xigony noʼno ló Gudxlio? ¿Xí racno órni raityno? ¿Ximod nac Dios?». Jesucristo góc toib galán mextra. Láabu goniʼbu: «Diti guisian guinabto né sacaʼto, diti guisian guiyopyto né sadzelto, diti guisian cannto puert né saxalni» (Mateo 7:7). Por ngú, diti guireʼganlo. Biyopy ximod rarexa ni canabdiitzlo dada gaplo confianz que scú nacni.

 ⁵ Pal rayopylo ximod rarexa ni canabdiitzlo, sadzelo láani ló la Biblia (Proverbios 2:1-5). Sadudylo cuent que diti nagan guieen buñ láani. Ni guisuidylo sacnéni looy par guibanylo goxt nigoreʼ. Láaca sadudyni looy toib esperanza sacróyen ló dzú ni sietra. Nigoreʼ guisuidyno toib galrranabdiitz ni ragoʼ buñ ló galrrasaʼ.

6. ¿Xigony xidal buñ rony pensary que Dios diti rioʼ galrrasaʼ por lóono?

⁶ Xidal buñ rony pensary que Dios diti rioʼ galrrasaʼ por lóono. Náyibu: «Pal ñoʼ Dios galrrasaʼ por lóono, gadzé mod nabanyno». Ló naareʼ guirá lad noʼ guerr, galrrianladx né galsii. Buñ raxoʼ, radudy ló galrrioʼob né raity. Por ngú, tipnésyibu ranabdiitz: «Pal nigolú rioʼ Dios galrrasaʼ por lóono, ¿xigony diti ranitlóbu guirá galrrioʼob reʼ?».

7. a) ¿Xigony xidal buñ rony pensary que Dios nacbu toib Dios mal? b) ¿Xigony nandxichno que Dios dipa napbu dool por guirá cós mal ni cayac?

⁷ Órni rac toib desgrasy, buñ ni rasanir ló religión raniʼ que ngú ni goniiny Dios. Raniʼyibu que Dios goniʼ gacni scú. Órni raniʼyibu modreʼ ragotzyibu dool Dios. Ndeʼ rony que xidal buñ rony pensary que Dios nac toib Dios mal. Per Dios dipa napbu dool por guirá cós mal ni cayac. ¿Xigony nandxichno que scú nacni? Portín la Biblia rasuidy que Dios diti ragoʼ prueby buñ né cós mal. Santiago 1:13 ná: «Ni toib buñ guiniʼ órni cadudy ló prueby: Dios cagoʼ naʼ ló prueby. Portín, né cós mal, ni toib buñ ragoʼbu Dios ló prueby nili Dios ragoʼbu prueby ni toib buñ». Dios radudybu lagary gac cós  mal, per láabu dipa ronybu láani (bíil Job 34:10-12). Guisetlano toib ejemplo ni gacné lóono.

8, 9. ¿Xí ejemplo raslooy que diti láani ngú guigotzno dool Dios por guirá galnagan ni radudyno ló?

⁸ Buny pensary de toib buñ ni ronladxgoluʼ xiin né rasuidybu xiimbu gac buñtzay. Órni mbiox reʼ rac buñgox, diti rasobdiitzbu bixiosbu né rieebu rilésbu stoib lagary. Mbioxhlas reʼ rasaló rony cós mal né radudybu ló galnagan. ¿Nálo que bixiosbu nap dool por guirá galnagan ni cadudybu ló portín bidudybu lagary xiimbu see la? Yaca (Lucas 15:11-13). Scúca, diti láani ngú guigotzno dool Dios por guirá galnagan ni cadudyno ló. Xomod bixios mbioxhlas ni ma bisetlano, Dios radudybu lagary que buñgudxlio gac nayaʼ né gony cós mal. Por ngú órni rac cós mal, guisetnaladxno que Dios diti ronybu láani.

⁹ Dios radudybu lagary gac cós mal, per noʼ razón por ni ronybu láani. Ló capítulo 11 sasuidylo xi ná la Biblia de tema reʼ. Per labúu gaplo confianz que Dios nadxiʼbu lóono né que dipa napbu dool de guirá galnagan ni noʼ. Nosi láabu sabeʼbu guirá galnagan reʼ (Isaías 33:2).

10. ¿Xigony labúu gapno confianz que Dios sanitlóbu guirá cós mal ni noʼ?

¹⁰ Dios nigolú nayaabu (Isaías 6:3). Guirá ni ronybu nayaani né natzayni. Por ngú labúu gapno confianz láabu. Per buñgudxlio diti nacyibu scú. Rioʼ ór, guiráno ronyno cós mal. Dada pal toib buñchiin naniiny ñony cós tzaay, diti napbu galnadip par cueʼbu guirá cós mal. Nosi Dios nap galnadip par gony láani. Por ngú, labúu gapno confianz que Dios labúu cueʼ láani né raniiny guinitlóbu guirá cós mal ni noʼ. Dios sanitló cós mal por tipzó (bíil Salmo 37:9-11).

11. ¿Ximod rasac Dios órni rabiʼbu lóono cadudyno ló galrrioʼob?

¹¹ ¿Ximod rasac Dios órni rabiʼbu guirá ni rac ló Gudxlio né galnagan ni cadudyno ló? La Biblia rasuidy que Dios rioladxbu gac xinésni (Salmo 37:28). Láabu cadxichbu cuidad cós tzaay né cós mal ni cayac. Nigolú rioʼobni láabu órni rabiʼbu cadudyno ló galrrioʼob. La Biblia ná que «nigolú bioʼob xcalnabanybu» órni ló Gudxlio goyogoluʼ cós mal (Génesis 6:5, 6). Né Dios diti ma bitzaʼ mod nac (Malaquías 3:6). La Biblia ná que Dios nigolú rioʼ galrrasaʼ por lóono (bíil 1 Pedro 5:7).

12, 13. a) ¿Xigony nadxiʼno buñ? b) ¿Ximod rasacno órni rabiʼno guirá galrrioʼob ni noʼ ló Gudxlio? c) ¿Xigony labúu gapno confianz que Dios sanitlóbu guirá galrrioʼob né cós mal?

¹² La Biblia láaca ná que Dios bisaʼbu lóono xomod nacbu (Génesis 1:26). Ndeʼ radudy diitz que Dios bisaʼ lóono né cualidades ni napbu. Por ejemplo, la Biblia rasuidy lóono que «Dios ngú galnadxiʼ» (1 Juan 4:8). Dios rony guirá cós portín napbu galnadxiʼ. Lóono nadxiʼno portín Dios nap galnadxiʼ. Por ngú, pal rioʼobni lóono órni rabiʼno buñ ni diti nap dool cadudy ló galrrioʼob, más rioʼobni Dios.

¹³ Buny pensary ló ndeʼ: pal ñaplo galnadip par nanitlólo galrrioʼob né cós mal ni rac ló Gudxlio, ¿ñonylo láani la? Scú pue, portín nadxiʼlo buñ. ¿Né Dios ga? Sanitlóbu guirá cós mal portín nadxiʼbu lóono né napbu galnadip par gonybu láani. Labúu gaplo confianz que guirá ni ritlaa ro rasaló libro reʼ sac cumplirni. Per par labúu gapno confianz ló ni ma goniʼ Dios gony, non guimbutzaayno láabu.

14. ¿Ximod laa Dios, né xigony nanno que raniiny láabu guiquiinno laabu?

¹⁴ Órni nainy guidzaklo toib buñ, ¿xí raibylo láabu? Raibylo láabu ximod laalo. ¿Né Dios ga? ¿Noʼ laabu la? Xidal religión ná que laabu Dios o Señor, per ndeʼ diti nacni laa buñ. Nacni títulos, xomod rey o president. Dios raiby lóono que laabu Jehová. La Biblia ná: «Par gan buñ que laalo ngú Jehová, nosi looy ngú ni noʼ más Guiaʼ ló guidopynac gudxlio» (Salmo 83:18 [82:19 ló tipnés biblias]). Dios raniiny ganno ximod laabu né guiquiinno laabu. ¿Xigony nanno láani? Portín buñ ni bicaʼ la Biblia biquiinyibu láani xidal mil buelt (Éxodo 3:15; 6:3). Dios raiby lóono ximod laabu par labúu gacno ximigbu.

15. ¿Xí radudy diitz laa Jehová?

¹⁵ Mod rarexa laa Jehová nigolú rasacni. Radudyni diitz que sony cumplirbu guirá ni ma goniʼbu né sonybu guirá ni caa guicbu. Diti noʼ chú racaa láabu. Nosi Jehová non gac laa modreʼ. *

16, 17. a) ¿Xí radudy diitz que Jehová «nap Xiroʼgolu galnadip»? b) ¿Xí radudy diitz que Jehová nac «Rey ni noʼ por tipzó»? c) ¿Xigony ná la Biblia que Jehová Bisaʼ guirá cós?

 ¹⁶ Mod ma bisetlano, Salmo 83:18 raniʼni de Jehová: «Nosi looy ngú ni noʼ más Guiaʼ». La Biblia raquiin stipnés títulos par gaibyni lóono ximod nac Jehová. Por ejemplo, Apocalipsis 15:3 ná: «Nirodann né sacrodiguieʼ nac guirá ni bisaʼlo, Jehová Dios, ni nap Xiroʼgolu galnadip». ¿Xí radudy diitz órni náni que Jehová «nap Xiroʼgolu galnadip»? Radudyni diitz que diti noʼ stoib ni más nadip xomod láabu. Né 1 Timoteo 1:17  náni que Jehová nac «Rey ni noʼ por tipzó». Ndeʼ radudy diitz que dada nírcu maca noʼbu. Láaca, Salmo 90:2 rabexa que dipa sadxin dzú saitybu. ¿Nigolú radziguiaʼno mod nac Dios ja?

¹⁷ La Biblia láaca rasuidyni lóono que nosi Jehová Bisaʼ guirá ni noʼ. Apocalipsis 4:11 ná: «Nosi looy non gonyxiroʼdo, gapdo respet né guicaʼlo galnadip, portín looy bisaʼlo guirá cós, né por ni goniiny looy goyoʼni né goyaʼni». Scú láani, Jehová bisaʼ guirá ni noʼ: desde ángeles né vitzón ni caa lainy guibá dada beel ni noʼ lainy nisdaʼ né cuánnax.

18. a) ¿Xigony tipnés buñ rony pensary que diti labúu sacbu ximig Dios? b) Per ¿xí ná la Biblia?

¹⁸ Tipnés buñ moda radzuiby órni ranyibu ximod  nac Jehová. Ronyibu pensary que Dios nap xiroʼgolu galnadip, nirodanbu né nigolú sit noʼbu de lóono por ngú diti rioʼbu galrrasaʼ por lóono. Per Dios diti raniiny guisacno modreʼ. Raniiny láabu gacbu ximigno. La Biblia ná que Dios «diti noʼbu sit de cada toibno» (Hechos 17:27). Dios raniiny guimbulo láabu. Pal ronylo láani, Dios radudy xtiitz que «sabigaxbu ronoʼlo» né sacbu ximiglo (Santiago 4:8).

19. a) ¿Xí labúu gonylo par gaclo ximig Dios? b) ¿Xí cualidad ni nap Jehová rioladxlo más?

¹⁹ ¿Xí labúu gonylo par gaclo ximig Dios? Jesús cuapy galrranabdiitz reʼ órni goniʼbu: «Ndeʼ radudy diitz guibany buñ tipzó: que guimbuyibu looy, toibguielot Dios ni nigolú, né guimbuyibu xiinlo Jesucristo ni bixelo» (Juan 17:3). Pal ronylo xtem por guisuidylo más de Jehová né de Jesús, simbutzaaylo layibu né saclo ximigyibu. Láaca, labúu sabanylo tipzó. Dada reʼ, ma bisuidylo que «Dios ngú galnadxiʼ» (1 Juan 4:16). Per láaca napbu stipnés cualidades. La Biblia rasuidy que Jehová nacbu «toib Dios ni nap galrronladx né ni rien xi rasac buñ, ni nap paseins né ni nap galnadxiʼ ni diti radzaʼ né toib Dios ni nigolú» (Éxodo 34:6). Láaca náni que Jehová natzaaybu né puextca noʼbu par guitudybu xcalkié buñ scásiʼ (Salmo 86:5). Dios láaca nacbu toib Dios paseins né dipa raslaʼñabu buñ (2 Pedro 3:9; Apocalipsis 15:4). Laʼga guisuidylo la Biblia, sasuidylo más xi cualidades sacróyen nap Dios.

20, 21. ¿Ximod labúu gaclo ximig Dios janlo diti labúu rabiʼlo láabu la?

²⁰ ¿Ximod labúu gaclo ximig Dios janlo diti labúu rabiʼlo láabu la? (Juan 1:18; 4:24; 1 Timoteo  1:17). Órniʼ goʼol lo la Biblia, sadudylo cuent que Jehová nabany (Salmo 27:4; Romanos 1:20). Laʼga más guisuidylo de Jehová, más sandxiʼlo né más sabigaxlo láabu.

²¹ Sasuidylo que Jehová nacbu Bixiosno ni ronladx lóono (Mateo 6:9). Por láabu nabanyno né nainy láabu tzeeni lóono galán. Ngú ni raniiny toib buñ par xiin (Salmo 36:9). La Biblia rasuidy que looy labúu gaclo ximig Jehová (Santiago 2:23). Bunysi pensary, Dios ni bisaʼ guidopynac guibá né Gudxlio raniiny láabu gaclo ximigbu.

22. Sigory, ¿xí labúu gony tipnés buñ órni guibiʼyibu que looy ma casuidylo la Biblia?

²² Sigory tipnés buñ guiniiny que looy guisianlo guisuidylo la Biblia. Sigory rioʼyibu galrrasaʼ gaclo de stoib religión. Per diti guidudylo lagary que ni toib buñ guicaa looy gaclo ximig Jehová. Dios ngú ni más galán gac ximiglo.

23, 24. a) ¿Xigony diti guiañ guinabdiitzno? b) ¿Xí guisuidyno ló capítulo ni sieed?

²³ Órni goʼol lo la Biblia sioʼ tipnés cós ni diti sienlo. Pal diti cayenlo ni casuidylo, buny galrranabdiitz né gonab xcalrracné stipnés. Jesús goniʼ que raquiin gacno buñdxo xomod mbiox. Mod bisetlano ro rasaló capítulo reʼ, mbioxien ranabdiitz xidal cós (Mateo 18:2-4). Dios raniiny guidzelo ximod rarexa galrranabdiitz ni naplo. Por ngú, bisuidytzay la Biblia né cuá cuidad que ni casuidylo nigolúni (bíil Hechos 17:11).

²⁴ Par guimbutzaayno Jehová non golno la Biblia. Ló capítulo ni sieed sasuidyno xigony diti noʼ stoib libro xomod la Biblia.