Gobierno xtuny Dios nacní toib Gobierno ni noʼ guibá. Sioʼni xalagary guirá gobierno ni noʼ ló Gudxlio, né sonyni ni ná Dios lainy guibá né ló Gudxlio. Diitz sacró ni raniʼ de Gobierno xtuny Dios galán láani. Gobierno reʼ saduidyni ni buñ caquiin. Ndeʼ sony que guirá buñ guiguaʼ toibsi. Bíil Daniel 2:44; Mateo 6:9, 10; 24:14.

Toib gobierno non gap toib ni gony mandary. Jehová ma golúbu Jesucristo par gony Mandary ló Gobierno xtunybu. Bíil Revelación 11:15.

Xiin Dios sony Mandary galán portín natzaaybu, ronybu xinésni, né napbu xiroʼ galnadip par gacnébu buñ. (Juan 1:14) Jesús sony Mandary Gudxlio desde lainy guibá. Órni biásbu lad gueʼet, bibiguetbu guibá né gorúbu golésbu ladbuʼ Dios. (Hebreos 10:12, 13) Bidxin midid, Dios biduidy láabu galnadip par saló gony mandarybu. Bíil Daniel 7:13, 14.

Tidxo buñ ni rareʼ laa, buñ ni «nayaa» gony mandaryibu lainy guibá né Jesús. (Daniel 7:27) Buñ ni primerdiguieʼ góc buñ nayaa Dios golú layibu né bidxin gocyibu xpiin Jesús. Ló naareʼ Jehová láaca cabú buñguieeu né buñgonaʼ ni nac buñ nayaa ni rony ni nábu. Xomodca Jesús layibu láaca riásyibu lad gueʼet né radxiinyibu racyibu xomod ángeles. Bíil Juan 14:1-3; 1 Corintios 15:42-44.

 ¿Balac buñ guié guibá? Jesús goleʼ laayibu «tidxo xiil.» (Lucas 12:32) Guidxin midid gacyibu 144,000. Layibu gony mandaryibu né Jesús desde guibá ló Gudxlio. Bíil Revelación 14:1.

Jesús gosaló buny Mandary lainy guibá íz 1914. * Ni nirdiguié buny Jesús ngú bilitbu Buñdzab né guirá xidemony ló Gudxlio. Buñdzab bidzuitzgulu né gosaló goloʼ xiroʼ galnagan ló guidopynac Gudxlio. (Revelación 12:7-10, 12) Dada dzúcu gosaló góc xiroʼgolu galnagan ni nap buñgudxlio. Guerr, galrralán, xo rodann né galguitz ni ragaity xidalguixo buñ ndeʼ nacní «señal» que mápa mer guiránac ni noʼ ló Gudxlio siaʼanni ladxña Gobierno xtuny Dios. Bíil Lucas 21:7, 10, 11, 31.

Buñ ni cacanal Jesús caniʼyibu xtiitz Dios ló guidopynac Gudxlio, modreʼ Gobierno xtuny Dios catop xidalguixo buñ de xidal gudx. Xidalguixo buñ ni natzaay xcalrrien cayoʼyibu ló xomandary Jesús. Gobierno xtuny Dios sann layibu órni guinitló gudxliogoxreʼ. Por ngú guirá ni rioladx que Gobierno reʼ gacné layibu, guisuidyibu gacyibu buñ ni rasob a Jesús. Bíil Revelación 7:9, 14, 16, 17.

Por tipmil íz, Gobierno xtuny Dios sonyni guirá ni goniiny Dios ñac dzú bisaʼbu buñgudxlio. Guidopynac Gudxlio sadxin sac toib lagary móz. Sadxin midid, Jesús gonycuent Gobierno reʼ Bixios. (1 Corintios 15:24-26) ¿Rimbulo toib buñ ni raniiny guiniʼ de Gobierno reʼ la? Bíil Salmo 37:10, 11, 29.