SANTIAGO né Judas gocyibu buch Jesús, Pedro né Juan gocyibu xpiin Jesús. Tap buñguieeu reʼ bicaʼyibu tap guiich ni sieed ló Escrituras Griegas Cristianas, cada guiich reʼ riné laa ni bicaʼ láani. Bicaʼyibu guiich reʼ par gacnéyibu herman par diti guisianyibu Jehová né gapyibu confianz ló Gobierno xtuny Dios.

Herman guislooy que nap fe. Diti nosi guinino que napno fe, raquiin guislooyno que napno láani. Xomod ná Santiago, «fe pal diti noʼ ni ronyni ma goityni» (Santiago 2:26). Órni buñ radudy ló galnagan, ndeʼ rony que fe ni napbu rac nadipni. Láaca buñ labúu guinab xcalnan Dios né gapyibu confianz que sacaʼyibu láani. Pal diti ralsitno de Jehová láabu sacacuentbu lóono (Santiago 1:2-6, 12). Dios rasaguel racné órni buñ diti rasian láabu. Por ngú Santiago bicaʼ: «Colguibig ronoʼ Dios, né láabu sabigbu ronoʼto» (Santiago 4:8).

Cristianos non cueʼyibu tiplad guirá cós mal né cós yox. Judas ni bibany ro goyoʼ xiroʼgolu galyoxh goniʼbu que fe xtunyno gac nadipni (Judas 3).

Cristianos non guibanyibu xomod rony mandary Dios. Jehová ranab que ni rony adorar láabu gac buñ nigolú nayaa. Pedro bicaʼ diitzreʼ: «Colgac nigolú nayaa ló guirá mod ni ronyto, portín caani: Lóoto non gacto nigolú nayaa, portín naʼ naca nigolú nayaa» (1 Pedro 1:15, 16). Par labúu gonyno ndeʼ raquiin guisuʼno Cristo, Pedro bicaʼ diitzreʼ: «Bisiambu toib mod galán par guicaato cuidad guicanalto raxtñeʼbu» (1 Pedro 2:21). Rioʼ ór nagan guisobno ni ná Dios per ni más rasac gapno, láani ngú toib «galrrien nayaa» (1 Pedro 3:16, 17). Pedro rasetlaa que nigolú rasac gapno toib galrrien nayaa né guislooyno que noʼno xilad Dios laʼga cabésno xtzú rodann Dios né toib Gudxlio móz «ro guirá buñ gony xinésni» (2 Pedro 3:11-13).

Buñ guislooy galnadxiʼ. Juan bisetlaa que «Dios ngú galnadxiʼ». Jehová bislooy balaati ronladxbu lóono órni bixelbu xiimbu goity por lóono «par tudy xcalkiéno scásiʼ». ¿Xí guichiin ndeʼ lóono gonyno? Juan rabexa: «Lóoto ximiga, pal Dios gondxiʼ lóono, láaca scúca non gandxiʼno saʼno.» (1 Juan 4:8-11). Toib mod ni gandxiʼno xhermanno ngú cobiono láabu (3 Juan 5-8).

¿Ximod raslooyno que nadxiʼno Jehová? Juan racapy: «Ndeʼ nac mod rarexa galnadxiʼ ni napno Dios: guisobno ni rony mandarybu lóono; né, ná scú nacni, ni rony mandarybu diti naganni» (1 Juan 5:3; 2 Juan 6). Guirá ni rasob ni ná Dios nandxichyibu que Jehová sonladx layibu né sabanyibu tipzó (Judas 21).

(Bireʼni ló Santiago, 1 Pedro né 2 Pedro, 1 Juan, 2 Juan né 3 Juan né Judas.)