Ginihe Nga Bapatiza?
Gu Karagapai nga ga Baibiri
Bapatiza nga ka rindosi boro naabani gu ime yo na ki kusi ni yo. * Gipai re nasakapai tipa ndu gupai i abapatizi Yesu ti ni rogo gu di naima du ni kikiihe. (Matayo 3:13, 16) Wakina gure a, kumba ni boro Etiopia ho ko aida ka zio bapatiza ni “i ki zorõ ku ime yo ue, aFiripo na banyaki.”—Amokedi 8:36-40.
Gupai bapatiza arukubaha
Baibiri naringbisa bapatiza kuti kpisido boro. (ARomo 6:4; AKorosaio 2:12) Bapatizi boro ku ime yo nayugo gupai nga ni ima kpi fu gani kuru gene mangaapai na ni natona vovo gene raka ni gu Kristano naima kpara gani raka fu Mbori. Bapatiza gbiati agu adiandue nandu sa ni nga agu apai Mbori aidaha be boro tipa ni gbia gigiri sangba kpotose yo rii mburu gani idapase kuti ga Yesu Kristo motumo. (1 Petero 3:21) Rogo gi gene re, Yesu ayugu gupai nga gako abawiriki du wa ka i zi bapatiza.—Matayo 28:19, 20.
Ya mo pa bapatizi boro na ime nazunda ingapai kusayo?
Oó. Baibiri nayugo gupai nga ani rengbe ka du gigiri zanga ingapai sa kina mbiko gu kure Yesu nauka. (ARomo 5:8, 9; 1 Yoane 1:7) Ono tie, tipa ka gbia undo ti ga Yesu motumo, boro du wa ka ni idipa Yesu, ki aria gani gene raka ka raka ringbisihe kuti ga Yesu ayugopai, na ki zi bapatiza.—Amokedi 2:38; 3:19.
Ya mo Baibiri nayugo gupai nga i bapatizi fogo gude?
Oó, gu yugopai re rogo Baibiri yo te. Gu kura akanisa namanga apumbo nga ga irisombori nga gu i “abapatiza” agude ti regbo ho (ni uka yo ime kuriru yo watadu ka migido ime kuriru yo) na ki fu vovo rimo furu.
Gu bapatiza nga ga aKristano si tipa agu aboro naima nyaka ki rugutiyo na pai na ki idi kuti “wene pangbanga tipa ga Mbori ngbi” watadu Kindo. (Amokedi 8:12) Si na ngbanya dagbaha nagia ga Mbori pai, ki dihe kugume, na ki saberã, nga agu apai fogo agude arengbanga ka mangaha ya.—Amokedi 2:22, 38, 41.
Kurii gure, Mbori nayugo gupai nga Mbori nabi gu rukutu agude nga awiri aKristano nga i ni ziazia yo watadu ni gigiri yo bangiriko mbiko ga avunguyo du niruruse. (1 AKorindo 7:14) Ka si nidu nga bapatizi fogo agude nga gupai Mbori naima ida na ni, ka si idinga ga avunguyo du niruruse sayo i du ni ziazia yo bangiri Mbori te. *
Iraira bipai tipa gu bapatiza nga ga aKristano
Iraira bipai: Uka ime rii boro watadu ka migido rini na ime nga gu kura gene naima rẽ kupati gu nga ga rindosi ni dunduko ku ime yo.
Rengo: Agu abapatiza dunduko Baibiri nafura tipaha aakoda rindosi boro ku ime yo. Ni kpiapai, ho gu bawiriki nangia Firipo abapatiza gu kumba ni nangia boro Etiopia, “i ki zorõ ku ime yo” tipa ko bapatizi ko. Tingbafuo ho, ‘i akuru ime yo.’—Amokedi 8:36-39. *
Iraira bipai: Tiiworo agu apai du rogo Baibiri nayugoho nga fogo agude adu kina dagba agu aboro nazi bapatiza ho aborokporo dunduko azi bapatiza ni. Ni kpiapai, si nape gupai tipa gu babanda bambukiso nadu Firipoi yo nga: “I ki bapatizi ko, na gako aboro dunduko.”—Amokedi 16:31-34.
Rengo: Gu pangbanga du tipa wai babanda bambukiso asa berãko nayugo gupai nga agu aboro i abapatizi yo aima rugatiyo na gupai nga ga “Gbia” watadu Yekova na “rago ki ngba angba” tiyo ni bakerehe gbe. (Amokedi 16:32, 34) Agu arengo re nandu kuti gu digisopai nga ai gu fogo gude narengbe kadu kua gu babanda bambukiso yo re aarengbanga kadu dagba agu aboro yo nazi bapatiza te mbiko i aarengbanga ka rugatiyo na fugo Yekova te.
Iraira bipai: Yesu ape gupai nga si naida aida i bapatiza fogo agude ho ko aya ni wẽ avuru ga Mbori ngbi watadu Kindo nga yo.—Matayo 19:13-15; Marako 10:13-16.
Rengo: Yesu aafuranga tipa bapatiza ho ko ape agu fugo re ni te. Kuba gure, ko aayugo gupai nga agu aboro rẽ tipa ga Mbori Kindo i du wa ka i du wa rukutu agude—ni airazerangbaduse na ni agu boro duhe taata i yugupai fuyo.—Matayo 18:4; Ruka 18:16, 17.
^ par. 1 Gu fugo Giriki i nasaha nga “bapatiza” i adihe rogo gu fugo du rogoyo nga “ka rindosi he.” Mo bi Theological Dictionary of the New Testament, Volume I, kpewaraga 529.
^ par. 6 Ringbisihe kuti gu Encyclopedia nga: The International Standard Bible, “ba ho rogo Vo[vo] Ndi[ko] tipa gu bapatiza nga ga rukutu agude te.” Si gumba gupai a nga gu mangapai re atona ka sona mbiko “gu iraira bipai gbiati durugopai aboro adu na ni tipa nyakapa bapatiza,” nga bapatiza nitihe nazunga ingapai kusayo.—Volume 1, kpewaraga 416-417.
^ par. 8 Tii gu riipai nga “Bapatiza (rogo Baibiri yo),” gu buku nga New Catholic Encyclopedia naya: “Goapai nayugoho nga rogo agu akanisa nadu bakuru kusayo i anaabapatizi boro ni rindosi yo ni kutii ime yo.”—Volume 2, kpewaraga 59.
Gere Ima Rengba a ka Ngba Tiro
AGU ASANAHE BAIBIRI AKARAGAPAI KUTI NI
Ya Mo Apambori Dunduko Kina Sa? Ya Mo Si Nandu Dunduko Koyo du Mbori Ni?
Bangua arengo ue Baibiri afuhe nafu karagapai.
AGU AYUGOPAI NGA GA BAIBIRI
Mo Asadingo Wai Ani Wisigo Baibiri na Aboro
Mo wiriki Baibiri gbua zanga tumo tipaha na gu undo nga ga bayugupai.