Ga Mbori Kindo nga ndikidi zogarago Yekova Mbori asigiraha. I nayamba “ga Mbori ngbi” watadu ga Mbori Kindo a nga “gu ngbi nga ga ngbangbaturũ” rogo Ziazia Kekeapai yo, mbiko si nazogarago ngbangbaturũ yo. (Marako 1:14, 15; Matayo 4:17, King James Version) Badungu apai tipaha wakina gu du tipa gu zogarago nga ga aboro, ono si ngba kisusihe ngba agene dunduko.

• Abazogo. Mbori ima sia Yesu tipa ko du ni bakindo ga Mbori Kindo na ki fu bakere pagbia fuko kisusi ai gu rengbe gu bazogo nga wiri boro ka du na ni. (Matayo 28:18) Yesu namangasunge na gu ome du beko ngba wene gene, wa duhe nga ko aima yugoho nga ko nga gu bangbembatayo du na nunga tiko na rengbe aboro ka kido kutini. (Matayo 4:23; Marako 1:40, 41; 6:31-34; Ruka 7:11-17) Tiibe gu rugahe nga ga Mbori, Yesu ima sia aboro rogo angbatunga dunduko tipa i ‘zogorago ku auru kpotosende’ na ko ngbangbaturũ yo.—Yugoti 5:9, 10.

• Bagiza regbo. Ga Mbori Kindo wa gu zogarago nga ga wiri aboro nata ye kini go kusayo te, ‘i agbárasa nga ha wa sa te.’—Daniere 2:44.

• Azogo. Ai gu boro namanga gupai Mbori akpinyemuhe ima rengba ka raka tiibe ga Mbori Kindo zanga bipa ngbatunga ni watadu gu ba i avungu ni rogoho.—Amokedi 10:34, 35.

• ANdiko. Agu aNdiko nga ga ga Mbori Kindo azanga he gbua kina ti gbegberẽ mangaapai te. Si nambakada gu sino mangaapai nga ga gaha azogo. Ni kpiapai, Ziazia Kekeapai naya: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ. Gu rugute nga bakumba ha susi si nga gere. Kura ha wa kina ha nga gere, nga, Mo nikpí nyemu kuaro wa mo akpi nyemu tiro.” (Matayo 22:37-39) Nyemuse tipa Mbori na tipa amurakporo nasa agu azogo nga ga ga Mbori Kindo i mangipai tipa gu undo nga ga kura aboro.

• Yugopai. Wa vura duhe nga ga Mbori Kindo namaa arugute fu gaha azogo, si nayugopai ayugo a fuyo tipa wai kaa mangapai kuti agu arugute re.—Yesaya 48:17, 18.

• Gupai si amangaha. Ga Mbori Kindo asanga gaha abazogo i kumuko rii ngongo gaha azogo te. Kuba gure, si nika manga gupai Mbori akpinyemuhe, kodihe na gu kidohe nga agu aboro nakpinyemuko nika raka nyeanye kindi rogo paradizo auru kpotosende.—Yesaya 35:1, 5, 6; Matayo 6:10; Yugoti 21:1-4.