Wirina nga Barbara Osmyk-Urban, nga nagude naraka Rzeszów yo, Poland yo namangasunge na gu regbo du tipa Gu Irisombori Nga ga Aborokporo tipa ka yugopai fu awiiri tipa wai rengbe yo kadu ni aboro gamahe na ni aboro nunga, garã guko nga Jakub nga bawe, na garã guri nga Nina kidu nga muambe. Agi aborokporo re namanga agi apai i awirikaha re kurogo mangimangipai yo. I di awirina kpuyo yo niima susa 20 wa vura atona Ukraine yo rogo Wegebe 24, 2022.

Ho awirina aora ni vuru Ukraine kusayo mbiko vura kurogo agu aba du ni zezeredihe, agu aDezire Yekova du Poland yo na rogo gu kura aringara nadia yo kugume ku rogo akpuyo watadu kini futiyo tipa ka undo rogo kura agene. Ka da ku awere, bange aDezire Yekova nga 11,000 Ukraine yo oro ku Poland yo. Mbiko vura, agu akumba nga aboro Ukraine du garãyo nga 18 kuti 60, i aidanga ha fuyo tipa i kuru kusayo rogo ringara te. Ono tie, agu akumba du na rukutu agude kandara biata i aidaha fuyo i kuru kusayo vuru ringara.

Barbara aya, “Agi aboro zubo Ukraine yo re nga gaani aborokporo nga ga toro yo.” Awiiri a ima kpinyemu agu awirina nazoro kporo yo. Jakub na Nina adu na ngbarago kambu gayo bambu kaa ra bani tipa wa ka awirina aara rogo gayo bambu. Mbiko gupai nga i arengbanga ka fura dagbayo te mbiko agu afugo i apehe si kia, i nafura dagbayo gbua ni moma tingba, ka dungotise, na ka kpara. Ho agi aboro naazubo be vura re aguari ni ni yangadaha, Jakub aya rago ongo kporo nga kii na ko asana nako singia i rengbe ka dia kura dungu awirina ku kpuyo.

Agu awirina nga Łukasz Cholewiński na Rafał Jankowski afu tiyo ka tinda riahe, ime, dawa, na gu kura nyanyakipa ahe ku Ukraine yo. Agu awirina re asakipa wai i abi bakere badona nga ga adee na agude nga aguyo nakpara wa i asungudo ka susa ti ngbandarago ku rogo gu ba du ni zezeredihe. Łukasz aya: “Gupai ngba gbe nga, ho ani agbia tirani ni na awirinarani, i nadu na ngbarago.”

Nduge ku Ukraine yo na ki ga rengbe ka dia asaa dunduko biama. Barasa kindi gu undo re ada, agu awirina du Ukraine yo nakparaka agu ahe re rogo ringara naabaha. Badungu awirina nafu tiyo tipa ka ndu agi anunguro re ku Ukraine yo si ki vura du nga i ima rengba ka gbia tiyo na kerepai vurũ. Rafał aya, “Si nga bakere pa irisa na momu tipa ka undo.”

Wirina nga Elżbieta Ustrzycka, naraka Rzeszów yo, nasakapa gu ngbarago ri adu na ni tipa ka dia agu aDezire Yekova naye Ukrainian yo ku kpuri, ri aya: “Mi aima bi gu bakere nyemuse na nunga naadu ti agu abaakumba du rogo gimi dungurati ho i aye ni na agu aborokporo re agude nira ara beyo bebere yuru. Gipai re agumbanga go rire yo te.”

Wiriba Bartłomiej Figura nga boro sa dagba agu abaakumba yo re namangasunge kakaka. Ko gbiati diako nga, Estera, nandu kuti ngbandarago yo watadu ba agatara tipa kaa tinda awirina kurogo gu ba du ni zezeredihe. Ti kura aregbo, agi arogotise re naagbata ba nga gu rengbe yo ka sungo rogoho tipa ka mbu kpuyo awirina sungu rogoyo. Ho du rengba ni beyo, i nafu aũborose afu a tipa ka songoda awirinayo na ni.

Bartłomiej aya, “Ani nga aborokporo sa nga ga toro yo.” Ani nabi tirani nga ani mbembedi gbe na awirinarani. Ho ani aundo kura aboro ni, ani nabi wai abi Yekova afu kina boro agu ahe du awirinarani na zingoho.”

Da ku awere, agu awirinarani nga aboro Poland, ima mbakada ahe ku vuru akorotoni yo du bangehe nga 23,000 nga gu nakoda riahe, na gu kura nyanyakipa ahe.

Ani na gu kido nga Yekova nikaa ndu kindi kumbatayo kaa ngerafuo agu azingo nga ga agu awirinarani du Ukraine yo wa akurayo airisimbori nikaa gamahe fuyo esuesu.—Asanza 11:24; ARomo 12:13.