Rogo Merekoko 19, 2022, gu riigbu nga ga Yu-eni (United Nations Security Council) amangi rondo na kikindigi pa aboro 75 na i ape gupai nga “zingo riahe ima duho rogo zegino dunduko mbiko gu ririkaza nga Korona na wai rago asakatihe, na si nagberã kina kumbatayo rogo zegino dũ na si nangera wa ngbongi nika manga amanga rogo kura aba.” Gu magazini nga, The Economist ape gupai nga “mbiko vura, gi zegino naima du na akpakarapai rogoyo re, nika du na dungu aboro nika koba be gomoro.” Baibiri aima pe gupai nga gu ngbatunga zingo riahe re nika manga amanga ti gaani regbo, ono tie, si aima pepa gupai a rengbe ka undo rani ani dibehe.

•    Yesu ape gu sangbaanebi nga: ‘Rika aboro azínga kuti gu rika aboro, ngbi ki zingi kuti gu ngbi; angbongi nikadu.’—Matayo 24:7.

•    Gu kitabu nga ga Ziazia kekeapai nga Yugoti nafura tipa akumba biama naora ri afarasi na i naru kuba kurapai. Gu ni sa dagba agu akumba naora rii afarasi re naru kuba vura. Gu ko ngbe tifuo ko naru kuba ngbongi, nga gu regbo si nika du ni kpakarakpakaraha tipa ka gbia riahe na i nikaa bagaha fu aboro na bakere marã. “Mi ki bi farasi ni bibiri ru; ringbisahe ki du be gu ko nasungu auru ru. Mi ki gi he wa ka fugo poi . . . niya, ‘Moduka zendehe wa mapunga sa tipa rukutu marã feda sa, amoduka morũ biata tipa rukutu marã feda sa.’”—Yugoti 6:5, 6.

 Gi sangbaanebi nga ga Baibiri du tipa zingo riahe re nadigisotihe awere ti gu regbo Baibiri ayambaha nga “kusa rago.” (2 Timoteo 3:1) Tipa ka wirikapai tipa “kusa arago” na agu akumba biama naora ri afarasi nga aguyo du pa yo rogo Yugoti, mo bi gu vidio nga The World Has Changed Since 1914 na mo gedi gu kekepai nga “Abandurii Afarasi Biama—Ada Nga Yo?”

•    Baibiri na wene arugute rogoyo nga gu rengbe ka undo rani ani dibe kpakarapai, kodihe na kio gino ariahe watadu zingo riahe. Mo bi bete akpiapai rogo gu kekeapai nga “How to Live on Less.”

•    Baibiri nafu maabangirise furani nga apai nika ngbaangba. Si nape pa gu regbo ‘zende ahe nika zuko rogo ringara kpaima’ na aboro dunduko nika du na riahe kpaima tipa ka rihe. (Atambuahe 72:16) Tipa ka wirikapai tipa gu maabangirise Baibiri afuhe tipa kumbatayo na ndu gupai rengbe mo ka kido ti ni kutini, mo gedi gu kekeapai nga “A Real Hope for a Better Tomorrow.”