ROGO zegino dunduko apambori—wa ga gu Kanisa Nga ga Katoriko Nga ga aRomo, agu aboro kanisa nga ga Orthodox, aBuddhist, gbiati agu akuraha—aidangaha fu gayo abarumbatayo rogo pambori i mangi rogatise te. Ono tie, dungu aboro nabihe nga gi mangapai nga ga kodaba re nakio awere dagba agu abarumbatayo du rogo dungu apambori.

Si ru aru tie mo sanahe nga, Ya mo zanga manga rogatise nga gu pai Ziazia Kekeapai aidaha fu aKristano? Tipa ka gbia karagapai kuti gi sanahe re, ani wisigingo pai tipa wai gipai re atona na pa wai si atona ka sona, gbiati ga Mbori bipai tipa gipai re.

Gupai Papa Benedict XVI agumbaha fu agu aboro Curia du Romo yo rogo 2006, adu tipa gu ndiko nga ga zanga manga rogatise “nga gu sino naadu bakuru kusayo mbembedi kuti regbo amokedi.”

Ono tie, gupai nga ga zanga manga rogatise aadunga rogo gu pambori naadu rogo bambata sa kama agarã te. Nirengo, gu mokedi nangia Pauro naraki rogo bambata kama agarã, afu zahe tipa agu aidipase nangia “airanangahe” gbiati pa “ka na pa roga ade.”—1 Timoteo 4:1-3.

Kina tifuo ue kama agarã gipai nga ga zanga manga rogatise re atona ka rimo ku rogo gu pambori nga ga “aKristano” nga gu naye ka kusa gu Kanisa Nga ga Katoriko Nga ga aRomo. Ni bi gupai du rogo gu buku nga Celibacy and Religious Traditions, gipai re “aanyakasa pa kina gupai nga ga pa zanga kodaba nga gu naima kio rogo gu Bariwara Ngbii Nga ga ARomo.”

Vuru gu kama agarã nangbe tifuoho, rondo nga ga akanisa, gbiati aguyo i niya tiyo Abarani nga ga Kanisa aanyakasa gipai nga ga zanga manga rogatise re rogo dungu aba. I aaberã gupai nga, manga kodaba angia pa wasiro, na ka si asanga yo i rẽ tipa  agu asunge nga ga kanisa ya. Wa si avura duwo, gu buku nga Encyclopædia Britannica ape gupai nga, “bara ti digido 10 kama agarã, dungu abavugahe gbiati abisopu adu na kina adiayo ti ni.”

I aru ndiko tipa zanga manga rogatise ti regbo ga Lateran rondo naadu bangbanda 1123 na 1139, nga gu i amangihe Roma yo, na gere nga gupai gu Kanisa Nga ga Katoriko Nga ga aRomo aka kuti ni dakuti gi regbo re. Mbiko mangayo gipai re, kanisa abanda agu ahe na marã naagberã ho si ani du ni nga bavugahe mangi rogatise kini kpinyemu agu ahe nga ga kanisa tipa awirini.

Ga Mbori bipai tipa zanga manga rogatise ni yuguyuguhe rogo Fugoko yo nga Ziazia Kekeapai. Rogoho yo, ani nageda afugo Yesu tipa agu aboro nanye zanga manga rogatise wakina ko, “tipa gu ngbi nga ga ngbangbaturũ.” (Matayo 19:12) Ni bi kina gipai re, gu mokedi nangia Pauro afura tipa aKristano nga aguyo nasia ka pekafuo gako kpiapai nga ka du ni bakuparanga “mbiko wene pangbanga.”—1 AKorindo 7:37, 38; 9:23.

Wa si avura duwo, aYesu na Pauro aazinangahe fu abamangisunge fu Mbori tipa i mbu manga rogatise te. Yesu agumba gupai nga, pa zanga diadee nga guhe du fu “kina agu yo fu yo pa dia ha fu yo” angianga fu apefuoko dunduko ya. Ho Pauro akepai ni tipa “ngasu ade,” ko agumba gupai Ziazia nga: “Rugute be re yo du Gbia ni te. Mi nafu gi berã.”—Matayo 19:11; 1 AKorindo 7:25.

Kurigure, Ziazia Kekeapai nayugo gupai nga, dungu abamangisunge fu Mbori ni aKristano naadu rogo bambata kama agarã kodihe na gu mokedi nangia Petero angia arogotise. (Matayo 8:14; Marako 1:29-31; 1 AKorindo 9:5) Nirengo, nibipa wai gu wasiwasi mangaapai nga ga kodaba aakio rogo gu ngbii nga ga aRomo ti gu regbo re, Pauro ake gupai nga, ka sidu nga gu Kristano nga babiapai namanga rogatise, si naida ko du “ni kumba ku de sa” na “nizogo awirini.”—1 Timoteo 3:2, 4.

Si aadunga nga gi rogatise re nika du zanga manga kodaba te, mbiko Ziazia Kekeapai nagumbaha ziazia nga “Kumba [ni] mangi gu pai ru fu diako” na ka arogotise “ka nga fu gu ni” tipa nyemu kodaba ya. (1 AKorindo 7:3-5) Si tie ziazia nga, zanga manga rogatise nga gupai Mbori akpinyemuhe, watadu si nga ndiko fu agu abamangisunge fu Mbori nga aKristano a te.

Ka si du nga zanga manga rogatise nga ndiko te, tipagine aYesu na Pauro afura ti ni tipa zanga manga rogatise ni wenepai? Si wo mbiko padu boro ni bakuparanga rengbe ka fu bakere momu fu ni tipa ni tungusi wene pangbanga fu kura aboro. Gu boro amanganga rogatise ya ima rengba ka manga bakere apai wa duhe nga ni na gu bakere bakabangirise du arogotise na ni te.—1 AKorindo 7:32-35.

Mo bingo gu kpiapai nga ga David nadiberã ka mbu gako wene sunge marã ko aamangaha rogo gu gbata nga Mexico ka ndu ku rogo kura wiri gbaria sa du Costa Rica yo tipa ka yugo Ziazia Kekeapai fu aboro. Ya mo David abihe nga padu ko ni bakuparanga aundo ko tipa ko mangihe wo? “Ii,” ko aya. “Si aima kpakara tipa ka inido tire na vovo sino mangaapai gbiati vovo gene raka, ono wa si adu nga kura boro adunga ho si aida mi berẽ pa ni te, gipai re aima du fere taata”

Claudia, nga nakuparanga nandu ka mangasunge rogo gu ba du na zingo abatungusipai rogoho aya: “Mi aima gbia ngbarago ti mangasunge fu Yekova. Gi mi idapase gbiati gimi pagume na Mbori ima nyaka ho mi abi wai ni ko angerafuo re.”

Claudia agbia gupai kuti gipai re nga, “si aidanga zanga manga rogatise du ni tindiro te. Pai ho kpara te, si ngia mo mangi rogatise watadu mo amanganga ha te, mo ima rengbe ka gbia ngbarago ka mo mangisunge fu Yekova Mbori na omero dunduko.”—Atambuahe 119:1, 2.