AGU APAI NANDU NA GUPAI DU TI KPOTOHO
Ada nga aDezire Yekova?
Becky du Amerika yo rogo gu gbata nga California aya, “Mi ima ino Mike tipa dungu agarã. Ko nga Dezire Yekova. Ono mi agianga tire na gu gako pambori re te. Da nga Yekova? Tipagine aDezire Yekova airisongo aʹuru-ongoda ti ni ya? Ya mo Mike rimisi tiko ku rogo sangisangi pambori yo?”
Zenon du Canada yo rogo gu gbata nga Ontario aya, “Ho gimi amurakporo atona ka wirikapai ni na aDezire Yekova, mi atona ka bakabangire nga: ‘Rogo gu rimo nga aDezire Yekova nga gine? Nairiwo gu kere rimo pambori re!’”
Kent du Amerika yo rogo gu gbata nga Washington aya, “Mi na diare aberẽ gupai nga aDezire Yekova naye fuo rani mbiko gu gbegberẽpai nga ani aima mbu nduge ku kanisa yo. Na ani aberẽhe nga, kangia kikindigi akanisa aadunga na guhe ani agbataha te, kungba kanisa wa ga aDezire Yekova aarengbanga kadu na ni a te.”
Cecilie du Denmark yo rogo gu gbata nga Esbjerg aya, “Nirengo, mi ainongo ada du nga yo na gupai i aida kutini te.”
Si nawira wa mo ima biyo i ni tungusipai rogo akporo na akporo watadu rogo agu aba du dungu aboro rogoho, i ni gamu agu awaraga du mburuhe ri Ziazia Kekeapai, na kini wisigi Ziazia Kekeapai na aboro kporo. Si rengbe kadu nga mo gbia gi magazini re be boro sa dagbayo. Wa vura duhe wo, mo rengbe ka bakabangiro nga ada nga aDezire Yekova nzunzu. Isoke gamo aberã sa na ga agu aboro du afugoyo kuari re.
Kangia mo nabaka bangiro na ngbatunga asanahe wa gure, wari du rengbe mo ka gbia akaragapai ni? Wai du rengbe mo ka ino gupai nzunzu aDezire Yekova naidi kutini, wai i agbia marã tipa gayo sunge tungusapai na tipa gayo aba-irisombori, na ndu gupai i aye ti ni ku kpuro yo watadu kaa fura na mo rogo agu aba du dungu aboro rogoho?
Cecilie ani nifura tipa ri mbata aya, “Mi agedi badungu apai tipa aDezire Yekova rogo Internet. Mi agi azire, na mi agi agu afugo sogote aboro agumbaha. Ni sangbanaha, mi aabi aDezire Yekova ni kere gbegberẽ aboro.” Ono tie, kusa, ri afura na kina boro aDezire Yekova na ri ki gbia wene akaragapai kuti gari asanahe.
Ya mo mo naida ka gbia ndikidi akaragapai kuti gamo asanahe tipa aDezire Yekova? Ani nangarasa ro mo gbia ndikidi akaragapai be kina aDezire Yekova nga agu aboro nakusa gi magazini re. (Asanza 14:15) Ani namaabangirani nga gu kekeapai naye fuo gere nika undo ro mo ini ada nga ani na agu apai ani na idi kutini na ka inopa gu sunge ani amangaha.
