Avungure adu na agude beyo sita, na mi nga ue gude dagba agi agude re.

Nina asonosi rani ni avuru pambori. Ono tie, wa mi angia tooni paranga, mi anaaraka raka biriki. Rago Poso, mi nandu ku kanisa yo kini bibia dagba agu abayango nga ga kanisa yo. Ono rogo gu kura aʹuru, mi naandu gene agbere yo, kini di kere angua kutii kpotore yo, na kini mangi meteka.

Mi angia gu boro naadu na kere imisiringbaduse. Ai guhe mi anibihe mi anidihe ka takpata na ni. Mi anaaya, “Gbia du nairobape​—na mi nga gako ũ irobape!” Baraho mi adu ni sukuru yo bara ti agu agarã nangia 1960, gu mangapai nangia ga agu aboro birĩ-zogarago nangia Black Panthers aima maapai rire, mbiko i nangia agu aboro naana nginga mbaro riipa gayo rengo ya. Mi akodi tire kuti agu agude sukuru naana sovura tipa gayo rengo. Wo ani anaakura dedede tipa ka yugo gaani gberãrago, na kini kisi sukuru ti gu regbo gipai re anaamanga ni.

Si nawira wa taka ngba bangirigene ka yugo gaani gberãrago aundongo re na gu kere imisiringbaduse naadu ti re te. Sidu, mi atona ka koda tire na agu amangi gbegberẽ apai nasoga kura aboro. Ni kpiapai, ti gu kura regbo, mi na abakureami aabi gu vidio naafura tipa wai gu bi-aboro nangia akanga arungo Amerika yo. Mbiko gu gbegberẽ mangapai re, si asa rani ani ta agu aparanga nangia pusi-aboro kina ba vidio ho. Fuo gure ani ki ndu ku rogo gu dagbarago pusi-aboro aaraka rogoho, ki tona ka gbata kura dungu aboro tipa ka ta yo.

Bara ti agu regbo mi ada nga sosono paranga, mi na unvurami gbiati tamere aamanga kere gbegberẽ apai kindi. Wo ani agbiatirani ngbapai yo be agbia ngbii. Wirinami sa adu dagba gu badona nangia ga kere amangi gbegberẽ apai, na mi ki tona ka koda tire nayo. Gimi raka aagberã kina ku mbatayo.

I ayambu re tipa gayo adunguratise, na mi ki ndu. Kina ti tonatonaha, mi aima bi wai aDezire Yekova adu kia ti kura aboro. Aboro dunduko naadu na Ziazia Kekeapai beyo na kini mangisunge na ni ti regbo dunguratise. Rukutu agude aamanga gumbapai a ti gu regbo re! Rago aima ngba tire ka  ino gupai nga Mbori na kina rimoko ti ni nga Yekova, na ka bi aboro i nimangisunge na ni. (Atambuahe 83:18) Dungu ngbatunga aboro ni bakiakia naadu rogo dungurati, ono kparakaro aadunga dagbayo te.

 Ti tonatonaha, mi aidanga ka wirika Ziazia Kekeapai na aDezire Yekova te, ono mi anidu na ngbarago tipa kaa ndu tipa gayo adunguratise. Rogo yuru sa ti gu regbo mi adu pati gayo dunguratise, abakureami andu ku ba gbere yo. I ata tooni paranga yo ki imiko mbiko ko aka kafu gako roko-zere fuyo. Ho rago agiri ni, i atona ka ta ngbaduyo tipa gu boro i aimi ni re. Na ho i da ni nayo ngbangayo, i aabingo ho nga gbegberẽpai du i namangihe re te. Dunguyo i asaringbanga yo nga i nika raka ku bambukiso yo dati kpio yo. Nirengo, mi aima du na ngbarago nga mi aadunga na yo rogo gu yuru re te. Mi adiberã tipa ka aria gimi raka na ki tona ka wirika Ziazia Kekeapai.

Mbiko gu bakere sogote nga ga angbatunga mi adu na ni, mi abi apai dagba aDezire Yekova nazeresi kina ngbare. Ni kpiapai, ho kura Dezire Yekova nangia pusi boro animerẽ ni, ko animbu awiriko fu agu aborokporo nangia bi-aboro. Na agu aborokporo naaningia pusi aboro anaadia gu paranga aboro nga bi-aboro ku kpuyo ba anaadunga beyo tipa ka raka rogoho ya. Mi ada kuti gupai nga aDezire Yekova ima re na agu afugo Yesu du rogo Yoane 13:35 naya: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” Mi aima ino gupai nga mi ima gbia ndikidi awirinami.

Mbiko wirika Ziazia Kekeapai, mi atona ka bi gupai nga si naida mi aria gimi berãpai. Mi atona ka aria berãre tipa ka tona mangaapai nazereda na mi abihe ya si nga wene gene raka. (ARomo 12:2) Mi atona ka manga sonakumbatayo yeeyee. Mi azi bapatiza rogo Ngi 1974 na ki da ni Dezire Yekova.

Ono tie, zavura fuo zio mi bapatiza, mi anaamanga ome kindi tipa kaa za tire ti gimi zinga. Ni kpiapai, ti gu kura regbo ho mi aatungusapai ni kporo na kporo, mi ado iradĩ nadĩ radio rogo gimi tarambiri. Ho mi aambeda ni na ko, ko aba gu radio re na ki oro. Ho mi ape gipai re ni fu kura aboro tipa wai mi agbia gimi radio, bakumba sa asana re nga, “Stephen, ka mo ni zi gu iradĩ re ginihe ka mo amangihe na ko?” Gi sanahe re asa re mi berẽ na ki ngarasi re mi mangi ome tipa kadu nazereda.

Rogo gu garã nangia 1974, mi atona ka tungusapai ti aregbo dunduko, kini di asa 100 rogo adiwi dunduko tipa kaa yugo Ziazia Kekeapai fu kura aboro. Kusa, mi agbia momu tipa ka ndu ka mangasunge rogo gu rii-basunge nga ga aDezire Yekova du Brooklyn, New York Amerika yo. Rogo gu garã nangia 1978, mi akaraga tire ku Los Angeles tipa ka ngerafuo nina naawoka. Fuo agarã ue kusa, mi adi diare nga Aarhonda. Ri aima undo re ni bakerehe tipa ani ngerefuo nina daho nina akpi ni. Fuo bete regbo kusa, Aarhonda gbiati tire andu tipa Gu Sukuru Nga Girada na i ki kedi rani ku rogo gu ringara nga Panama, na ani namangasunge yo kindi ni amokedi.

Wa mi azi bapatiza, mi ima gbia tire na dungu akpakarapai naima rengba ka sa re mi zingi. Mi ima wirika gupai nga ka guari kusayo pati agu aboro naida ka bazinga tire watadu ka asada ka zeresa gupai re. Dungu aboro kodihe na diare ima tambuahe re tipa wai mi amangapai kuti agi akpakarapai re. Kina iriworago ni naati tire! Mi atambuanga tire tipa agi aʹariapai mangi rogo gimi raka re te. Kuba gure, mi idi kuti gupai nga gere nga agu apai nayugo gupai nga Ziazia Kekeapai na ome tipa ka aria boro.​—AEbere 4:​12.

Mi atanga aboro berewe te; kuba gure, mi naundoyo rogo toro yo. Mi ima wirika Ziazia Kekeapai a na gu vura re naanidu sukuru yo! Ho ko azi bapatiza ni, ani atona kaa raka na ko rogo bangisa bambu sa. Areme, ani nga wene abakure. Da ku awere, mi na diare ima undo aboro 80 tipa i da ni aDezire Yekova ni wirika ani Ziazia Kekeapai nayo.

Mi na bakere ngbarago tipa wai Yekova naundo re mi raki gu raka du na rogoyo ti ni na mi du na ngbarago dagba ndikidi awirinami.