1, 2. Ginipai Yesu amangihe rogo Nisana 14, 33 Fuo Batikayo Kristo? (Oni bi gu sura du ti tonatonaha.)

YURU ima da, diwi nakii vuru Yerusarema. Gere nga gu nyemu nga ga Nisana 14, rogo gu garã nangia 33. Yesu mangi Pumbo Susiri na gako amokedi ka tingidapa wai Mbori akusi aYisaraere be sunge kanga Ezipeta yo dungu kama agarã kusayo. Yesu sigira tingida pakpioko na gu gako ruru amokedi 11, si tipa kaa tingidapa gu kpio ko nika kpihe mbata fu gu uru re digi. *​—Mt. 26:1, 2.

² Yesu kpari kurii gu kpakuto adunga na agbooro rogoho ya na ki fuhe fu gako amokedi niya: “Oni dí he ki ri he.” Fuani, ko ki di inga nga ga imekakue ki fu tambuahe na ki ya: “Oni mbíri he ambira ti ngba gere [wa du oni] dunduko.” (Mt. 26:26, 27) Yesu afunga gu kura riahe fuyo te, ono dungu apai du ngbako tipa ka pehe fu ruru apefuoko rogo gu nyanyakipa yuru re.

3. Gi kekeapai re nika sakapai tipa gini asanahe?

³ Sidu, gu uru Tingida Pakpio Yesu ko asigiraha re i naayamba ti gu kura aregbo nga, “ga Gbia riahe.” (1 Kor. 11:20) Kura aboro nasanahe tipaha niya: Tipagine si aida aboro mangi tingida  pakpio Yesu ti ni? Kpakuto na imekakue nayugo gine? Wai rengbe ani ka mbakadatirani tipa Tingida Pakpio Yesu? Ada si aida i rihe? Na ga aKristano karagapai nga gine tipa gupai Ziazia Kekeapai apehe tipa gayo maabangirise?

4. Ginipai pakpio Yesu asaha furani taata?

⁴ Nidu ani ni atita Adamu, ani aima dia ingapai na kpio tiko. (Rom. 5:12) Kpakpa boro ho narengbe ka fu motumo fu Mbori tipa unga ni watadu tipa kura aboro te. (Tam. 49:6-9) Ono tie, Yesu atumo na ungako na gu kpotoko naadu ni rengberengbehe gbiati kureko. Pa yugo Yesu pa nyaka gako motumo fu Mbori asaha taata furani tipa ani bati be ingapai na kpio na ki gbia nyenye unga.​—Rom. 6:23; 1 Kor. 15:21, 22.

5. (a) Wai gu ini anihe nga Mbori na Kristo nakpinyemu aboro akpi? (b) Tipagine si aida ani du ti ni pati tingida pakpio Yesu?

⁵ Pa ida Mbori Yesu ye ka tumo rani nayugo gupai nga Mbori aima kpinyemu zegino. (Yo. 3:16) Pa ida Yesu ka kpi nayugo gupai a nga nyemu rani kina tiko. Nirengo, mbata fu Yesu ye ku auru kpotosende ane ni ga Mbori “bangbasia boro sunge,” ‘rago angba tiko mbiko awiri aboro.’ (Snz. 8:30, 31) Padu ani na tambuahe fu Mbori na Wiriko rengbe ka sarani ani du pati tingida pakpio Yesu, na rogo gu gene re, ani namangapai kuti gako zinahe naya: “Oni mángi gere, ni gu rago oni ka nimbiri he, nitíngidi pa re.”​—1 Kor. 11:23-25.

6. Si naida ani du na gini bipai tipa kpakuto na imekakue?

⁶ Ho Yesu asigira Tingida Pakpioko ni, ko aasanga kpakuto na imekakue ku rogo boroko na kureko ngba iiriwo gene te. Kuba gure, ko aya tipa kpakuto wẽ: ‘Borore nga gere.’ Ko aya a tipa imekakue wẽ: ‘Kurere nga gere nga ga ndika nga gu nauka tipa dungu aboro.’ (Mk. 14:22-24) Si tie ziazia nga, kpakuto na imekakue aarukuba kurapai kia.

7. Gu kpakuto na imekakue du tipa Tingida Pakpio Yesu narukuba gine?

⁷ Rogo gu nyanyakipa uru naadu rogo gu garã nangia 33, Yesu mangisunge na gu yangara kpakuto naadunga na agbooro rogoho ya tipa Tingida Pakpioko. (Gate 12:8) Rogo Ziazia Kekeapai, kura aregbo kinaho i namangasunge na agbooro tipa irairapai watadu ingapai. (Mt. 16:6, 11, 12; Rk. 12:1) Rogo gi gene re, pa manga Yesu sunge na gu kpakuto adunga na agbooro ya adu na nyanyaki paha mbiko si aarukuba gu kpotoko naadunga na ingapai ti ni ya. (Eb. 7:26) Ngbatunga gu kpakuto re i namangasunge na ni ti regbo Tingida Pakpio Yesu.

8. Gu imekakue du ti regbo Tingida Pakpio Yesu nayugo gine?

⁸ Gu imekakue Yesu amangisunge na ni rogo Nisana 14, rogo gu garã nangia 33, narukuba kure Yesu na kina gu bangisapai re namanga areme ti regbo Tingida Pakpio Yesu. Kureko akusuko Gorogota yo nga gu rago du pati Yerusarema “sa dia gbegberẽapai” tirani kusayo. (Mt. 26:28; 27:33) Wa duhe nga gu kpakuto na imekakue du tipa Tingida Pakpio Yesu nayugopa gu nyanyakipa motumo ko afuhe fu aboro giasangba, ani nabihe na nyanyaki paha, na si adu ni wenehe ani mbakaditirani tipa kadu pati Ga Gbia Riahe.

9. (a) Tipagine duhe ti ni ni wenepai nga ani gedi Ziazia Kekeapai Kini Tingidi Pakpio Yesu? (b) Gini bipai du mo na ni tipa ga Yesu motumo?

⁹ Ka ani ageda agu averesi du tipa Tingida Pakpio Yesu du rogo gaani Wisigo Ziazia  Kekeapai Na Aˈuru Dunduko, ani rengbe ka berãkurii gupai Yesu amangihe mbata fu ko kpi. Gipai re rengbe ka undo rani ani mbakadi ngbaduraniyo tipa Ga Gbia Riahe. Wirinarani sa aya: “Ani nangera tipa gu regbo Tingida Pakpio Yesu nika da ti ni. Agarã dunduko duhe ni kparakparaha. Mi natingida wai mi aru kporokpee yo ki ngana kangba buba na si ki sare mi du na tambuahe tipa ga Yesu motumo. Mi aya, mi ima ino agu averesi du tipaha naabaha na mi ima rengba ka sakaha wenengai. Ono kinaho mi atingidipa wai Yesu aigirã be kpio, si asa re mi du na ngbarago tipa gupai ko amangihe furani vurube motumo.” Nirengo, ho ani ambakadatirani tipa Tingida Pakpio Yesu, si naida ani berẽkurii wai Yesu atumo tipa ka batasa rani be ingapai na kpio.

10. Mbakadatise tipa Tingida Pakpio Yesu nakoda ginipai?

¹⁰ Mbakadatirani tipa Tingida Pakpio Yesu naida na gupai nga ani mangi ome tipa ka kiiso gaani tungusapai, singia ka mangasunge moundo abazakigene ti regbo re. Wa ani kaa yamba agu aboro ani naawirikapai na yo gbiati gu kura aboro i ye tipa Ga Gbia Riahe, ani nika du na ngbarago wa ani afura tipa Mbori, Wiriko, na agu amaku du ku mbatayo fu agu aboro nafu ngbarago fu Yekova na kini taasirimoko.​—Tam. 148:12, 13.

11. Gini gbegberẽ gene gu kura aKorindo anaari kpakuto na kini mbiri imekakue ngbaha?

¹¹ Wa ani kaa mbakadatirani tipa Ga Gbia Riahe, si naida ani tingidi gupai gu mokedi nangia Pauro akehe fu agu aKristano naadu rogo gu dungurati naadu Korinda yo. (Oni gedi 1 AKorindo 11:27-34.) Pauro aya gu boro nari kpakuto na kini mbiri imekakue ngba iraira gene, “ni [ni]ka du ni borobape boro Gbia na kureko.” Sidu, si naida gu Kristano du ni mbedimbedi ni “wisigi tini” mbata ni kini ru ka dia aũtingida Pakpio Yesu. Ka si adunga wo ya, “ni nari sapangbanga kuti ni ki nimbiri he.” Mbiko gu gbegberẽ mangapai naadu ti aKorindo, dunguyo adu “narungbura ki du na kaza, agu yo ki ra ara [rogo kpio] ni umba yo te.” Si nawira wa aguyo ari he na ki mbiri he ni bakerehe mbata fu Tingida Pakpio Yesu watadu ti gu regbo nangia ga Tingida Pakpio Yesu ka berãyo adunga wenengai ya. Mbori aidanga na agu aboro nari kpakuto ngba gu gbegberẽ gene re te.

12. (a) Pauro aringbisi Tingida Pakpio Yesu kuti gine, na gini zahe ko afuhe fu agu aboro narihe? (b) Ginipai si aida gu boro narihe mangihe ka si du nga ni mangi kere ingapai?

 ¹² Pauro aringbisi Tingida Pakpio Yesu kuti gu riahe boro arihe na akurani, na ki za agu aboro narihe nga: “Ka oni mbiri nga he ti ngba gu inga nga ga Gbia, na gu inga nga ga adaimona [ya], ka oni dí nga he ti gu mbisa nga ga Gbia, na gu mbisa nga ga adaimona ya.” (1 Kor. 10:16-21) Kangia gu boro ninaari Ga Gbia Riahe mangi kere ingapai, si naida ni gbata undo rogo toro yo. (Oni gedi Yakoba 5:14-16.) Kangia gu mbedimbedi Kristano re “zúku rindi ngua tie rengbe na saberã,” ka ni rihe berewe anga ni nabisirapa ga Yesu motumo te.​—Rk. 3:8.

13. Tipagine duhe ti ni ni wenepai ani kpari tipa gaani maabangirise?

¹³ Wa ani kaa mbakadatirani tipa Tingida Pakpio Yesu, si adu ni wenepai ani kpari na kini berẽkurii gu gaani maabangirise Mbori nafuhe furani. Si aidanga ga Mbori ruru moyambu watadu pekefuo Kristo du na zanga irisa kuti ga Yesu motumo ni ri ni kpakuto na ki mbiri imekakue ka si du nga he ho nayugoho funi nga mbedimbedi Kristano nga ni te. Sidu, wai rengbe boro ka ino singia si naida ni ri kpakuto na ki mbiri imekakue?

14. Ginipai vovo mokido amangaha na agu aboro nari kpakuto na kini mbiri imekakue?

¹⁴ Agu aboro nari kpakuto na kini mbiri imekakue ti regbo Tingida Pakpio Yesu, i ima inoho nzunzu nga i nga papara gu mozunga re. Nibipa imekakue, Yesu aya: ‘Gi inga re nga vovo ndika rogo kurere.’ (1 Kor. 11:25) Vurube gu nebi nangia Yeremaya, Mbori apepai ku mbatayo nga Ko nika manga vovo mokido kia ti gu mozunga nga ga aNdiko ko amangihe na aYisaraere. (Oni gedi Yeremaya 31:31-34.) Mbori ima manga mokido na agu aYisaraere nga ga toro yo. (Gara. 6:15, 16) Gu motumo nga ga Yesu nanyakasa gi mokido re na kureko kini saha si nimangisunge. (Rk. 22:20) Yesu nga azarõ nga ga vovo mokido, na i nadia ruru mbedimbedi Kristano ku rogoho tipa i ga ku Ngbangbaturũ yo.​—Eb. 8:6; 9:15.

15. Ada i adi yo ku rogo gu mokido nga ga Kindo, na gini momu napido yo?

¹⁵ Agu aboro rẽ tipa ka ri kpakuto na kini mbiri imekakue ti regbo Tingida Pakpio Yesu ima inoho nga i rogo gu mokido nga ga Kindo. (Oni gedi Ruka 12:32.) Agu aboro naadu ni mbedimbedi apefuo Yesu na ki kakuti ko, ti regbo arungo, i nika du na ko rogo zogarago ngbangbaturũ yo. (Frp. 3:10) Wa duhe nga i rogo gu mokido nga ga Kindo, i nika zogarago na Kristo ngbangbaturũ yo nyeanye kindi. (Yugo. 22:5) Ngbatunga agu aboro re du nadia kpakuto na kini mbiri imekakue ti regbo Ga Gbia Riahe.

16. Ni wiri guruhe, oni sakingo pai tipa ARomo 8:15-17.

¹⁶ Kina agu aboro toro nayugu dezirepai fuyo nga i nga awiri Mbori kina yo sa si aida i ri kpakuto na ki mbiri imekakue. (Oni gedi ARomo 8:15-17.) Oni bi gupai nga Pauro amangisunge na gu pa-Arama nga ‘Aba,’ du rogoyo nga “Buba!” Tooni gude rengbe ka mangasunge na gi fugo re ho u ayamba bai ni, mbiko gere nangia gu fugo nga ga nyemuse wakina gu nga “baba” watadu “buba.” Agu aboro di “gu Toro kugume nga ga mbutiawirinyaure” i nga agu awiri Mbori ko nambediyo ni toro. Toroko nga dezire na toroyo nga i nga agu awiri Yekova du ni mbedimbedi yo ni toro. Anga si gbua nga nyemu raka tiyo auru kpotosende ane te. I na kido nga i nika du na Yesu rogo Kindo  ngbangbaturũ yo ka i nye ni ruru yo da ti kpio. Areme, kina bete apefuo Yesu nga 144,000 du ti ni nga aguyo “ziazia ko [na]mbedi” yo nga Yekova. (1 Yo. 2:20; Yugo. 14:1) Gako toro du nasayo i niya ‘Aba!’ “Buba!” Nangba gu wene pagume du yo na ni na Mbori re.

17. Gini maabangirise du mbedimbedi aKristano na ni, na i nabihe wai?

¹⁷ Kangia mo nga mbedimbedi Kristano, si naida mo nikpari tipa gu gamu maabangirise du na nyanyaki paha foro. Ho Ziazia Kekeapai afura ni tipa agu aboro i na ‘pazua yo’ fu gu kumba du ngbangbaturũ yo nga Yesu Kristo, oni inihe nga oni du gipai re tipa roni, na kini ngere ku mbatayo kadu ni papara gu dee ko nika ‘diari’ re. (2 Kor. 11:2; Yo. 3:27-29; Yugo. 21:2, 9-14) Ho Mbori nitiko ayugo nyemuse ni fu agu awiriko nga ga toro yo, si naida oni karagapai ki ya, “Mi du.” Na ho Yekova afu arugute ni fu agu awiriko du ni mbedimbedi yo ni toro, ziazia toro nasa roni oni gisangbako na kini ya ku kpotoroni yo wẽ, “Gipai re nabi re.” Gaoni toro na gu nga ga Mbori nayugo dezirepai nga oni na gu maabangirise nga ga ngbangbaturũ.

18. Gini maabangirise du “kura akandoro” na ni, na gini bipai du mo na ni tipaha?

¹⁸ Kangia mo dagba “bakere rimbasa aboro” nga “kura akandoro,” Mbori ima fu gu maabangirise furoni nga ga raka auru kpotosende ane. (Yugo. 7:9; Yo. 10:16) Oni naida ka raka nyeanye kindi rogo Paradizo, na oni nagbia ngbarago ti berãkurii gupai Ziazia Kekeapai apehe tipa raka ku mbatayo auru kpotosende ane. Oni nangera ku mbatayo ka raka rogo zereda kpaima na gaoni aborokporo na gu kura ruru aboro. Oni napido gu regbo zingo riahe, rungo, akaza, gbiati kpio narungosi aboro areme nikaa du nga ti ni ya. (Tam. 37:10, 11, 29; 67:6; 72:7, 16; Yes. 33:24) Oni nangera tipa gu regbo oni nika dia agu aboro i nika zingisa yo be kpio kugume du na gu maabangirise nga ga nyenye unga. (Yo. 5:28, 29) Nairiwo gu tambuahe du oni na ni nga Yekova ima fu gu maabangirise furoni nga ga nyenye unga auru kpotosende ane! Ka si vura du nga oni aringa kpakuto na kini mbiri imekakue te, oni du pati Tingida Pakpio Yesu tipa ka yugo gaoni tambuahe tipa ga Yesu Kristo motumo.

19, 20. (a) Wai rengbe gu maabangirise Mbori nafuhe furani kada ni rengo? (b) Tipagine si aida mo du ti ni pati Tingida Pakpio Yesu?

¹⁹ Ka si vura du nga gaoni maabangirise nga ga ngbangbaturũ watadu ga kpotosende, si rengbe kadu ni ndikidipai bangironi kina gu ka oni du na idapase kuti Yekova Mbori na Yesu Kristo, gbiati motumo. Ka oni du pati Tingida Pakpio Yesu oni nika du na momu tipa ka berãkurii gaoni maabangirise na wai nyakipa kpio Yesu. Sidu, oni mangi ome kadu dagba agu amirioni aboro nika du pati Ga Gbia Riahe rogo gu uru re fuo ti uru Rago Bisue, Zerekpe 3, 2015, Bambu Kindo yo na rogo gu kura arago.

²⁰ Ka mo abi ga Yesu motumo na kikiipaha, si nika saro mo du pati Tingida Pakpioko. Ka mo degeturo wenengai kuti gu gumbapai nika manga, si nika saro mo yugu gamu nyemuse fu gamu amurakporo nipe mo gupai mo nawirikihe tipa ga Yekova nyemuse gbiati gako bakere ringbisapai tipa aboro. (Mt. 22:34-40) Ka kina ginipai vura manga vurũ, ka oni kpanga du pati Ga Gbia Riahe ya.