Rogo 2012, i akurubara kurugbo runge sende yo nga gu niima dia agarã 3,000 nga gu ba nyemupai ti abawetekeapai. Ginipai du tigaha naadu kia tipa gi runge re? Gipai re angianga gi kurugbo runge re ni tihe te, ono gupai naadu ni kekehe ti ni.

Niyangaraha, ho abageteke kuru ahe sende yo agbigbia gi kurugbo runge re ni ku rogo ba sa, i arengbe ka geda gu kuru kekeapai nangia ga aKanano ti kpotoho. Si aya: “Esebara Ben [wiri] Beda.” Gere nga gu bambata regbo abageteke kuru ahe sende yo nabi gi rimo re ni kekehe ti guhe naaima du bakuru kusayo.

Gu kura Esebara kinaho furayo tipa ko rogo Ziazia Kekeapai yo, ko angia boro sa dagba awiri Bakindo Saura. (1 Peka 8:33; 9:39) Bakerepa bayugupai sa nga Yosef Garfinkel nga guko naadu dagba agu aboro nabukuyo gu runge re sende yo ape gupai nga: “Si ni gupai nagbeberãse nga gu rimo nga Esebara kina rogo Ziazia kekeapai yo, na awere si rogo gu kekeapai nga ga abageteke kuru ahe sende yo a, ono kina ti regbo gu zogarago nangia ga Bakindo Davide sa.” Kura aboro naberãha nga gu rimo re anidu kina ti gu regbo re sa. Gere berewe nga gu kura kpiapai nayugo wai gu kekeapai nga ga abageteke kuru ahe sende yo asongoda gu rengo du vuru Ziazia Kekeapai yo.

Rogo gu kura papara Ziazia Kekeapai, gu rimo nga Esebara i moi he yo nga Isa-bosete, i aria “bara” ki moihe nga “bosete.” (2 Sam. 2:10) Tipagine i amangihe ti ni wo? Abawetekeapai nape gupai nga, “Si nawira wa bake Ue Samuere aduadu na ndundu ka mangasunge na gu rimo nga Esebara mbiko si aatingida aYisaraere na gu mbori bavugumo nga ga aKanano nangia Bara, ono gu ndikidi rimo re, . . . i aima bandaha rogo gu Kitabu nga Pekapai.”