YEKOVA MBORI nangarasa aKristano nga si naida i bi zereda na nyanyakipaha, ka maa zereda ni nyanyakipa papara raka. Gu sangbanapai duti du ni aboro zereda nga ndikidi airisimbori na zereda kpaima dagbayo. Gipai re nasa gu dungurati nga ga aKristano si ngba ti agu aboro nga aguyo aidanga na tagbagaapai ya.

Ni kpiapai, gu kura borongua sa rimoko awo awo gbe Madagascar yo adi regbo ka bi gu zereda du dagba aDezire Yekova. Ko ki ya fu tiko, ‘Ka uru duho sa mi nika ida ka ga ku rogo pambori, gi pambori re du mi nika ga ku rogoho.’ Fuo bete regbo kusa, ko ambu sunge ngua, ki di adiwi tipa ka rugusa agu apai tipa gako rogatise naadunga kuti Ziazia Kekeapai ya, na ki da ni irisi Yekova, nga gu Mbori nga ga zereda ko.

Wakina gu kumba re, akutu aboro rogo agarã dunduko nagbia gu zereda rogo gu dungurati nga ga aKristano nga gu du yo na bakere nyemuhe. Ono tie, Ziazia Kekeapai ima gumbaha ziazia nga ka “kere kpiboro na kpata” du rogo dungurati, si ima rengba ka gbarasa pabakure na ki ye na kpakaraapai. (Yak. 3:​14-​16) Si ni pangbarago nga, Ziazia Kekeapai ima fu wene arugute a tipa wai rengbe ani ka ne gu ngbatunga akpakarapai re na ki nyakasi zereda. Tipa ka mbakada tirani ka mangaha wo, ani bingo gu bete ndikidi apai naima manga rogo raka yo.

CHRIS aya, “Si aima kpakara fere ani gitirani wenengai na wirina ani aamangasunge na ko. Kura regbo sa ani apapaya dagba tirani, aboro ue aye ki bi rani ani poi.”

JANET aya, “Wirina nidee sa ani anaatungusapai dedede na ri arugusi gaani mbakadapai nga ga kura gene tungusapai yo wa ikpirogumba. Fuani, ri ki mbu fugo na mi. Mi aainongo gu ndupai ri amangihe wo ti ni te.”

MICHAEL aya, “Ani adu biata naafura rogo terefuni ti ngisa regbo sa. Gu kura boro sa ki ya bai, na mi ki berẽhe tigimi nga ko ima kiso gako terefuni. Fuani mi ki peke gbegberẽ afugo bara ko fu gu kura boro rogo terefuni, atika wari ko akisonga gako terefuni te.”

GARY aya, “Rogo gaani dungurati, anazakigene ue atona kadu na tagbagapai dagbatiyo. Guni ki tona ka bira gu kurani. Gu papaya naadu dagbatiyo re aima ba gberãrago ti gu kura aboro.”

Mo rengbe ka bihe nga agu apai re nangera wa kungbo taata apai. Ono wa vura duhe wo, si dunduko ni basasa aima rengba ka ye na igirã kpotose yo na rogo toro yo tipa gbanga regbo fu agu aboro si adu dagbayo. Ono tie, mo ima rengba kadu na ngbarago ka ino gupai nga agu awirina re aima mbakada gayo atagbagapai ni mangayo sunge na Ziazia Kekeapai si ngbe fuyo kumbatayo. Gini arugute nga ga Ziazia Kekeapai mo abihe nga si i amangisunge na ni na ki du na diabese?

“Ka oni pói nga dagba roni gene ya.” (Bam. P. 45:24) Yosefa afu gu rugute re fu awiribako  nga aguyo naakaragatiyo fuo bayo. Agu afugoko re aima du ni patatamana nirengo! Ho boro ambu tini ni fu zinga ni ipo, ni ima rengba ka sa kura aboro i zingi a. Chris aye ka bi gupai nga gako rungbura angia rukö gbiati manga ndundu ka dia arugapai kugume. Mbiko ko aaida ka manga ariapai, ko ahõmbupai be gu wirina i apoi na ko re na fuani ko ki mangi ome nyanyaki ka banda tiko ti zinga. Ho ga Chris badiasunge abi gu ome ko amangihe ka manga ariapai ni, ko amangi ariapai a tigako. Awere, i namangasunge fu Yekova kina sa na ngbarago.

“Yo adu nga rugapai ni ya, apai yo na kina gberãrago.” (Snz. 15:22) Janet adakuti gupai nga si naida ri di gu rengo re bakere gbe ku ngbaduriyo. Ri adiberã ka “rugapai,” watadu ka fura na gu kura wirina re. Gu regbo i aafura tipa gupai re, Janet asana gu wirina re rogo birĩ yo ri pe gupai ri akpihe kuti ri. Ti tonatonaha, gu sakapai re aima du ni kere fofoi he, ono apai atona ka ngba wa i aafura tipa gayo tagbagapai ngba zezeredi gene. Gu wirina re aye ka kura bara gupai nga kurapai kinaho ri aagianga tiri na ni ya nga gu zaatu Janet aadunga rogoho ya. Ri ahõmbupai, na i namangasunge fu Yekova berewe kina sa.

“Were ka mo agama ga gamahe bamotumo yo, mo ki tingidi he si ngia pai dagba roni na wirinamo, mo ki he ga gamahe barangba bamotumo yo, ki guari, mo ki mbakadi pai dagba roni na wirinamo mbata.” (Mt. 5:​23, 24) Mo ima rengba ka tingida gu rugute Yesu afuhe rogo gu gako tungusapai naadu rii bagangara yo. Rago aye ka gberã ti Michael ni kerehe ho ko aye ka bi gupai ni nga ko aaberãnga pa gu wirina re te na ko aamanga fuko ngba gbegberẽ gene. Ko aima diaberã ka manga ome ka karaga zereda berewe kubaha. Ko aumbasi patiko ni ndu ko fuo gu wirina ko aimisi ko re ki hõmbupai beko. Sangbanaha angia gine? Michael aya, “Wirinami ambupai fere nzunzu ngbadukoyo.” Gayo bakure angba berewe kubaha.

“Nihi pai fu akuaroni, nivu akuaroni, ka pai du bangiri gu boro kuti kura ni.” (Koro. 3:​12-​14) Nibipa gupai tigaha naadu dagba agu anazakigene ue naima dia gbanga regbo kutingba sunge anazakigene re, kura wene sino bakumba sa aundo yo i berẽkurii asanahe wagu nga: ‘Ya mo wa du ani ue re, rengo kina berani ka ba gberãrago ti kura aboro mbiko gaani zangagiatise? Ya mo wene ndupai kina berani nzunzu ka zanga hipai fu akuarani na kini mangisunge kindi fu Yekova na zereda?’ I aidi ga gu bakumba rugute re na ki mangisunge na ni. Awere, i nagia tiyo wenengai wa i atungusa wene pangbanga.

Tipa ka mangapai kuti agu arugute nga ga Ziazia Kekeapai biki anihe kuari re, AKorosaio 3:​12-​14 ima rengba ka undo ro ka boro imisi ro. Badungu aboro ima bi gupai nga ho du yo ni na umbasitise, i ima rengba ka mbupai na bangiriyo ki go ti ni. Ka si du nga boro ima manga bakere asadatise ono si kini ngere wa gupai re ata nyasanga te, ya mo ni rengbe ka mangapai kuti  gu rugute du rogo Matayo 18:15? Gu ga Yesu rugute du ane re, si tipa gupai boro narengbe ka mangaha ho boro naima manga kere ingapai ni kuti kurani. Ono ringbisihe kuti gu rugute re, si rengbe kadu nga si du nga gupai si aida mo mangihe. Gupai gbua si aidaha nga mo ndu fuo wirinamo na ki asadi ngba zezeredi gene gbiati umbasitise ka saka gupai re na ka nyasariipa ha.

Rengo ngaha nga, Ziazia Kekeapai nafu gu kura wene aberãpai. Gu nyanyakipa pai du tipa ka mangapai kuti ni nga ka yugo “zuzu Toro . . . nyemuse, na ngbarago, na zereda, na hipai, na mangapase, na weneringise, na du ngangarã, na zera, [na] rugatise.” (Gara. 5:​22, 23) Wakina nzeme nga gu nazerengesa makana si mangisunge zanga kpakarapai, agu asinombori re nasa mbakada tagbagapai si ndu ni zezerenge he zanga kpakarapai.

Agu asino du tirani ni bakiakia rengbe ka sa pabakure si ngba angba gbe. Padu asino rani ni bakiakia ima rengba a ka ye na tagbagapai. Kura bakumba sa du na inohe afu gi kpiapai re: “Gu boro du na zee ima rengba ka gbia kpakarapai kadu pati gu boro du tigani zaaza. Gu kparakparapai du dagbayo re ima rengba ka ngera wa nyakingo paha te; ono wa vura duhe wo, si ima rengba ka ye na kere kpakaraapai.” Ono tie, ya mo mo naabihe nga agu aboro du asinoyo ni bakiakia, ka i sungungo zanga du na kpakaraapai dagbatiyo te? Mo bingo gu kpiapai nga ga amokedi ue. Gini ngbatunga boro nangia Petero? Mo ima rengba ka berãpa ko ni gu boro nafura kisusi na aberãnga kuriipai mbata fu ni fura ya. Na Yoane tigako? Ani rengbe ka berãpa ko ni gu boro dedede nafura na kini mangipai zezeredi. Agu aberãpai du ani na ni tipa agu amokedi ue re na kina mburuhe ti ni. Si nangera wa asinoyo adu ni bakiakia. Ono wa si avura duwo, i amangisunge wenengai kina sa. (Amo. 8:​14; Gara. 2:9) Na ngbanya kuti gipai re, agu aKristano areme du na asinoyo ni bakiakia rengbe arengba ka mangasunge kina sa.

 Isoke wirina kinaho rogo gamo dungurati kina ngbaduro ninaaima be gani afugo gbiati mangaapai. Ono wa vura duhe wo, si naida mo tingidi gupai nga Kristo akpi tipa gu boro re na si naida mo yugu nyemuse ayugo funi. (Yo. 13:34, 35; Rom. 5:​6-8) Sidu, kuba gupai nga mo ya ka mo zingo bakure na ni te watadu ka tona kaa neka ni, mo sana tiro nga: ‘Ya mo wirinami namanga gupai ziazia du ni irairaha kuti sangba Ziazia Kekeapai? Ya mo ni nata inoaino ni asadi ka ba gberãrago tire? Watadu asino rani du gbua du ni bakiakia?’ Berewe a, gu sanahe du na nyanyakipaha nga: ‘Gini wene sino ni rengbe mi ka gbia undo ti ni?’

Gu yangara sanahe re nga banguaha. Ka si du nga gu boro re nafura zaaza ono mo ki du tigamo ni gu boro afuranga gbe ya, mo berẽnga pa wai duhe taata funi ni tona fugo na boro gene tungusapai yo. Mo rengbe ka pe gupai funi nga mo naida ka ndu na ni gene tungusapai yo na mo ki bi gupai rengbe mo ka wirikaha beni. Ka si du nga ni naagamahe fu aboro dedede, ono mo kidu tigamo na wiri bete ringi, anga si ni wenepai ka mo asadi ka ino gu ngbarago duti gamahe fu gbinza aboro, kazakaza aboro, watadu agu aboro du rogo zingo te? Gupai ani aida ka gumbaha nga, ka si vura du nga asino roni ni bakiakia, mo na wirinamo ima rengba kadu mbembedi na tironi ni gbe oni berãroni fuo gu wene sino duti kuaroni. Anga pa manga oni he wo nika sa roni ni wene abakure te, ono si nika undo ka sa roni oni du mbembedi na ki kiisi zereda dagbaroni na rogo dungurati.

Si rengbe kadu nga Euodia gbiati Sunduke adu na gayo agene mangaapai watadu asinoyo ni bakiakia. Ono wa si avura duwo, gu mokedi nangia Pauro angarasiyo nga “i dú na berã sa rogo Gbia” yo. (Frp. 4:2) Wakina gure a, ya mo mo amanga ome ka da ti gu sasa re gbiati gu nga ga zereda?

Wakina rende nga gu rengbe kaa sona asona kindi rogo gu ati nga ga ambumbudo, gbegberẽ berã koyo du kura aboro ni ima rengba ka  gberã kina kumbatayo kinagu ka ani mangi ome ka moho kusayo. Bara sa ome zinga akio ngbadu boro yo, si rengbe kadu na maapai kurii gu toro nga ga dungurati. Ka ani kpinyemu Yekova gbiati awirinarani, ani nika manga bakere ome ka zanga mbu gu kparakparapai du dagbarani si gberesi gu zereda nga ga ga Mbori aboro.

Ho ani amangapai ni kuti atagbagapai na gu sasa nga ga ka manga zereda, kina ngbarani rengbe ka zera be gu wene sangbanapai si narengbe ka ye na ni. Mo bingo gupai namangi kura Dezire Yekova sa: “Mi aberẽhe nga kura wirina sa aamanga fere wa ka i ya wiri gude du nga mi. Si aima gberã tire nzunzu. Wa gi gberãrago aasona kina kumbatayo, mi atona kaa manga furi ngba gbegberẽ gene. Mi aberẽ gupai nga, ‘Wa ri ayugongo gu irisa fere mi narẽ na ni ya, mi ayugongo irisa furi a te.’ ”

Gi Dezire Yekova re atona ka berãkurii gari mangapai. “Mi atona ka bi agbegberẽ asino re na rago ki gberẽ tire na tire ni kerehe. Mi abi gupai nga si naida mi aria gimi bipai. Tingbafuo mi kpari fu Yekova tipa gupai re, mi angbe wiri tooni gamahe fu gu wirina re na ki ke wiri waraga furi ka hõmbupai tipa gimi gbegberẽ sino. Ani adungo tirani na bangirani ki go ti gupai re. Ani aadunga berewe na kpakaraapai dagba tirani te.”

Aboro naida zereda na omeyo dũ. Ono tie, ho i abi gupai ni naida ka diaba yo gbiati gayo ngbarago, badunguyo natona ka mangapai ngba gu gene ayengo na zereda ya. Gipai re nga rengo tipa gu badungu aboro airisongo Yekova ya, ono dagba agu aboro yo du rimoko kuriyo nairisoko, si naida zereda gbiati kodatise duadu dagbayo. Gako toro adu kugii Pauro ko ke gupai nga: “Mi akpara ti ni fu roni, . . . oni tá ata si ki re are na gu yambahe i ayambu roni ni, ni umbasiti na zera, na gbanga hipai, oni hi pai fu akuaroni ni nyemuse; nike na ka kuti gu du sa nga ga Toro zikazika, ni gu ũkpamiatise nga zereda.” (Ef. 4:​1-3) Gu “ũkpamiatise nga zereda” re na nyanyakipaha. Ani nyakasingo ho anyakasa, na ki diberã ka nyasariipa agu atagbagapai dunduko rengbe ka kura dagbarani.