Kura aregbo kinaho ani aima pehe nga wo du si adu. Na si aawira gupai nga si adu na ngbanya na gupai ani agedaha rogo AEbere 12:16. Gu veresi re naya Esau “abinga agu apai du niziaziaha na nyanyakipaha” te, NW, na ‘ko abagi gako ũkumbo fu [Yakobo] tipa riahe rengbe na ri he bara sa.’ Gure aaida ka pe gupai nga ho Yakobo agbia padu kurii “ũkumbo” ni, ko aima ye kadu a rogo gu ngbatunga Masiya aye rogoho.​—Mt. 1:2, 16; Rk. 3:23, 34.

Wa vura duhe wo, fugo agu apangbanga nga ga ziazia kekeapai nayugo gupai nga si aaidanga boro du mbata ni kina bambata vungu ni kini ru kadu rogo gu ngbatunga nga gu Masiya nika ye rogoho te. Mo bingo bete agi akpiapai re:

Dagba awiri Yakobo yo (Yisaraere), bambata wiriko na Rea angia Rubena. Kusa, bambata wiri Yakobo na gu diako nangia Raere ko akpinyemuri akpi gbe, angia Yosefa. Ho Rubena amangi gbegberẽ pai ni, i afu gako padu kurii ũkumbo nga ga bambata vungu fu Yosefa. (Bam. P. 29:31-35; 30:22-25; 35:22-26; 49:22-26; 1 Peka 5:1, 2) Wa si avura du wo, Masiya aayengo rogo gu ngbatunga nga ga Rubena watadu ga Yosefa te. Ko aye rogo gu ngbatunga nga ga Yuda, nga guko nangia gu biama gude Yakobo avunguru na Rea.​—Bam. P. 49:10.

 Ruka 3:32 tangara gu kura angbadimokporo bisue nga gu Masiya aye rogoho. Si adu wa ka i ya i dunduko ni basasa angia bambata vungu fu avunguyo. Rogo gi gene re, Boaza abatika Obede, nga guko wiriko angia Yisai.​—Ruta 4:17, 20-22; 1 Peka 2:10-12.

Ono tie, gu wiri Yisai nangia Davide aangianga bambata vungu te. Ko nangia kiaro dagba agu awiriko nangia akumbagude naadu muambe. Ono wa si avura du wo, Masiya aye rogo gu ngbatunga nga ga Davide. (1 Sam. 16:10, 11; 17:12; Mt. 1:5, 6) Wakina gure a, gu kura boro Masiya aye rogo ngbatunga ni yo angia Soromo, wa ko aavuranga du ni bambata wiri Davide ya.​—2 Sam. 3:2-5.

Gipai re ayugongo gupai nga bambata vungu aadunga na nyanyakipaha ni te te. Bambata vungu anidu na nyanyakipa ni na ni aniye ki da ni gu boro nangera kurii aborokporo. Ni du nanaadia aũkumbo ni bakerehe wa bara ue.​—Bam. P. 43:33; Pa Rug. 21:17; Yos. 17:1.

Ono i anaadia padu kurii ũkumbo adia be boro ki fuhe fu gu kura boro. Abarayama adi gu rengo nga ga padu kurii ũkumbo be Yisamaere, ki fuhe fu Yisaka. A wa ani nibihe mbata, i adi padu kurii ũkumbo be Rubena ki fuhe fu Yosefa.

Awere, ani karaganga tirani ku rogo AEbere 12:16, nga gu naya: ‘Oni ningére wenengaĩ boro ka du ni irabari, watadu ni irabasapai [abinga agu apai du niziaziaha na nyanyakipaha ya, NW], wa Esau, nga gu ko nabagi gako ũkumbo tipa riahe rengbe na ri he bara sa.’ Ginipai Pauro aaida ka pehe?

Gu mokedi nangia Pauro aafuranga tipa gu gene ngbatunga Masiya aye rogoho te. Ko aazungodi aKristano i ‘mbakadi ruru agene tipa nduyo.’ Rogo gi gene re, ka i ‘atinga bungudu ti gu undahe nga ga Mbori’ ya, nga gu gbegberẽpai naaima rengba ka manga ka i atona manga wasiwasi kodaba. (Eb. 12:12-16) Ka i amangipai wo, ka i adu wakina Esau. Ko “aabinga agu apai du niziaziaha na nyanyakipaha” te, NW, na ko afutiko tipa agu apai nga ga borose.

Esau araki ti agu aregbo bakumba anidu nga gbia kurii gani ngbatunga, na ko aima rengba kadu na gu momu nga ga fu motumo fu Mbori. (Bam. P. 8:20, 21; 12:7, 8; Eyo. 1:4, 5) Ono mbiko gupai nga Esau adu na gu nyemuapai nga ga borose berãko yo, ko agamu agu amomu re dunduko tipa rãrã abapu. Si ima rengba kadu nga ko aaida ka ne gu rungosiro i apepaha nga si nika ye kurii atita Abarayama. (Bam. P. 15:13) Esau ayuguhe nitiko a nga berãko adu tipa kina agu apai nga ga borose, ki zanga du na tambuahe tipa agu apai du niziaziaha na nyanyakipaha ni roga ko adee ue nga apagano, nga gupai naaima ba gberãrago ti avungu ko. (Bam. P. 26:34, 35) Nairiwo gu ba kparakparapai naadu dagbako na Yakobo, nga guko nadi gu dee naairiso ndikidi Mbori!​—Bam. P. 28:6, 7; 29:10-12, 18.

Ringbisihe kuti agi apai ani nabihe re, ginipai rengbe ani kada kutini nibipa gu gene ngbatunga Yesu, nga Masiya aye rogoho? Ti kura aregbo, gu gene ngbatunga re anaaye aye rogo bambata vungu yo, ono angianga ti aregbo dunduko ya. AYudo aima ino gipai re na ki idi kutini, ho i abi gupai ni nga Yesu aye rogo gu ngbatunga nga ga Davide, nga guko nangia yangara wiri Yisai.​—Mt. 22:42.