Ga Davide Vura na Goriata—Ya Mo Si Amangi Nzunzu?
Kura aboro nabaka kina bangiriyo singia gu pangbanga du tipa Davide na Goriata nga ndikidi pangbanga watadu si gbua nga kungbo paturẽ. Wa mo naageda gi pangbanga re, ya mo ngbatunga berã niyengo wa gure ku berãro yo? Ka si du wo, mo wisigingo agi asanahe du kusende biata re.
1 | Ya mo bagizo kumba rengbe ka du nzunzu nga mbiribe sita na dagba bee sa ametere 2.9?
Ziazia Kekeapai nape gupai nga basona Goriata adu nga “bagiza mbiribe sita na dagba be sa.” (1 Samuere 17:4) Gure nga mbembedi na ametere biata. Kura aboro nagumba gupai nga, Goriata aasonanga wa gure te, ono mo berẽnga kurii gipai re: Ti gi gaani regbo re, gu yangara gbanga kumba i nake pako nga ametere 2.7. Ya mo si rengbe ka du nzunzu nga basona Goriata asusi ga gu kumba re na dagba be sa watadu ki sono ti gure? Goriata adu rogo gu ngbatunga nga ga Refaima, nga gu ngbatunga aboro aima inoyo ti wai i adu. Kekeapai nga ga aboro Ezipeta rogo 13 kama agarã agumba gupai nga, kura iiriwo akumba kinaho rogo gu ringara nga ga Kanana naaima sona ki susi ametere 2.4. Wa vura duhe nga Goriata aima sona ni kerehe, si nga gupai narengbe arengba ka manga.
2 | Ya Mo Boro Aduho Naaraki Nzunzu Nga Davide?
Regbo adu ho wene abawirikipai aasadi ka dia gupai kusayo nga boro adu kinaho naaraki nangia Davide, ono gipai re aima mbu tipa i mangihe. Agu aboro nageteka kuru ahe sende yo aima bi kuru kekeapai nga gu naafura tipa ga “Davide kporo.” Kurigure, Yesu Kristo aima fura tipa Davide ni ndikidi boro. (Matayo 12:3; 22:43-45) Agene angbatunga ue i nakepa ha nayugo Yesu ni masiya nga ko aenge ti Davide. (Matayo 1:6-16; Ruka 3:23-31) Si tie ziazia nga, Davide angia ndikidi boro.
3 | Ya mo ba aduho nzunzu gi pai re amangi rogoho?
Ziazia Kekeapai nape gupai nga, gi vura re amangi rogo Ngboongboorago Nga ga Era. Si nape kura pai berewe nga, aFereseto azi bataya ri bagangara bangbanda agu agbata ue nga, Azeka na Soko. AYisaraere adu tigayo kubani gi bagangara yo. Ya mo agi arago re nga ndikidi arago?
Gu kura kumba naandu ka bi gu rago re barambeda aya: “Gu boro naayugo gene furani naangianga boro pambori ya, andu na ani ku rogo gu Ngboongboorago nga ga Era. Ani adakpa tigu gene nandu na ani kina boro kurii ngbaõ tumbatumba rago yo. Wa ani aangera rii angboongboorago, ko aya furani ani gedi 1 Samuere 17:1-3. Ko a ya beko ku mbiti ngboongboorago yo ki ya: ‘Yo re ku garebe yo du i a gbirisi Soko ni.’ Ko ki sa tiko ki ya, ‘Yo re ku kumbabee yo du i a gbirisi Azeka ni. AFereseto azi bataya bangbanda agi agbata re bara yo re rii agu abaagangara oni abihe re. Si nangere wa ani ru rogo gu ba aYisaraere azi bataya rogoho.’ Mi naberã pa Saura na Davide i naru kina rogo gi ba ru mi rogoho re. Fuoho, ani ki zorõ ku sende yo ku rogo ngboongboorago, ki kuru rogo gu ba ime aima uguda rogoho kina ambia ki du yo. Mi naberãpa Davide ko ni ru herẽ tipa ka rogoda wiri ambia bisue, kuraha sa aimi Goriata.” Dungu kura aboro wakina gi kumba naandu ku rogo gi rago re aima du na ngbarago tipa gu ndikidi apangbanga i ake paha ku rogo Ziazia Kekeapai.
Ndikidi ndupai ho tipa ani du na tikö kuti gi pangbanga re te. Si nafura tipa agu aboro naima raka na aguyo du kina ti ni. Gu nyakipaha gbe nga, si nga papara gu buku ‘naye be ga Mbori Toro’, na si naye be gu Mbori nga ga rengo ko, nga gu Ko “arengba nga na re zire ya.”—Tito 1:2; 2 Timoteo 3:16.
Gere Ima Rengba a ka Ngba Tiro
ESSENTIAL BIBLE TEACHINGS
Wai du Rengbe Ani ka Ino Singia Baibiri Nga Rengo?
Ka si du nga Mbori du nga Baenge ke Baibiri, si naida si du kia ti gu kura abuku dunduko aboro akehe.
