Ka si du tie nga arungo ayengo be Mbori te, ginihe tie naye na bakere gomoro, gu rungo adigongo ya, kere avura, riri akaza, gbiati agberãngo? Fugo Mbori nga Ziazia Kekeapai yugu abangua apai biata nga gu naye na arungo kurii aboro:

1. Gbangbati, Ngbaduse, gbiati Sogote. “Boro nidu ni ni gbia ku ri kura ni ka imisa ni.” (Batungusipai 8:9) Dedede, aboro narungo mbiko gu gbangbati na zanga rengba nga ga akurayo.

2. Rago Gbia Kuti Mamu. Aboro narungo mbiko “rago gbia kuti mamu namanga fu yo dũ.” (Batungusipai 9:11) Naida ka ya, aboro rogo gbegberẽ ba ti gbegberẽ regbo ho béno amanga ni, watadu aboro namangapai zanga berãkuriihe watadu i namanga aingahe.

3. Gbegberẽ Bazogo Nazoga Zegino. Ziazia Kekeapai nayugo gu bambata ndupai ayugo ziazia aboro arungo ti ni. Si naya: “Zegino dunduko du ni zogozogo ho be gbegberẽ ko.” (1 Yoane 5:19) Gu “gbegberẽ ko” re nga Satana Bakitingbanga, kere boro ome ni toro naadu mbata ni ga Mbori maraika ono ko “anye nga na rengo te.” (Yoane 8:44) Kura amaraika akoditiyo na Satana na ki samungu kuti Mbori tipa ka pekafuo gayo nyemupai, rogo gi gene re, i asatiyo ni adaimona. (Bambata Pai 6:1-5) Naatona kina ti gu regbo Satana na gako adaimona asamungu re, i aima du na bakere ome gbiati gbegberẽ maapai kurii agu apai nga ga gi zegino re. Gu susi gbe nga ti gi gaani regbo re. Awere, Bakitingbanga na bakere zinga na ko ‘nananga aboro kpotosende no dunduko,’ du sangbanaha nga ‘rungo fu kpotosende.’ (Yugoti 12:9, 12) Nirengo, Satana nga gu kere gbegberẽ bazogo nazoga aboro ngbaome. Ko nagbia bakere ngbarago ti gu rungo nga ga aboro. Satana du nasa aboro i naarungo​—angianga Mbori ya.

MO MAKIANGA GIPA RE: Kina gu boro adunga nunga ti ni ya, kere bamangi gbegberẽ apai rengbe ka sa aboro wenesa i naarungo. Ziazia Kekeapai nape gupai du kia ti gure, si naya: “Mbori nga nyemuse.” (1 Yoane 4:8) Ringbisihe kuti gi sinoko nga ga nyemuse re, “ka manga gbegberẽpai, si turũ ti Mbori, na ti gu Ko du na tandu apai dũ, ka manga irairapai!”​—Eyobo 34:10.

Wa vura duhe wo, mo ima rengba ka bakabangiro nga, ‘Tipa bagizo regbo wai gu Mbori Duna Tanduapai Dũ nika mbu Satana ko naandu kumbatayo na gako gbegberẽ zogarago?’ A wa ani nabihe, Mbori ima soga gbegberẽ apai, na gaani arungo naye na bakere gberãrago fuko. Kurigure, Fugoko nangarasa rani nga: “Oni bá agu apai nafuda roni ku auru ko yo; mbiko ko naberã pa roni.” (1 Petero 5:7) Mbori nakpinyemu rani na ko na ome ka dia arungo dunduko gbiati iraira sarangbanga, a wa gu kekeapai ngbefuo gere nika sakapai tipaha. *