NGA GI BAWENE MAABANGIRISE! Bakusirani ima kidohe ka fu nyenye unga furani kina auru kpotosende herẽ. Ono tie, kura dungu aboro aidanga kuti gi maabangirise re te. I nagumba gupai nga, ‘aboro dunduko nika kpi akpi.’ ‘kinawo si adu nga, aboro ta raka kini kpiki.’ Kura aboro nabihe nga, boro ima rengba ka raka nyeanye kindi, ono angianga auru kpotosende ane ya. I nagumba gupai nga, boro nagbia nyenye unga fuo ni kpi ki ga ku ngbangbaturũ yo. Gamo bipai nga gine?

Mbata fu mo karagapai kuti gi sanahe re, mo bingo akaragapai nga ga Ziazia Kekeapai kuti agi asanahe re: Wai du gu gene i amangi boro ngbaha ayugo pa bagizo wai boro arengbe ka raka? Gine nangia ga Mbori ringbisapai tipa kpotosende gbiati aboro? Wai du kpio aye kurii wiri aboro?

Dagba agu ahe Mbori akusihe ku auru kpotosende, kina aboro sa du kia. Wai duhe wo? Ziazia Kekeapai nayugo gupai nga, kina aboro sa i akusiyo ni “kpia” Mbori na ‘wa kina ko’ (Bambata Pai 1:​26, 27) Ginipai gipai re ayugoho? Si nayugo gupai nga, Mbori afu asino fuyo na agene mangaapai wakina gu du tiko, wa gu nga, nyemuse na rurupai.

Kurigure, i akusi aboro na gu rengba nga ga berã na berãkurii apai, gbiati pa inoyo pa kparaka rurupai ti gbegberẽhe na nyemu ka ino Mbori na ka du na pagume na ko. Gere nga ndu gupai du ani ti ni na tambuahe tipa agu ahe ko akusihe wa, haurago na wenewene kpia arago, kura kusikusi ahe, manzigo, gbiati wene siakasiaka afugo. Kurii agipai re dunduko, aboro na gu kparakpara momu nga ka sonosa pagume na Bakusiahe. Ngbatunga agi asino re nasa aboro i du kia ti kura kusikusiahe du auru kpotosende.

Ono mo berẽnga kurii gipai re: Ya mo Mbori arengbe ka kusa aboro na gi wene asino re, gbiati gu momu nga ga sonosaha na kini kiisihe, ka si adu nga ko akusi rani ani raki gbua tipa bete agarã? Gu rengo duho nga, Mbori akusi aboro na agi asino re gbiati gi rengba na apai re tipa ani gbia ngbarago rogo raka auru kpotosende herẽ nyeanye kindi.

Ono tie, kura aboro naya, Mbori aaringbisanga ha nga aboro raki nyeanye kindi te. I naberãha nga i ambakadi kpotosende tipa aboro raki auruhe tipa bete regbo, tipa i asadi aboro rogoho tipa ka bi agu aboro rẽ ka ga ku ngbangbaturũ yo ka raka na Mbori nyeanye kindi. Ono ka si du nga rengo du nangia gipai  re, ya mo ka gipai re sa nga Mbori ko du ni mburu gu gbegberẽ apai na irairaapai hi auru kpotosende areme te? Ka gipai re natagbagatihe na wai du Mbori ni tiko. Ziazia Kekeapai naya tipa ko: “Gako manga sunge du ziazia; bambiko gako apai dunduko du ni ruru sarangbanga. Mbori nga irayososopai zanga irairapai, nga irarengo ni ruru ko.”​​—⁠Pa Fu Rugute ni Ue he 32:⁠4.

Ziazia Kekeapai nayugo ga Mbori bambata ringbisapai tipa kpotosende rogo agi afugo re: “Angbangbaturũ nga ga Yekova angbangbaturũ, ono kpotosende ko afu fu awiri aboro.” (Atambuahe 115:16) Ni rengo, Mbori akusi kpotosende si du ni wenehe, ni nyenye ba fu wiri aboro, na ko ahiisi he na ngbatunga agu ahe dunduko ani aidaha tipa ka raka na ngbarago nyeanye kindi.​​—⁠Bambata Pai 2:​8, 9.

“Angbangbaturũ nga ga Yekova angbangbaturũ, ono kpotosende ko afu fu awiri aboro.”​—⁠Atambuahe 115:⁠16

Ziazia Kekeapai ima fura ziazia tipa ga Mbori ringbisapai tipa aboro. Ko agumba gupai fu bambata arogotise nga “Oni zúga azuga, ki nge ange, ki hisi kpotosende berewe ki zogo ho; ki nikindo auru agu. . . unga anya dunduko nawo awo auru kpotosende.” (Bambata Pai 1:​28) Nga gi bakere momu i adu na ni nga ka ngerafuo agu ahe re na ka kiiso gu Paradizo re auru kpotosende! Nirengo, gu maabangirise Adamu na Eva gbiati agu awiriyo ka i avunguyo adu na ni nga ka raka nyeanye kindi auru kpotosende herẽ, angianga ka gbia mosoro ngbangbaturũ yo ya.

Tipagine tie ani akpi ti ni? Ziazia Kekeapai nayugo gupai nga kura ga Mbori maraika sa, naye ka da kusa nga Satana Bakitingbanga, aasadi ka rugusa ga Mbori mbakadapai Edene yo. Ngba gini gene?

Satana anangi bambata atitarani, Adamu na Eva, i koditiyo na ko kuti samungu kuti Mbori. Ho Satana aya ni Mbori naka aka na wenepai beyo​—⁠gu rengo nga i diberã ni tiyo tipa gupai du ni wenehe na gu du ni gbegberẽhe​​—⁠i diberã ka ngbe na Satana na ki samungu kuti Mbori. Sangbanaha angia gine? Fuo bete regbo kusa, i akpiki, kina wai Mbori afu zahe fuyo. I azanga gu maabangirise nga ga raka nyeanye kindi rogo Paradizo auru kpotosende.​—⁠Bambata Pai 2:​17; 3:​1-6; 5:⁠5.

Ga Adamu na Eva samungu na sangbanaha kurii aboro dunduko da kuti gi gaani regbo re. Fugo Mbori naya: “Gbegberẽpai akuru ku zegino mbiko boro sa [Adamu], kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.” (ARomo 5:​12) Ani nakpi mbiko ani adi ingapai na kpio ti bambata avungurani, angianga mbiko Mbori aima ‘ringbisapai’ tipa rani ya, nga gupai ka boro agianga rogoho yo ya te.

Gu samungu namangi Edene yo aarugusanga ga Mbori bambata ringbisapai tipa wiri aboro na kpotosende te. Ga Mbori rengberengbe nyemuse na rurupai asako ko zaki rani be gu ingapai na kpio ani adihe. Gu mokedi nangia Pauro asakihe wa gere: “Mosoro ingapai nga kpio; ono ga Mbori gamunihe gbua nga nyenye unga rogo Kristo Yesu yo gaani Gbia.” (ARomo 6:​23) Mbiko nyemuse, Mbori “afu bangisa Wiriko [Yesu Kristo], ya gu ni ka idi pa ko ni kpi nga te, ono nyenye unga du adu be ni.” (Yoane 3:​16) Ni fuko tiko na nyemuhe ni motumo tumorii, Yesu atumo kuba agu apai dunduko nagberẽ mbiko Adamu. a

Barambeda, ga Mbori kidohe tipa Paradizo kpotosende nika da ti rengo. Gi bawene raka kumbatayo re ima rengba ka du ni gamo ka mo di gu ga Yesu rugute kugume nga: “Oni rími rogo pangipangi ngbadimo; bambiko gu ngbadimo na gu gene nangbe koyo du kpio ni, si du ni kikii he, ni basisi he, dungu aboro narima koyo. Bambiko gu ngbadimo na gu gene nangbe koyo du unga ni, si du ni pangipangi he, ni fitikiri he, aboro nabi he ni kina umba yo.” (Matayo 7:​13, 14) Nirengo, gamo raka kumbatayo naru kina rii gamo siapai. Ginipai mo nika mangaha?