1, 2. Wai du gu mokedi nangia Pauro ayugu gako tambuahe tipa ga Mbori weneringise arẽnga aboro tipaha ya?

GU Mokedi nangia Pauro aima rengba ka pe gupai nirengo nga: “[Ga Mbori] undahe i amoi ku ri re si adu nga gbua te.” (Oni gedi 1 AKorindo 15:9, 10.) Pauro aima inoho nga ko aamanganga sunge amanga tipa ka gbia ga Mbori bakere inapai te na ko aarẽnga tipaha a te, mbiko ko adu mbata ni gu boro naarungosi aKristano.

² Ho Pauro aambeda ni ka kpi, ko akepai fu gako badiasunge nangia Timoteo nga: “Mi natambua gu ko naunda re, nga kina Kristo Yesu gaani Gbia, mbiko ko aberẽ he ya irarengo nga mi, ki asia pa gako sunge fere.” (1 Tim. 1:12-14) Ginihe nangia gu sunge re? Pauro ape gupai si akodaha fu agu abaakumba naadu rogo gu dungurati naadu Efesa yo nga: ‘Mi akiisa nga ungare te, mi ki rengbe na digisa gu pai mi ni namaa bangire kuti ni, na gu sunge mi adi be Gbia Yesu, mi nitungusi gu wene pangbanga nga ga Mbori undahe.’​—Amo. 20:24.

3. Gini kparakpara sunge i afuhe fu Pauro? (Oni bi gu sura du ti tonatonaha.)

 ³ Gini “wene pangbanga” du Pauro atungusihe nayugupa ga Yekova weneringise arẽnga aboro tipaha ya? Ko ape gupai fu agu aKristano naadu Efesa yo nga: “Oni gi pa gu mangapai Mbori afu he fere mbiko gako undahe, tipa roni.” (Ef. 3:1, 2) I afu gu sunge fu Pauro nga ko gbandaka wene pangbanga fu agu aboro naangianga aYudo ya tipa wa ka i du dagba agu aboro i ayamba yo i du na Kristo rogo gu Kindo nga ga Masiya. (Oni gedi AEfeso 3:5-8.) Mbiko gu kakaka nyemu tungusapai naadu ti Pauro, ko amoi wene kpiapai fu agu aKristano du awere na ki yuguhe nga Mbori aayugongo gako weneringise fuko “gbua te.”

4, 5. Tipagine du rengbe ani ti ni ka ya gu “wene pangbanga nga ga ngbi,” kinaha a nga gu wene pangbanga nga “ga Mbori undahe”?

⁴ Rogo gi yangara arame re, i ima fu gu sunge fu ga Yekova aboro nga i tungusi gu “wene pangbanga nga ga ngbi . . . rogo zegino dunduko mbiko ndika fu arikaaboro dũ.” (Mt. 24:14) Gu pangbanga ani agbandakaha re berewe a nga “gu wene pangbanga nga ga Mbori undahe” mbiko agu amaku dunduko ani amaabangirani tipa ka gbiaha tii gu zogarago nga ga Kindo naye furani vurube ga Yekova weneringise ko ayuguhe rogo Kristo yo. (Ef. 1:3) Ya mo ani nawirika Pauro wadu ani ni basasa dũ niyugo tambuahe tipa ga Yekova weneringise arẽnga aboro tipaha ya ni tungusa ani pai kakaka?​—Oni gedi ARomo 1:14-16.

⁵ Rogo gu kekeapai naaye mbata fu gere, ani awiriki gu dungu agene ani agbia undo ti ga Yekova weneringise arẽnga aboro tipaha ya wangia ani aboro ingapai. Sidu tie, si ni nyanyakipa sunge furani tipa ka yugo wai fu aboro Yekova ayugo gako nyemuse na wai i narengbe ka gbia undo ti ni. Gini apapara ga Yekova weneringise arẽnga aboro tipaha ya si aida ani undo kura aboro i inihe?

6, 7. Ho ani asakapa ga Yesu motumo ni fu aboro, wai du ani agbandaka gu wene pangbanga nga ga ga Mbori weneringise arẽnga aboro tipaha ya?

⁶ Rogo gi zegino aboro abi apai taata rogoho re, aboro abingo pa manga ingapai ni gbegberẽ pai te, sidu, dunguyo ainongo gu ndupai si aida i tumo aboro ti ni te. Ti kina gu ngisa regbo re, dungu aboro ima bi gupai nga gu raka nga ga ingapai ayengo na ndikidi ngbarago te. Dungu aboro ainongo pai tipa guhe nga ingapai te, gupai si amanga rani na ni, na gupai si aida ani mangihe tipa ka bata be gu sunge kanga nga ga ingapai a te da kinaho i afura ni na aDezire Yekova. Agu aboro nakpinyemu rengo na ngbarago ka ino gupai nga mbiko ga Yekova bakere nyemuse gbiati gu weneringise arẽnga aboro tipaha ya, ko akedi Wiriko ku auru kpotosende no tipa ko batasi rani be ingapai na surungbaha nga kpio.​—1 Yo. 4:9, 10.

⁷ Ho Pauro afura ni tipa Wiri Yekova ko akpinyemuko, ko akepai nga: “Bambiko tumori du fu rani rogo Kristo yo mbiko kureko vu rani ti tiandika, ku sangba gu ũkumuko yo nga ga Mbori undahe.” (Ef. 1:7) Ga Kristo motumo nga gu bakere gopai nayugo ga Mbori nyemuse tipa rani na si nayugopa bakio Gako weneringise arẽnga aboro tipaha ya. Nairiwo gu ngbarago ani agbiaha ka wirika gupai nga ka ani du na idapase kuti gu kure Yesu i aukaha, i mbupai ambu furani ti gaani aingapai na sangbakpotoraniyo kidu ni gigirihe! (Eb. 9: 14) Wene pangbanga du ngaha nirengo si aida ani yuguhe fu kura aboro!

8. Tipagine du si aida aboro ingapai mbakadipai ti ni dagbayo na Mbori?

⁸ Ani na gu sunge berani nga ka yugo gupai fu kura aboro nga i rengbe arengba kadu na wene pagume na Bakusiyo. Mbata fu aboro du na idapase kuti ga Yesu motumo, Mbori nabiyo ni avurako. Gu mokedi nangia Yoane akepai nga: “Gu ni ka idi pa Wiri nyenye unga du adu be ni; ono gu ni ka gia nga sangba Wiri ya, ni bi nga unga te, kina ga Mbori zinga nye ri ni.” (Yo. 3:36) Si ni pangbarago nga, ga Kristo motumo nasaha taata furani ani mbakadipai dagbarani na Mbori. Pauro aya: “Oni, ko azeresi roni awere, nakpara ti ko tigaoni mbata ni avurako na gaoni berã mbiko gaoni gbegberẽ mangaapai, rogo boro pasioko mbiko kpio.”​—Koro. 1:21, 22.

9, 10. (a) Gini sunge du Kristo afuhe fu mbedimbedi awirinako? (b) Wai du “gu kura akandoro” aundo mbedimbedi awirinayo?

⁹ Kristo ima fu gu sunge fu gu mbedimbedi abakureako du auru kpotosende ane nga gu Pauro ayambuhe nga ‘gu mangapase nga ga zeresapai.’ Tipa ka saka rogo gipai re yo, Pauro akepai fu gu mbedimbedi aKristano naadu rogo bambata sa kama agarã nga: “Agu apai re naye yo du Mbori ni dunduko nga gu ko nazeresi rani kuti ko rogo Kristo yo, ki asia pa gu mangapase fu rani nga [ga] zeresapai; . . . ya Mbori adu rogo Kristo yo nizeresi aboro zegino kuti ko, ka ko ageda nga gayo tiandika kuti yo ya, ko naasia pa zeresapai fu rani. Ani nga amokedi tie ku ba Kristo, wa ka Mbori azungadi he ku ngbarani. Ani nazungadi roni ku ba Kristo, oni zéresi tironi fu Mbori.” 2 Kor. 5:18-20.

¹⁰ “Gu kura akandoro” nabihe ni pa momu ka undo mbedimbedi awirinayo na gi sunge re. (Yo. 10:16) Ka pepai ni masaku, i namangasunge ni moundo amokedi, na i du namanga bakere gu sunge nga ga yugo rengo fu kura aboro na ka undoyo i du na pagume dagbayo na Yekova. Gere nga nyanyakipa papara gu sunge nga ka manga dezirepai sirisiri tipa gu wene pangbanga nga ga ga Mbori weneringise arẽnga aboro tipaha ya.

11, 12. Tipagine du duhe ti ni ni wene pangbanga fu aboro i wiriki gupai nga i rengbe arengba ka kpara fu Yekova?

¹¹ Badungu aboro nakparakpee mbiko si nasayo i du wenengai, ono i aidanga kuti gupai nzunzu nga Mbori nagia gayo akpee agia te. Si naida i ini gupai nga Yekova “ninagia kpetambuahe.” Gu bake papara Atambuahe nangia Davide akepai nga: “Ako mo nga gu ko ninagia kpetambuahe! Aboro dunduko nikaye koyo du mo ni bambiko irairapai. Ho gaani samungu naadia ni be rani mo ninavu rani.”​—Tam. 65:2, 3.

¹² Yesu agumba gupai fu gako abawiriki nga: “Ka oni kpari pa gu he fere ni rimore, mi mangi gu amanga re.” (Yo. 14:14) Si tie ziazia nga gu fugo nga “gu he” nayugopa guhe du na ngbanya dagbaha na gupai Yekova akpinyemuhe. Yoane akido rani nga: “Gere ani rengbe ka du zukazuka fu ko, nga, ani ini ka ani ho gu he ku sangba gako nyemuhe yo, ko gi pa rani agia.” (1 Yo. 5:14) Nairiwo wai ngbaha ka yugo gupai fu kura aboro nga, anga kparakpee gbua nga guhe naundo boro berãni yo te ono si nga nyanyakipa gene ka mbeda na ga Yekova “mbatabakindo nga ga undahe”! (Eb. 4:16)  Ani rengbe ka undoyo i mbedi na Yekova na ki gbia wasa ti kere regbo ni yugo ani pai fuyo i kpari ngba wene gene, fu gu Boro nzunzu si aida i kpari funi, na tipa agu ahe daada.​—Tam. 4:1; 145:18.

13, 14. (a) Gini iˈiriwo momu mbedimbedi aKristano nika du na ni kumbatayo? (b) Gini wene sunge mbedimbedi aKristano nika mangaha fu aboro?

¹³ Ga Yekova weneringise arẽnga aboro tipaha ya adigongo kina ti digido gi gbegberẽ zegino re te. Ho Pauro afura ni tipa gu bakere momu Mbori nafuhe fu agu aboro nga 144,000 i ayamba yo i zogorago na Kristo rogo gako Kindo ngbangbaturũ yo, ko akepai nga: “Mbori, nakumuko ni inapai, mbiko gu gako bakere nyemuse ko akpi nyemu rani ni, zavura ho ani akpi ni mbiko gaani tiandika, ko amongo ungasi rani na Kristo (bati oni mbiko undahe), ki zingisi rani na ko, ki ya ani sungu na ko rogo agu arago du ngbangbaturũ yo, rogo Kristo Yesu yo, ya ko yugu gu babakere kumuko du ti gako undahe ni weneringise fu rani rogo Kristo Yesu ni agu arago nikaye.”​—Ef. 2:4-7.

¹⁴ Si ima kpakara ka ino gu iˈiriwoapai Yekova nambakadihe tipa mbedimbedi aKristano ho i nika sungo ni ri ambatabakindo ka zogarago na Kristo ngbangbaturũ yo. (Rk. 22:28-30; Frp. 3:20, 21; 1 Yo. 3:2) Tipa yo gbe, Yekova nika ‘yugo gu babakere kumuko du ti gako undahe.’ I du nika ngia “Vovo Yerusarema,” nga gu dee Kristo nika dia ri. (Yugo. 3:12; 17:14; 21:2, 9, 10) I nika mangasunge na Yesu tipa ka “husa arikaaboro,” kini yugu gene fu aboro giasangba i kuru tii gu tindiro nga ga ingapai na kpio na ki sayo i da ni rengberengbeyo.​—Oni gedi Yugoti 22:1, 2, 17.

15, 16. Wai du Yekova nika yugo gako weneringise arẽnga aboro tipaha ya fu “gu kura akandoro” kumbatayo?

¹⁵ Rogo AEfeso 2:7, ani nageda gupai yo nga Mbori nika yugo gako weneringise arẽnga aboro tipaha ya rogo “agu arago nikaye.” Zanga kapa, ga Yekova aboro auru kpotosende nika bi “gu babakere kumuko du ti gako undahe.” (Rk. 18:29, 30) Gu kura bakere gene sa Yekova nika yugo gako weneringise auru kpotosende ane ngbaha nika ngia ka zingisa aboro be kpio rogo “amurã yo.” (Eyo. 14:13-15; Yo. 5:28, 29) Gu ruru aboro naakpiki mbata fu ga Kristo motumo kodihe na “gu kura akandoro” nakpi ni ruruyo ti yangara arame, i nika zingisayo be kpio i ki nimangisunge fu Yekova.

¹⁶ I nika zingisa agu amirioni aboro azingisa a naakpiki zanga i inipai tipa Mbori. I nika fu momu fuyo tipa i rani goyo fu ga Yekova bakere pagbia. Yoane akepai nga: “Mi ki bi agu yo naima kpika, nga kikindigi pa yo na umba pa yo, i niru barangba mbata sapangbanga, i ki za akitabu. I ki za gu kura kitabu nga kitabu unga. I ki sapu ngbanga agu yo naima kpika kuti agu apai du ni keke he rogo akitabu, ringbisi he kuti gayo mangaapai. Baime ki gasi agu akangba nadu rogo ho, kpio na Adisi ki gasi agu akangba nadu rogo ho; i ki nisapu ngbanga aboro dunduko ringbisi he kuti gayo mangaapai.” (Yugo. 20:12, 13) Rengo ngaha nga, agu aboro i nika zingisayo, si nika ida aida i wiriki wai ka mangapai kuti agu arengo nga ga Mbori du rogo Ziazia Kekeapai yo. Kurigure, si nika ida i pekefuo gu vovo wene arugapai nika kura rogo “kitabu” nga gu nika yugo gupai Yekova akpinyemuhe be aboro tipa i raki rogo vovo zegino. Pa kusa Yekova agu apai du rogo agu akitabu re nga gu kura gene nika  yugo gako weneringise arẽnga aboro tipaha ya.

17. Ginipai si aida ani moihe ku berãraniyo ho ani amangasunge dezirepai ni?

¹⁷ Wa digido gi zegino re ambeda, gu nyanyakipa sunge du berani nga ka tungusa gu wene pangbanga nga ga Kindo! (Mk. 13:10) Kango ti ni te nga, wene pangbanga nayugo ga Yekova weneringise arẽnga aboro tipaha ya. Si naida ani moi gipai re ku berãrani yo ho ani amangasunge dezirepai ni. Gu ndupai ani atungusapai ti ni nga ka fu iriso fu Yekova. Ani rengbe ka manga gere niyugo ani gupai fu aboro nga agu amaku dunduko Yekova nakidopaha ku rogo vovo zegino si nayugopa gako weneringise.

18, 19. Wai du ani ataasa ga Yekova weneringise arẽnga aboro tipaha ya?

¹⁸ Wa ani amanga dezirepai fu kura aboro, ani rengbe ka saka gupai fuyo nga, tii gu Kindo nga ga Kristo, aboro nika gbia undo ti ga Yesu motumo ni bakerehe gbe na i nika da yeeye ni rengberengbeyo. Ziazia Kekeapai naya: ‘I abatasa ũzegino tigaha a be du ni ga zirã kanga sa kura gu taarimo nga ga awiri Mbori.’ (Rom. 8:21) Gipai re nika manga sa kina mbiko ga Yekova bakere weneringise.

¹⁹ Ani na gu momu berani nga ka tungusapa gu wene akidohe du rogo Yugoti 21:4, 5 fu agu aboro dunduko nika degatuyo: “[Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.” Na Yekova nga guko sungu auru mbatabakindo ki ya: “Oni ngére, mi nambakada ahe dunduko ni vovo ho.” Ko ki pe kurapai berewe nga: “Mo ké agi apai re, bambiko si nga ruru he nga rengo a.” Ho ani atungusa gi wene pangbanga ni re fu aboro zaaza, ani nataasa ga Yekova weneringise arẽnga aboro tipaha ya!