Gupai Aboro Agumbaha Tipa Manga Kparakpee
“Ho mi amanga kparakpee ni, mi nabihe nga Mbori kina patire, ko nazio bere na kini ngbe fere kumbatayo ho mi abihe ni nga mi ima inga.”—MARÍA.
“Diare akpi tingbafuo ri sovura na kansa tipa agarã 13. Mi natingida gupai nga mi anaamanga kparakpee fu Mbori na aˈuru dunduko na kini bihe nga ko nadega tuko adega kuti gimi aigirã. Gupai re aima fu zereda fere.”—RAÚL.
“Kparakpee nga bawene gamahe be Mbori fu aboro.”—ARNE.
Kparakpee nga kparakpara gamahe fu María, Raúl, Arne, na kura badungu aboro. I nabihe nga vurube kparakpee, i ima rengba ka fura fu Mbori, ka tambua ko, na ka gbata gako undo. I ima ida kuti gupai Ziazia Kekeapai agumbaha tipa manga kparakpee fu Mbori na ngbaduyo yo dunduko: “Mbiko gere ani rengbe ka du zukazuka fu ko, nga, ani ini ka ani ho gu he ku sangba gako nyemuhe yo, ko gi pa rani agia.”—1 Yoane 5:14.
Badungu aboro nabihe ni kpakarakpakaraha ka ida kuti gupai Ziazia Kekeapai agumbaha tipa kparakpee. Steve nagumbapa wai ko aabi manga kparakpee. “Ho garãre ada ni nga 17, abakureami biata akpi mbiko abéno ue ni bakiakia. —Gu kurako sa akpi mbiko gu béno nga ga tarambiri, na aguyo ue ki kpi ku ime yo.” Ginipai Steve amangihe? “Mi akpari fu Mbori tipa ka ino ndu gupai agi apai re amangi ti ni, ono mi aagbianga karagapai te. Sidu, mi asana ti re nga, ‘Tipagine si aida mi kpari ti ni?’” Badungu aboro ima bihe nga i akaraganga pai kuti gayo akparakpee te, na gipai re kini sa yo i bakibangiriyo singia ndupai ho si aida i mangi kparakpee ti ni.
Kura nduapai kina ho a nasa kura aboro i bihe nga kparakpee aundongo yo te. Kura aboro nagumba gupai nga wa du he nga Mbori ima ino apai dunduko, ko ima ino gaani akpakarapai, sidu, ndupai ho tipa ka gumbaha fu ko te.
Agu akurayo idi kuti gupai nga Mbori naka aka ka degatuko kuti gayo akparakpee mbiko agu aingahe i amangihe bakuru kusayo. Jenny agumba gupai nga “gupai du tipa re nga mi naabi tire nga sunge tire te. Mi ima manga agu apai mi aye ka bira tire ti ni kusa, sidu, gupai re nasa re mi idi kuti gupai nga si aidanga Mbori degetuko fere te.”
Wai gu mo abi manga kparakpee? Ka si du nga mo aima du na ngbatunga akapa wa gure tipa kparakpee, mo ima rengba ka gbia wasa ni ino mo gupai nga Ziazia Kekeapai rengbe arengba ka fu wene akaragapai foro. Ani ima rengba ka du na kido kuti gupai Ziazia Kekeapai agumbaha tipa kparakpee; * si ima rengba ka undo ro mo gbia akaragapai kuti asanahe wa gu nga:
-
Ya mo Mbori nadegatuko kuti gaani akparakpee?
-
Tipagine Mbori akaraganga pai ti ni kuti kura akparakpee ya?
-
Wai gu rengbe mo ka manga kparakpee Mbori ki degetuko kuti ni?
-
Wai gu rengbe kparakpee ka undo ro?
^ ekeb. 9 Badungu agu akparakpee nga ga ga Mbori amoyambu du rogo Ziazia Kekeapai yo, kodihe na gu nga ga Yesu Kristo. Kuru Ndika na akparakpee rogoho niima susa 150.
Gere Ima Rengba a ka Ngba Tiro
AGU ASANAHE PARANGA ABORO NAASANAHA
Tipagine si Aida Mi Naamanga Kparakpee Ti Ni?
Ya mo kparakpee ni guhe gbua boro amangaha tipa kadu wenengai berãni yo watadu si nga gupai naima susa gure?
NGBAÕBAMBU SINZIRI
Ya Mo Si Naida Mo Naakparakpee?
Mbori nakaragapai kuti akpee zanga manga iiriwoapai.
