FU AVUNGUAGUDE
7: Gene Mangaapai
GUPAI SI AYUGOHO
Gene mangaapai nga agu arugute boro asiaha ni ti ni kaa raka kuti ni. Ni kpiapai, ya mo mo naamanga ome tipa kaa raka ni ruru ro rogo apai yo dũ? Sidu, si nawira wa mo naida ka rimiso kina ngbatunga gu wene mangapai re kurogo awiro yo.
Gene mangapai a nakoda ruru arugute. Ni kpiapai, gu boro du na nyanyaki arugute beni, ni ngangarã, ki du ni ruru ni, na kini berãpa kura aboro—gere nga agu asino si aida boro sonosihe mbu ni kindi ni gude.
BANGUA RENGO NGA GA BAIBIRI: “Oni sónosi gude rogo gu pai ka ni ndu ngba ha, ho ni ka gbinza ni ka ni agúari nga ngba ha ya.”—Asanza 22:6.
NDU GUPAI DUHE TINI NA NYANYAKIPAHA
Rogo agi agarã nga ga sona kumbatayo rogo birĩ-ino-mangaahe re, ruru mangapai na nyanyakipaha. Nagude du rimori nga Karyn aya, “boro ima rengba ka gbia gbegberẽ maapai kurii rogo terefuni ti ai regbo. Awirani ima rengba ka sungo kina pati rani kini bi agu ahe angbanga ya!”
BANGUA RENGO NGA GA BAIBIRI: “Sosono aboro. . . rengbe gayo berã na wisiga pa wenepai na gbegberẽpai.”—AEbere 5:14.
Ruru mangapai na nyanyaki paha a. Gipai re nakoda mangasunge na gu taata iriiri afugo (du wa “mi nahõpai beroni” na “tambuahe furoni”) na kini berãpa kura aboro—nga gu sino akionga gbe ya, wa si awira wa aboro naberã kina pa gayo aterefuni ki susi berãpa aboro.
BANGUA RENGO NGA GA BAIBIRI: “Wa oni akpi nyemu aboro nimangi fu roni, oni mángi he fu yo kina wo a.”—Ruka 6:31.
GUPAI RENGBE MO KA MANGAHA
Mo pe pa gamo gene ruru mangaapai. Ni kpiapai, wetekapai nayugo gupai nga si nangera wa sosono agude ima rengba ka zanga rimiso tiyo ku rogo kodaba mbata fu rogatise ka si du nga i ima pe gupai fu yo ziazia nga gu ngbatunga mangapai re ni gbegberẽhe.
BERÃPAI : Mo mangisunge na gupai mangi barambeda tipa ka tona sakapai tipa gene mangaapai. Ni kpiapai, ka apangbanga tingidi pa gu gbegberẽ mangapai mangi, mo rengbe ka ya: “Nagberẽ gu gene kura aboro ayugo zinga ngbaha fu akurayo. Mo nabihe nga ginipai nasa kura aboro i du wa gure?”
“Si ima nyaka fu agude i sia gupai du ni wenehe na gu du ni gbegberẽhe ka si du nga i ainongo gupai du ni wenehe na gu du ni gbegberẽhe te.”—Brandon.
Mo yugu gene ruru mangaapai. Zavura rukutu agude, i ima rengba ka wirika kaa pe gupai nga “mi nahõpai beroni” na “tambuahe furoni” na kini yugu berãpa kura aboro. Buku sa du rimoho nga Parenting Without Borders aya, “ka agude ini gupai nga i a na kina sunge kurii yo si aida i mangihe rogo gayo ngbadimokporo, sukuru yo, rogo gu dagbarago i araka rogo yo, si nika sa gupai nga i yugu wene asino nga gu ni ka undo aboro dunduko, angianga kaa berã kini pa tiyo sa ya.”
BERÃPAI: Mo naafu asunge kporo fu awiro tipa i naamangaha tipa ka wirika nyaka pa mangasunge ka undo kura aboro.
“Ka awirani inidi tiyo na manga asunge awere, si kpakaranga fu yo ho ka i araka ni nisayo te. Pa manga asunge nika du fuyo ni gupai i aima inido tiyo na ni rogo gayo raka yo.”—Tara.
