GU KITABU nga Yugoti, si na agu afugo rogoho nayugopa kura apai. (Yugoti 1:1) Ni kpiapai, si nafura tipa debari du na gu rimo nga “Babera du ni bakere he” ni kekehe ti ngbandia kpakpuri. Ya yó tipa gi dee re wẽ ri sungu auru “rimbasa aboro, na arikaaboro.” (Yugoti 17:1, 5, 15) Wa duhe nga ndikidi dee arengbanga ka sungo rii rimbasa aboro na rii arikaaboro te, gi dee re nga ndikidi dee te, ri narukuba kura he. Ginihe tie ri arukubaha?

I fura tipa gi bangisa dee re rogo Yugoti 17:18 ya ri nga “bakere bakporo, nga gu nazoga abakindo zegino.” Gu fugo nga “bakporo,” si nayugo gupai nga, gu dee re namangaapai ni mbakadimbakadihe ti genehe wa gu abazogo naamangaha rogo abaagbata. Wa duhe nga gi “bakporo” re na ome behe kurii “abakindo zegino,” si nayugo gupai nga gi bakporo re nga riigbu namaa apai kurii aboro rogo dungu aringara. Gini riigbu ngaha? Si nga gu riigbu nga ga pambori. Mo bingo wai agu apai du rogo Yugoti ayugo gupai furani nga gu dee re nga gu riigbu nga ga pambori.

Gi dee du rimori nga Babera re, ri arengbanga kadu nga  gu riigbu nga ga birĩ-zogarago te, mbiko Ziazia Kekeapai naya wẽ “abakindo zegino,” watadu aboro-birĩ-zogarago “amangi bari na ri.” Ri namanga bari ni zio ri bakure na abazogo zegino na ri namanga ngbatunga apai dunduko tipa kadu na ome kuriyo. Si du i ayamba ri ti ni nga “debari.”—Yugoti 17:1, 2; Yakoba 4:4.

Babera arengbanga kadu nga gu riigbu nga ga bagaahe te mbiko ‘ababagiahe’ nika rungo be pakpiori ho i ka imo ri ni. I fura tipa ri berewe ya ho i ka imo ri ni, abakindo gbiati ababagiahe nika ‘ru tuturũ’ kaa ngana kangbari. (Yugoti 18:3, 9, 10, 15-17) Sidu, ruhe aru ani ya ri nga gu riigbu nga ga pambori, angianga gu nga ga birĩ-zogarago watadu gu nga ga bagaahe ya.

Gu kurapai berewe nayugo gi dee re ni gu riigbu nga ga pambori nga, gu fugo i agumbaha tipa ri ya ri ‘anangi arikaaboro dunduko ni gari soroka.’ (Yugoti 18:23) Wa duhe nga soroka gbiati kura angbatunga sangbaatoro dunduko nga gu mangaapai nga ga pambori naye be adaimona, si du Ziazia Kekeapai aya ti ni ti Babera wẽ si nga “kporo adaimona.” (Yugoti 18:2; Pa Fu Rugute ni Ue he 18:10-12) I fura berewe tipa gi riigbu re ya si nasogote aboro ndikidi pambori na kini imi “anebi” na “ga Mbori aboro” a. (Yugoti 18:24) Babera nasogote ndikidi pambori ni kerehe ki da na ni ti rungosi “agu adezire nga ga Yesu yo” na kini imiyo a. (Yugoti 17:6) Sidu tie, gi dee du rimori nga Babera du ni bakerehe re, ri nga gu zire apambori dunduko du rogo zegino.