WIRIKAPAI 30
Gu Gamo Aboro Nakpiki Ima Rengba ka Raka Berewe!
Kpio naye na bakere imisiri gbiati gberãrago. Si nga ndu gupai Baibiri ayamba kpio ti ni nga vura aboro. (1 AKorindo 15:26) Rogo Wirikapai 27, mo awiriki gupai nga Yekova nika dia gu vurarani re kusayo. Ono ginipai nika manga tipa agu aboro naima kpiko? Rogo gi wirikapai re, mo nika wirika badungu apai tipa kura bawene kidohe—ko nika zingisa abirioni aboro tipa i raki nyeanye kindi na ngbarago. Ko nika zingisayo azingisa! Ya mo gupai re rengbe nzunzu ka manga? Ya mo i nika zingisayo i raki ngbangbaturũ yo watadu auru kpotosende?
1. Ginipai Yekova aida ka mangaha fu gu gaani aboro nakpiki?
Yekova na nyemu ka zingisa agu aboro nakpi i raki berewe. Gu kumba nadu na idapase tiko nga Eyobo adu na kido nga bangiri Mbori arengbanga ka go ti ko ho ka ko kpi ni te. Ko aya fu Mbori wẽ: ‘Ka mo ayamba he, mi akaraga pai foro [muro yo].’—Mo gedi Eyobo 14:13-15.
2. Waigu ani aino gupai nga i ima rengba ka zingisa kpikpi aboro?
Ho Yesu adu ni auru kpotosende, Mbori afu ome fuko ko zingisi aboro. Yesu azingisi degude nadu na garãri 12 gbiati wiri dekurugbo nangia paranga. (Marako 5:41, 42; Ruka 7:12-15) Kusa, bakurea Yesu nangia Razaro akpi. Wa si avura du nga Razaro akpi ki ima dia arame ku murö yo biama, Yesu azingisiko berewe be kpio. Tifuo Yesu kpari fu Mbori, ko apoi kuari ki ya: “Razaro, mo kúru.” Na ‘gu kumba nakpi ko ki kuru,’ kidu ni ungako! (Yoane 11:43, 44) Mo berẽnga pa gu ngbarago ga Razaro aborokporo gbiati abakurea adu na ni!
3. Gini maabangirise duho tipa gu gamo aboro nakpiki?
Baibiri nakido he nga: ‘Zinga be kpio’ nika du adu. (Amokedi 24:15) Agu aboro Yesu azingisiyo bakuru kusayo aganga ku ngbangbaturũ yo te. (Yoane 3:13) I adu na ngbarago wa ko azingisiyo be kpio kina ku auru kpotosende ane. Teketeke a, Yesu nika zingisa abirioni aboro barambeda i raki na ngbarago nyeanye kindi rogo paradizo auru kpotosende ane. Ko aya, aguyo “dunduko du rogo amurã yo”—zavura aguyo si awira wa bangirise ima go tiyo payo kina bangiri Mbori—i nika zingisayo azingisa.—Yoane 5:28, 29.
MO WIRIKI KURA DUNGU APAI
Mo wisigingo gu gopai rogo Baibiri yo nga gu nayugu gupai nga i ima rengba ka zingisa kpikpi aboro na i nika zingisayo azingisa. Mo bingo wai zingabekpio narengbe ka fu wasa foro na ki fu maabangirise.
4. Yesu aima yugo gupai nga ko ima rengba ka zingisa kpikpi aboro
Mo wirikinga dungu apai nga gu Yesu amangihe tipa bakureako nangia Razaro. Mo gedi Yoane 11:14, 38-44, na tifuoho, mo ki sakipai tipa agi asanahe re:
-
Waigu ani aino gupai nga Razaro aima kpi nzunzu?—Mo bi veresi 39.
-
Ka si adu nga Razaro aima ga ku ngbangbaturũ yo, ya mo mo naberãha nga ka Yesu azingisiko berewe ku auru kpotosende ane?
5. Dungu aboro i nika zingisayo!
Mo gedi Atambuahe 37:29, na tifuoho, mo ki sakipai tipa gi sanahe re:
-
Wari agu abirioni aboro i nika zingisayo nika raka ni?
Yesu nika zingisa badungu aboro angianga kina aguyo sa nairiso Yekova ya. Mo gedi Amokedi 24:15, na tifuoho, mo ki sakipai tipa gi sanahe re:
-
Ada mo aida ka biyo fuo zinga yo be kpio?
Mo berẽnga kurii gipai re: Yesu ima rengba ka zingisa boro taata kina wai bagude narengbe ka zingisa wirini rogo rame
6. Gu maabangirise du tipa zingabekpio ima rengba ka fu wasa gbiati maabangirise foro
Gu pangbanga du tipa wiri Yairo aima fu wasa na ki ngarasi gu dungu aboro du rogo imisiri. Mo gedi nga pai tipa gu ndikidi pangbanga re rogo Ruka 8:40-42, 49-56.
Mbata fu Yesu zingisi wiri Yairo, ko agumba gupai fu bari nga: “Ka mo gunde nga ya, mo idi pai.” (Mo bi veresi 50.) Waigu rengbe gu maabangirise du tipa zingabekpio ka undo ro . . .
-
ho ga boro nakpi ni?
-
ho du ga raka ni ngbapai?
Mo bi gu VIDIO re, na tifuoho, mo ki sakipai tipa gu sanahe ngbefuoho.
-
Waigu gu maabangirise du tipa zingabekpio afu wasa na ki ngarasi avungu Phelicity?
GU KURA ABORO NAPE GUPAI NGA: “Si ima kpakara ka ida kuti gu bipai nga i nika zingisa aboro azingisa be kpio.”
-
Gamo bipai nga gine?
-
Gini veresi rengbe mo ka mangasunge na ni ka yugo gupai nga zingabekpio nika duadu?
GINIPAI MO NAWIRIKIHE?
Baibiri nakidohe nga i nika zingisa agu abirioni aboro azingisa nakpi. Yekova naida i raki araka berewe, na ko ima fu ome fu Yesu ko zingisiyo.
Fugöpai
-
Gini bipai du aYekova na Yesu na ni tipa zingisa aboro be kpio?
-
Wari agu abirioni aboro i nika zingisayo nika raka ni—i nika raka ngbangbaturũ yo watadu auru kpotosende ane? Tipagine mo apehe ti ni wo?
-
Ginipai saro mo idi kuti gupai nga gu gamo aboro nakpiki ima rengba ka raka berewe?
MO WETEKE GU KURA APAI
Mo wirikipai tipa agu adiandue rengbe mo ka mangaha tipa ka sovura kuti imisiri.
Ya mo gu bangua arengo nga ga Baibiri rengbe nzunzu ka undo gu boro du rogo imisiri tipa pakpio gani boro?
Wai rengbe agude ka sovura kuti gberãrago ho gayo boro akpi ni?
Ya mo boro ho i nika zingisa ni ni ga ku ngbangbaturũ yo? Ada i nikaa zingisanga yo ya?
“Gini He Nga Zingabekpio?” (Gu kekeapai du rogo gaani bangiriba nga ga Internet)
