WIRIKAPAI 35
Wai Ka Manga Wene Adiaberã
Ani dunduko ni namanga adiaberã. Badungu agi adiaberã re ima rengba ka du na bakere sangbanaha kurirani na kurii gaani pabakure na Yekova. Ni kpiapai, ani ima rengba ka diaberã tipa wari si aida ani raki ni, wai ani ka gbia marã tipa ka songoda tirani, watadu singia si naida ani mangi rogatise. Ho ani amanga wene adiaberã ni, gaani raka ima rengba kadu na ngbarago na ani ki sa ngbarago ti Yekova.
1. Wai rengbe mo ka mangasunge na Baibiri si undo ro mo mangi wene adiaberã?
Mbata fu mo mangi diaberã, mo kpari fu Yekova tipa undo na mo ki wisigi Baibiri ka bi wai du gako berãpai tipa apai. (Mo gedi Asanza 2:3-6.) Tipa gu kura apai, Yekova nafu agu arugute afu du gbaiga. Ka singia wo duhe, diaberã ka mangapai kuti gu rugute re nga gu wene siapai rengbe mo ka mangaha.
Na ginipai tigaha du ka si du nga, rugute ho rogo Baibiri yo gbaiga nape gupai si aida mo mangihe te? Yekova nikaa nungusa ro kindi ‘ngba gu gene mo ka ndu ngba ha.’ (Yesaya 48:17) Ngba gini gene? Bangua arengo ima rengba ka du ho nga gu rengbe ka nungusa ro. Bangua arengo nga ga Baibiri nga agu arengo nayugo ga Mbori aberãpai na gako abipai. Dedede ani na ino ga Mbori bipai tipa pai ho ani ageda pangbanga ni rogo Baibiri yo. Ho ani aino wai ni du ga Yekova bipai, ani ima rengba ka manga agu adiaberã nika sa ngbarago tiko.
2. Gini apai rengbe mo ka makia ha mbata fu mo mangi diaberã?
Baibiri naya: ‘Bangbasia nawisiga pa gani nduge wenengaĩ.’ (Asanza 14:15) Gipai re nayugo gupai nga mbata fu ani mangi diaberã, si naida ani di regbo ka berãkurii gaani asiapai. Wa mo nikaa wisigo aberãpai nibasasa, mo sana tiro nga: ‘Gini bangua arengo nga ga Baibiri rengbe ka mangasunge ane? Gini berãpai rengbe ka fu zereda fere nga ga berãse yo? Wai gimi diaberã nika du na sangbanaha kurii aboro? Gu tie nyakipaha gbe nga, ya mo si asa ngbarago ti Yekova?’—Pa Fu Rugute ni Ue he 32:29.
Yekova du na rengo beko ka gumbapa ginipai du ni wene he na gu du ni gbegberẽhe. Ho ani aino gako andiko ni gbiati bangua arengo, ani nadiaberã ka pekafuoho, na ani na sonosa wene sangbakpotoseyo. Sangbakpotoseyo nga guhe du rogo rani yo nayugo rurupai gbiati irairapai furani. (ARomo 2:14, 15) Gu sangbakpotoseyo i niima rabaha, nika undo rani ani mangi wene adiaberã.
MO WIRIKI KURA DUNGU APAI
Mo bingo wai bangua arengo nga ga Baibiri gbiati sangbakpotoraniyo aundo rani ani mangi adiaberã.
3. Mo mbu Baibiri si nungusi ro
Waigu rengbe gu bangua arengo nga ga Baibiri ka nungusa rani ho ani amanga adiaberã ni? Mo bi gu VIDIO re, na tifuoho, mo ki sakipai tipa gu sanahe ngbefuo ho.
-
Gine nga ranirii?
-
Tipagine Yekova afu ranirii ti ni furani?
-
Gine ko afuhe tipa si undo rani ani mangisunge na gaani ranirii ngba wene gene?
Tipa ka bi gu kpiapai nga ga bangua rengo nga ga Baibiri, mo gedi AEfeso 5:15, 16. Na tifuoho, mo ki sakipai tipa wai rengbe mo ka ‘banda gamo saa’ tipa . . .
-
geda Baibiri dedede.
-
kadu ni wene badiarogatise, vungugude, wene kumbagude, watadu wene degude.
-
kaa ndu tipa agu adunguratise nga ga dungurati.
4. Mo raba sangbakpotoroyo tipa kaa manga wene adiaberã
Ho du andiko adu ni nga ga Ziazia Kekeapai gbaiga tipa pai, manga wene siapai rengbe ka du taata. Ono na ka si du nga, andiko ho wo te? Mo bi gu VIDIO re, na tifuoho, mo ki sakipai tipa gu sanahe ngbefuo ho.
-
Rogo gu vidio re, gini adiandue wirinarani nimangihe ka raba sangbakpotoriyo na ka manga wene diaberã nga gu rengbe ka sa ngbarago ti Yekova?
Tipagine si aida nga ti ni ani sana aboro i mangi agu adiaberã furani si aida ani mangihe ya? Mo gedi AEbere 5:14, na tifuoho, mo ki sakipai tipa agi asanahe re:
-
Wa vura duhe nga si ima rengba ka du taata tipa ka sana aboro i mangi adiaberã furani, ginipai kina rani narengbe ka siaha tipa tirani?
-
Ginihe duho nga gu rengbe ka undo ro mo raba sangbakpotoroyo na kini mangi wene adiaberã?
Wakina kpia gbakigbaki rago, sangbakpotoraniyo naundo rani ani diberã tipa gupai ani nika mangaha rogo raka yo
5. Mo yugu irisa tipa gu sangbakpotoseyo nga ga kura aboro
Aboro niba kiakia namanga adiaberã niba kiakia. Wai rengbe ani ka yugo irisa tipa gu sangbakpotoseyo nga ga kura aboro? Ani bingo abangiriba ue:
Bambataha: Gu wirina kpinyemu kendega kpakpuriyo na aũmbakadatise ga kurogo gu dungurati nga gu rago angbanga ti badungu agu awirina du yo ka bi gu boro nakendega kpakpuni yo wa gure ya.
Mo gedi ARomo 15:1 na 1 AKorindo 10:23, 24, na tifuoho, mo ki sakipai tipa agi asanahe re:
-
Ringbisihe kuti agi averesi re, ginipai gu wirina ni dee re arengbe ka diaberã tipaha? Ginipai rengbe mo ka mangaha ka si du nga mo pati gu boro sangbakpotoniyo aidanga nimangi agu apai sangbakpotoroyo aida aida mo mangihe ya?
Uepai: Wirina ima ino gupai nga Baibiri azangahe ti mbirabuda rengbe arengba te, ono ko sia ka zanga mbiraha. I yambu ko tipa sungo nga ga zambuasitise, yo ko nabi awirina ni i nimbiri buda.
Mo gedi Batungusipai 7:16 na ARomo 14:1, 10, na tifuoho, mo ki sakipai tipa agi asanahe re:
-
Ringbisihe kuti agi averesi re, ginipai gu wirina ni kumba re arengbe ka diaberã tipaha? Ginipai rengbe mo ka mangaha ho mo abi boro ni nimangi gupai sangbakpotoroyo aidanga mo mangihe ya?
Gini adiandue nandu na boro sa wene adiaberã?
1. Mo sana Yekova ko undo ro tipa mo diberã tipa gupai mo nika mangaha.—Yakoba 1:5.
2. Mo mangi wetekapai rogo Baibiri gbiati agu awaraga du mburuhe rii Baibiri tipa ka bi gu bangua arengo ka mo mangipai kuti ni. Mo ima rengba a ka sana agu aKristano niima du na inohe.
3. Mo makia gu sangbanapai rengbe gamo diaberã kadu na ni kurii sangbakpotoroyo gbiati gu sangbakpotoseyo nga ga kura aboro.
GU KURA ABORO NAPE GUPAI NGA: “Mo na rengo be ro ka manga gupai mo aidaha. Ka sunge dunga tiro na gupai aboro nikaa berãha ya.”
-
Tipagine si aida ani makia gu bipai ti ni nga ga Mbori gbiati gu bipai nga ga aboro?
GINIPAI MO NAWIRIKIHE?
Ani namanga wene adiaberã ho ani aino ga Mbori bipai ni tipa pai na ani ki bi singia gaani mangapai rengbe ka undo kura aboro watadu ka imisa yo.
Fugöpai
-
Wai rengbe mo ka manga agu adiaberã nasa ngbarago ti Yekova?
-
Wai rengbe mo ka raba sangbakpotoroyo?
-
Wai rengbe mo ka yugo irisa tipa gu sangbakpotoseyo nga ga kura aboro?
MO WETEKE GU KURA APAI
Wai rengbe mo ka manga agu adiaberã nika nyakasa gamo pabakure na Mbori?
“Oni Mangi Agu Adiaberã Nafu Irisa Fu Mbori” (Ngbaõbambu Sinziri, Zerekpe 1, 2011)
Mo wiriki dungu apai tipa wai Yekova afu arugapai furani.
Mo bingo agu apai naundo kumba sa ko mangi kpakarakpakara diaberã.
Mo wirikinga dungu apai tipa wai ka sa ngbarago ti Yekova ho ko afunga arugapai afu ni kpadio tipa wai ka mangapai ya.
“Ya Mo Mo Naida Agu Andiko Nga ga Baibiri ti Aregbo Dũ?” (Ngbaõbambu Sinziri, Banduru 1, 2003)
