WIRIKAPAI 50
Wai Rengbe Gamo Ramukporo Kadu na Ngbarago?—Ue Paparaha
Agude nga gamahe be Yekova. Ko naida avunguagude ngerefuo gu gamahe re wenengai. Yekova ima fu wene arugute nga gu rengbe ka undo avunguagude tipa i mangi gipai re. Gako arugute ima rengba a ka undo agude i fubee tipa gu diabese nga ga aborokporo.
1. Gini arugute Yekova nafuhe fu avunguagude?
Yekova naida avunguagude kpinyemu awiriyo na kini di bakere regbo na yo a wa rengbe ome yo na ni. Ko naida a avunguagude banda awiriyo ti agu apai rengbe ka imisa yo na kini mangisunge na bangua arengo nga ga Baibiri ka maamburu gayo rabahe riihe. (Asanza 1:8) Ko naya fu abaagude wẽ: Oni ‘mbu ti [awironi] ni ga [Yekova] . . . rugahe.’ (Mo gedi AEfeso 6:4.) Yekova nadu na ngbarago ka avunguagude apekafuo gako arugapai ho i aruga awiriyo ni na ka i afunga gu tindiro re fu kura boro ya.
2. Gini arugute Yekova afuhe fu agude?
Yekova naruga agude nga: ‘Oni gí sangba avunguroni.’ (Mo gedi AKorosaio 3:20.) Ho agude airisa avunguyo ni na kini gisangbayo, i nasa ngbarago ti Yekova gbiati avunguyo. (Asanza 23:22-25) Yesu amoi wene kpiapai ho ko adu ni ni gude. Wa ko avurangia rengberengbe boro, ko anaairisa avunguko na kini gisangbayo kindi.—Ruka 2:51, 52.
3. Waigu rengbe oni ka mbeda na Mbori wangia oni aborokporo?
Kangia vungugude nga mo, zanga kapa mo nakpinyemu awiro kpinyemu Yekova kina wai mo nakpinyemuko gbe. Waigu mo narengbe ka da ti gi sásá re? Ni manga mo gupai Baibiri agumbaha nga: ‘Oni ki niyugu [fugo Yekova] fu awironi sirisiri, ki nipeke pa ha fu yo ho oni ka nisungu ni rogo gaoni bambu, ho oni ka nita ni gene a.’ (Pa Fu Rugute ni Ue he 6:7) Gupai nga “niyugu” si nga ka yugopai kini dogodi gumbaha. Si nawira wa, mo ima ino gupai nga si naida mo naadogoda kura apai fu awiro dedede tipa wa ka i tingidihe. Gi veresi re nayugo gupai nga si naida mo naagbata amomu dedede tipa ka fura fu awiro tipa Yekova. Si niwene berãpai tipa oni kpara regbo rogo aposo yo dunduko tipa ka irisombori wa aborokporo sa. Ka singia agude bero te, mo nika gbia undo agbia a ni dia mo regbo rogo aposo yo dũ tipa kaa wisigo Fugo Mbori.
MO WIRIKI KURA DUNGU APAI
Mo makianga agu aberãpai du rogo mangapai yo nafubee sa gu ngbarago nga ga aborokporo na kini banda gayo raka.
4. Mo raba awiro rogo nyemuse yo
Raba gude ima rengba kadu ni kpakarakpakaraha. Waigu rengbe Baibiri ka undo? Mo gedi Yakoba 1:19, 20, na tifuoho, mo ki sakipai tipa agi asanahe re:
-
Waigu rengbe avunguagude ka yugo nyemuse ho i afura ni na awiriyo?
-
Tipagine si aidanga vungugude rugu wirini ti ni ho du ni ni na zinga ya? a
5. Mo banda awiro
Tipa ka banda awiro, si ni nyanyakipa pai ka fura fu agude nibasasa tipa kodaba. Zee ima rengba ka manga ro ka fura furu tipaha. Mo bi gu VIDIO re, na tifuoho mo ki sakipai tipa agu asanahe ngbefuo ho.
-
Tipagine duhe ti ni ni kpakarapai fu kura bete avunguagude i fura fu awiriyo tipa kodaba?
-
Rogo gini gene kura bete avunguagude nasakipai ngbaha fu awiriyo tipa kodaba?
A wa i agumbaha ni sangbanebi, ga Satana zegino nagberã kina kumbatayo kisusi. Mo gedi 2 Timoteo 3:1, 13, na tifuoho, mo ki sakipai tipa gi sanahe re:
-
Bete gu gbegberẽ aboro i nafura tipa yo rogo veresi 13 nawasi agude ni kodaba na yo. Sidu tie, waigu duhe ni nyanyakipa pai fu avunguagude ka yugopai fu awiriyo tipa kodaba na wai ka banda yo na wai rengbe yo ka banda tiyo be gbegberẽ aboro?
Ya mo mo iningo gipai re?
ADezire Yekova ima kusa dungu aũsunge si undo avunguagude i yugupai fu awiriyo tipa kodaba na ka banda awiriyo be gu mangapai nga ga wasi agude re. Ni kpiapai, mo bingo:
-
Oni Banda Awironi (vidio)
-
““Mo Yugupai fu Wiro Tipa Kodaba” (Awake! Na. 5 2016)
6. Oni irisi avunguroni
Agude gbiati sosono agude ima rengba ka yugo irisa fu avunguyo ngba gu gene i afura fuyo ngbaha. Mo bi gu VIDIO re, na tifuoho mo ki sakipai tipa agu asanahe ngbefuo ho.
-
Tipagine duhe ti ni ni wenepai paranga aboro fura na avunguyo rogo iriiri gene yo?
-
Waigu rengbe paranga boro ka fura fu avunguni rogo gu gene nika yugo irisa?
Mo gedi Asanza 1:8, na tifuoho, mo ki sakipai tipa gi sanahe re:
-
Waigu rengbe paranga boro ka mangapai ho avunguni afu rugapai ni funi?
7. Oni irisi Yekova sa wa aborokporo
Agu aborokporo nga aDezire Yekova ninaakpara regbo rogo aposo yo dunduko tipa ka irisombori kina sa. Waigu si aida gu irisombori nga ga aborokporo re du? Mo bi gu VIDIO re, na tifuoho mo ki sakipai tipa agu asanahe ngbefuo ho.
-
Waigu rengbe aborokporo kadu na gu mbakadapai nga ga Gu Irisombori Nga ga Aborokporo dedede?
-
Ginipai rengbe vungugude ka mangaha tipa ka sa gu irisombori nga ga aborokporo si du rogo mangimangipai yo na aboro ki gbia ngbarago behe?—Oni bi gu sura du ti tonatona gi wirikapai re.
-
Ginipai rengbe ka saha foro ni kpakarakpakaraha tipa oni mangihe wa sa?
Rogo gu ringara aYisaraere nadumbata, Yekova aida aborokporo naafura dedede tipa Ziazia Kekeapai. Mo gedi Pa Fu Rugute ni Ue he 6:6, 7, na tifuoho, mo degude ki sakipai tipa gi sanahe re:
-
Waigu rengbe mo ka mangapai kuti gi rugute re?
Aberãpai tipa gu irisombori nga ga aborokporo:
-
Oni mbakadi gu dunguratise nga ga dungurati.
-
Oni gedi agu apangbanga nga ga Baibiri nga gu rengbe ka sa ngbarago ti gaoni aborokporo na ki sakipai tipaha.
-
Ka mo du na rukutu agude bero, mo zogo agu ahe nabipa rukutu agude du rogo rogo jw.org.
-
Ka ngia mo na sosono agude bero, mo sakipai tipa gu kekeapai du tipa sosono agude du rogo jw.org.
-
Oni mangi kpiapai nga ga gu pangbanga du rogo Baibiri yo na awironi.
-
Oni bi gu vidio du rogo jw.org.
GU KURA ABORO NAPE GUPAI NGA: “Baibiri ima du ni kpakarakpakara ha fu agude i gi rogoyo.”
-
Ginipai rengbe mo ka pehe?
GINIPAI MO NAWIRIKIHE?
Yekova naida avunguagude kpinyemu awiriyo, i rabayo, na kini bandayo; na ko naida agude niirisi avunguyo na kini gisangbayo; na ko naida aborokporo niirisiko kina sa.
Fugöpai
-
Waigu rengbe avunguagude ka raba awiriyo na kini banda yo?
-
Waigu rengbe agude ka irisa avunguyo?
-
Gini aundo du ti kpara regbo rogo aposo yo dunduko tipa kaa irisombori wa aborokporo?
MO WETEKE GU KURA APAI
Gini awirikapai rengbe ka undo wiro ho u nika sona ni?
Mo wirikinga pai tipa agu arugute rogo mangimangipai yo Baibiri afuhe fu agu aboro nangerafuo sosono avunguyo.
“Ginipai Baibiri Apehe Tipa Ngerafuo Sosono Avunguse?” (Gu kekeapai du rogo gaani bangiriba nga ga Internet)
Mo bingo wai gu kumba naainongo wai ka sonosa agude ya aye ka da ni gu baagude du na diabese.
Mo bingo wai Abaagude narengbe ka nyakasa gayo pagume na awiriyo.
“Wai Rengbe Abaagude Kadu Mbembedi na Awiriyo?” (Ngbaõbambu Sinziri, Ngbangba 1, 2011)
a Rogo Baibiri gupai nga ‘rugute’ si wa ka i ya ka yugopai, na ka nungusa gude na ka undo ru u mangi ariapai ti asinoru. Si ayugongo gupai nga kaa fura furu ngba gbegberẽ gene watadu ka imisa ru te.—Asanza 4:1.
