Yekova naida mo iniko wenengai. Tipagine? Ko namaabangiriko nga, ka mo wirikipai ni bakerehe gbe tipa asinoko, gako gene mangapai gbiati gako ringbisapai, mo nika du na bakere nyemu ka du ni bakureako. Ya mo mo rengbe nzunzu ka du ni bakurea Mbori? (Mo gedi Atambuahe 25:14.) Ginipai rengbe mo ka mangaha ka da ni bakureako? Baibiri nafu akaragapai kuti agu asanahe re na kini yugu ndu gupai du pabakure ti ni na Yekova ni gu nyanyaki pabakure rengbe ka du bero.

1. Ginipai Yekova ayamba ro mo mangihe?

‘Oni mbédi na Mbori, ko ki mbedi na oni.’ (Yakoba 4:8) Ginipai gipai re ayugoho? Yekova nayamba ro mo du ni bakureako. Kura aboro rengbe ka bihe ni kpakarakpakaraha tipa ka du ni bakurea gu boro ka i abingo ni ya, ka i apenga pa Mbori ti gako ya. Ono wa vura duhe wo, rogo Fugoko yo nga Baibiri, Yekova nayugo agu apai dunduko furani nga gu si aida ani ini he tipa asinoko tipa wa ka ani ru ho ka mbeda na ko. Ho ani ageda ga Mbori pangbanga ni nga gu du rogo Baibiri, gaani pabakure nasona dagbarani na Yekova wa vura duhe vurũ nga ani abingo ko te.

2. Tipagine du Yekova ti ni ni gu bawene Bakure rengbe ka du bero?

Boro ho kpinyemuro ki susi wai Yekova nakpinyemuro te. Ko naida mo du na ngbarago na kini fura fuko ti ai gu regbo mo aida na undo. Mo ima rengba ka ‘bá agu apai nafuda ro ku auru ko yo; mbiko ko naberã pa ro.’ (1 Petero 5:7) Yekova nga regerege ti aregbo dunduko ka undo abakureako, ka fu wasa fu yo, na ka degatuko fuyo.—Mo gedi Atambuahe 94:18, 19.

3. Ginipai Yekova aidaha be abakureako?

Yekova ima kpinyemu aboro dunduko, ‘ono ruru boro du rogo gako pa du zukazuka.’ (Asanza 3:32) Yekova naida abakureako asadi ka manga agu apai ko abihe nga si ni wenehe na ki ka ka manga agu apai ko abihe ni gbegberẽhe. Bete kura aboro ima rengba ka bihe nga ka i rakingo ringbisihe kuti gu ga Yekova arugute nga gu nabipa gupai du ni wenehe na gu du ni gbegberẽhe te. Ono tie, Yekova na bakere nunga tiko. Ko naida na ai gu boro nakpinyemuko nzunzu na kini asadi na ome ni dũ ka sa ngbarago tiko.—Atambuahe 147:11; Amokedi 10:34, 35.

 MO WIRIKI KURA DUNGU APAI

4. Abarayama adu ni bakurea Yekova

Gu pangbanga nga ga Abarayama nga gu du rogo Baibiri (i ayambako a nga Abarama) si naundo rani ani rugutirani a na rogo gupai yo nga ka du ni bakurea Mbori. Mo gedipai tipa Abarayama rogo Bambata Pai 12:1-4. Tifuoho, mo ki sakipai tipa agi asanahe re:

• Ginipai Yekova aya fu Abarayama ko mangihe?

• Ga Yekova kidohe angia gine fuko?

• Wai du Abarayama amangipai kuti ga Yekova arugapai?

5. Gupai Yekova aidaha be abakureako

Dedede, ani naakpinyemu kuraapai be abakurearani.

• Gini bete kura apai mo naaida abakureamo mangihe foro?

Mo gedi 1 Yoane 5:3, na tifuoho, mo ki sakipai tipa gi sanahe re:

• Ginipai Yekova aidaha be abakureako?

Tipa ka giasangba Yekova, si naida ani aria gaani gene mangaapai watadu asino rani. Mo gedi Yesaya 48:17, 18, na tifuoho, mo ki sakipai tipa gi sanahe re:

• Tipagine Yekova asana abakureako ti ni i mangi ariapai?

 6. Gupai Yekova amangaha fu abakureako

 GINIPAI MO NAWIRIKIHE?

Yekova naida ka du ni Bakureamo, na ko nika undo ro aundo mo mbedi na ko.

Fugöpai

• Wai du Yekova aundo abakureako?

• Tipagine du Yekova aya ti ni fu abakureako wẽ i mangi ariapai?

• Ya mo mo nabihe nga agu apai Yekova aidaha be abakureako ima susa ome? Tipagine mo abihe ti ni wo, watadu tipagine mo abingo ho ti ni wo ya?