Dungu aboro rogo zegino na agu akpakarapai nga gu nasayo i du na gberãrago gbiati abakabangirise na si ki niye na imisiri fuyo. Ya mo pai amangingo ro nga gu nasa ro mo bi tiro wa gure? Isoke, mo narungo be kaza watadu mbiko pakpio gu boro mo nakpinyemu ni. Mo ima rengba ka sana tiro nga, ‘Ya mo apai angbaangba nzunzu rogo raka yo?’ Gu karagapai Baibiri afuhe kuti gu sanahe re nafu maabangirise.

1. Wai du Baibiri afu maabangirise?

Anga Baibiri nasakapai sa kina tipa ndu gupai du akpakarapai ti ni rogo zegino te ono si nape gu wene pangbanga a nga agu akpakarapai re gbua tipa bete regbo na barambeda, si nika go dunduko kusayo. Agu akidohe nga ga Baibiri ima rengba ‘ka fu maabangirise fu roni tipa gaoni apai ku mbata yo.’ (Mo gedi Yeremaya 29:11, 12.) Agu akidohe re naundo rani ani mangipai kuti agu akpakarapai du ani na ni awere, ka du na ruru bipai, na ki gbia nyenye ngbarago.

2. Gini ngbatunga raka Baibiri nasakipai tipaha kumbatayo?

Baibiri pe gupai nga kumbatayo, ‘kpio adú nga berewe te, rungo adú nga yo na akpe na ima a te.’ (Mo gedi Yugoti 21:4.) Agu akpakarapai nga gu nasa aboro ka i dunga na maabangirise areme ya—wagu nga rungo, iraira sarangbanga, akaza, gbiati kpio—adunga berewe te. Baibiri nakidohe nga aboro nika gbia ngbarago ti raka nyeanye kindi rogo Paradizo auru kpotosende ane.

3. Waigu rengbe mo ka sonosa kido kuti gu maabangirise Baibiri afuhe?

Dungu aboro namaabangiriyo tipa weneapai si mangi, ono i arengbanga ka du nzunzu na gu kido nga gu gayo maabangirise re adigiso tihe te. Agu akidohe nga ga Baibiri kia. Ani ima rengba ka sonosa gaani kido kuti gupai si apehe ‘niwisigo ani Ziazia Kekeapai’ wenengai. (Amokedi 17:11) Wa mo nikaa wirika Baibiri, mo ima rengba ka diaberã singia mo rengbe ka ida kuti gupai si apehe tipa raka kumbatayo.

 MO WIRIKI KURA DUNGU APAI

4. Baibiri nafu gu maabangirise nga ga raka nyeanye kindi auru kpotosende zanga na akparakapai

Mo bingo agu akidohe Baibiri afuhe. Ginigu dagbaha yo mo nakpinyemuhe gbe? Na tipagine duhe ti ni na nyanyakipaha foro?

Mo gedi agu averesi i nakehe pati agu akidohe re, na mo ki sakipai tipa agi asanahe re:

• Ya mo mo nabihe nga agi averesi re nafu maabangirise? Ya mo si rengbe kafu maabangirise fu gamo aborokporo gbiati abakureamo?

Mo bingo tiro nga mo naraka rogo gu zegino

 5. Gu maabangirise nga ga Baibiri ima rengba ka manga ariapai

 GINIPAI MO NAWIRIKIHE?

Baibiri nafu maabangirise furani na kini undo rani ani sovura kuti gaani akpakarapai nikido ho pa gu raka furani kumbatayo nga gu hi be ngbarago.

Fugöpai

• Tipagine aboro aida maabangirise ti ni?

• Ginipai Baibiri apehe tipa raka kumbatayo?

• Wai du rengbe maabangirise tipa kumbatayo ka undo ro awere?