WIRIKAPAI 01

Waigu Rengbe Baibiri ka Undo Ro?

SI TONA MANGASUNGE

Ani dunduko du na nyemu ka ino dungu apai tipa raka, arungo, kpio, gbiati gupai nika manga kumbatayo. Ani dunduko naida na undo a tipa wai rengbe ani ka gbia marã ka ngerafuo gaani aborokporo na tipa wai rengbe ani ka raka gu ramukporo du na ngbarago. Dungu aboro bi gupai nga anga Baibiri naundo yo sa ka karagapai kina kuti gayo kikindigi asanahe te, si naundo yo aundo a na wene arugute nibipa wai kaa raka na aˈuru dunduko. Aboro dunduko rengbe ka gbia undo ti Baibiri.

1. Gini bete ngbatunga asanahe Baibiri akaragapai kutini?

Baibiri nakaragapai kuti gi nyanyakipa asanahe re: Waigu raka aenge? Tipagine du ani ane ti ni? Tipagine aboro arungo ti ni? Ginipai namanga ho boro akpi ni? Ka si du nga aboro dunduko naida zereda, tipagine du avura ti ni ni bakerehe? Ginipai nika manga tipa kpotosende kumbatayo? Baibiri nangarasa rani nga ani gbia akaragapai kuti agu asanahe re, na amirioni aboro ima bi gupai nga gaha akaragapai ni bawenehe gbe.

2. Waigu Baibiri narengbe ka undo rani ani gbia ngbarago rogo gaani raka yo na aˈuru dunduko?

Baibiri nafu wene arugute furani. Ni kpiapai, si nayugo wai fu aborokporo rengbe yo ka raka na ngbarago. Si nafu arugute nibipa wai ka mangapai kuti fuda berãse yo na wai rengbe ani ka gbia ngbarago ti gaani sunge. Mo nika wirika gupai Baibiri ayugoho tipa agi arii-apai re gbiati agu akuraha wa ani nikaa ndu kumbatayo kaa wisigo gi buku re kina sa. Mo nika ye ka ida kuti gupai nga ‘Ziazia Kekeapai dunduko [ai gupai du rogo Baibiri] si . . . rengbe’ arengba ka undo.—2 Timoteo 3:16.

Gi buku re adianga ba Baibiri te. Kuba gure, si naundo ro mo wisigi Baibiri nitiro. Sidu, ani nangarasa ro nga mo gedi agu averesi du rogo gi wirikapai re na kini ringbisihe na agu apai mo awirikaha.

MO WIRIKI KURA DUNGU APAI

Mo bi wai Baibiri naundo kura aboro, wai rengbe mo ka gbia ngbarago ti gedaha, na ndu gupai duhe ti ni ni wenepai tipa mo gbia undo tipa ka rugatiro na ni.

3. Baibiri ima rengba ka ngbembatayo furani

Baibiri wakina gu bataria [baro] nahasa rago ni bakerehe. Ani ima rengba ka mangasunge na Baibiri tipa si yugu wai furani rengbe ani ka manga wene adiaberã na si undo rani ani ini ginipai nika manga kumbatayo.

Mo gedi Atambuahe 119:105, na tifuoho mo ki sakipai tipa agi asanahe du kusende re:

Waigu gu bake papara Atambuahe re aabi Baibiri?
Waigu mo abi Baibiri?

4. Baibiri ima rengba ka karagapai kuti gaani asanahe

Kura dee sa abi gupai nga Baibiri ima karagapai kuti gu gari asanahe naima fuda ri tipa dungu agarã. Mo moi gu VIDIO re, na tifuoho mo ki sakipai tipa agu asanahe ngbe fuoho.

VIDIO: Ka mo Mbunga Maabangirise Ya! (1:48)

Rogo gu vidio re, gini ngbatunga asanahe gi dee re adu na ni?
Waigu wirika Baibiri aundo ri?

Baibiri nangarasa rani nga ani sana asanahe. Mo gedi Matayo 7:7, na tifuoho mo ki sakipai tipa gi pai re:

Gini asanahe du mo na ni nga gu Baibiri narengbe ka karagapai kutini?

5. Mo ima rengba ka gbia ngbarago ti geda Baibiri

Badungu aboro nagbia ngbarago ti geda Baibiri na kini gbia undo ti ni. Mo moi gu VIDIO re, na tifuoho mo ki sakipai tipa agu asanahe ngbe fuoho.

VIDIO: Geda Ziazia Kekeapai (2:05)

Rogo gu vidio re, ga paranga aboro bipai ningia gine tipa gedapai?
Wa vura duhe nga i akpingo nyemu gedapai te, tipagine i aida aida tini ka geda Baibiri?

Baibiri nagumba gupai nga, si ima rengba ka fu agu arugute furani nga gu rengbe ka fu wasa furani na ki fu maabangirise furani. Mo gedi ARomo 15:4, na tifuoho mo ki sakipai tipa gi sanahe re:

Ya mo gu kidohe nga ga Baibiri du tipa fu wasa na maabangirise angbanga tiro te?

6. Kura aboro ima rengba ka undo rani ani girogo Baibiri yo

Kura aboro bi gupai nga, kupati gupai nga ka geda Baibiri nisayo, sakapai tipaha na kura aboro ima du na undo ti ni. Mo gedi Amokedi 8:26-31, na tifuoho mo ki sakipai tipa gi sanahe re: