Awa duhe ni kekehe rogo 1 AKorindo 6:1-8, gu mokedi nangia Pauro afura tipa gu tagbagapai rengbe ka du dagba akuarani aidipase. Ko ayugu gako gberãrago nga agu aKristano naadu Korinda yo ‘aerẽ ka ndu ka gumba ngbanga barangba iraira aboro.’ (Veresi 1) Pauro afu gu nyanyaki ndupai si aidanga ti ni aKristano ndu na awirinayo ku ngbangayo ya, ono i mbakadi gayo kpakaraapai dagbayo rogo dungurati. Ani makianga ndu gupai i afu gi rugute re ti ni na ki makianga bete agu abangiriba gi rugute re arengbanga ka manga sunge rogoho ya.

Ka tagbagapai nga ga sunge-bagaahe kuru dagbarani na kuarani idipase, si naida ani mangipai kuti ga Yekova bipai angianga kuti gaani ya. (Asanza 14:12) A wa Yesu ayuguhe, si ni wenepai ka mbakada tagbagapai niipo mbata fu si da ni kikiipai. (Matayo 5:23-26) Si nafu kina gberãrago nga, kura aKristano kinaho si aima da ti gupai nga i ndu na awirinayo ku ngbanga yo. Pauro aya: “Si wa oni ti bungudu wa du rago re a, bambiko oni na angbanga dagba roni yo.” Tipagine ko agumbaha ti ni wo? Bangua ndupai nga si rengbe ka ye na gbarasarimo kuti dungurati gbiati rimo gu gaani Mbori ani airisoko. Sidu tie, ani nadia gu sanahe Pauro asanaha ku ngbadurani ki ya: “Ka oni vura hi irairapai si mangi wãi?”​—Veresi 7.

Pauro asakirogoyo ki ya Mbori ima fu bawene mbakadapai furani rogo dungurati tipa mbakada atagbagapai. Abaakumba nga agu aKristano nga akumba du na gu inohe nga ga gu bangua rengo nga ga Ziazia Kekeapai, na Pauro aya i ima rengba ka ‘sapangbanga dagba awirina’ ho daha ni ti “agu apai nga ga gi unga re.” (Veresi 3-5) Yesu agumba gupai nga atagbagapai nakoda kere gbegberẽ mangaapai, wa gu nga pe rimo gbiati biriki, si naida aboro mbakadihe ngba agu agene biata du tipa ye na pa zereda, bambataha nga, agu aboro du gu tagbagapai re dagbayo mbakadihe kina dagbayo; uehe nga, ka gene adunga wa ka i mbakadihe kina dagbayo ya, i ki yambu  dezire sa watadu ue; biata gene nga, ka agu agene ue du kuari re adunga na diabese ya i ki ndu na gupai re ku barabangiri agu abaakumba nga ga dungurati yo.​—Matayo 18:15-17.

Agu aKristano nga abaakumba, abainiparugute watadu ababagiahe nga yo te na si aidanga i mangipai wa yo te. I arũngo andiko fu awirina tipa i naambakada agu atagbagapai nga ga bagaahe kutini te. Kuba gure, i naundo agu aboro du na gu tagbagapai re i mangipai ringbisihe kuti agu arugute nga ga Ziazia Kekeapai rogo zereda. Ho da ha ni ti gupai du ni kpakarakpakaraha, i ima rengba ka sana babi adungurati watadu be-basunge nga ga aDezire Yekova. Ono kura apai kinaho Pauro afuranga tipaha rogo gi gako rugute re ya. Gini apai du ngaha?

Kura aregbo kinaho si aida aboro ndu kina ku ngbanga yo tipa ka nyasa gupai ngba zereda nga gu i naafura tipaha kina ngbanga yo. Ni kpiapai, kina ngbanga yo sa rengba yo ni ka dia waraga mbutise, ka ngbe agude, ka inopa gu marã si aida kumba watadu dee naafuhe fu gani kuru badiarogatise ka si du nga i ima mbu tiyo, ka gbia waraga basunge-igo-marã, gbiati gu kura apai si aida boro ndu na ni kina ku ngbanga yo tipa i mangipai kina kuti gu sangba boro ni akehe mbata fu ni kpi. Kura aregbo kinaho si aida wirina ndu kina ku ngbanga yo tipa ka banda tini be tagbagapai. *

Ka wirina ndu gene gu ngbanga re ngba ruru gene, si arengbanga kadu na tagbagapai dagbaha na gu rugute Pauro afuhe re te. * Ono tie, gu banguapai si aida Kristano peresi paha mbatayo nga pa ziasi rimo Yekova na pa banda gu zereda gbiati kodatise nga ga dungurati. I naino apefuo Kristo gbe ti gu sino yo nga nyemuse, “nyemuse . . . agbata nga gaha pai te.”​—1 AKorindo 13:4, 5; Yoane 13:34, 35.