Ho Yesu adani Betania yo mbembedii na Yerusarema, bakureako nangia Razaro aima kpi ki di arame biama ku murã yo. Yesu andu kupati murã yo na Marata gbiati Maria, nangia adawiri Razaro. Si aaimanga te rimbasa aboro ki gbe koyo. Mo berẽnga pa gu ngbarago Marata na Maria adu nani ho Yesu azingisi Razaro ni be kpio.​—Mo gedi Yoane 11:21-24, 38-44.

Marata aima ino gu wene pangbanga du tipa kpikpi aboro. Ri aima ino gupai nga Yekova nika zingisa kpikpi aboro azingisa tipa i raki berewe auru kpotosende.​—Mo gedi Eyobo 14:14, 15.

I akusi aboro rogo nvutu sende. (Bambata Pai 2:7; 3:19) Anga atoro nga ani naraka na gu kpoto nga ga awiri aboro te. Ho boro akpi ni, barapa ní ho nabata be kpio te. Ho ani akpi ni, dudurani nakpi, gaani berãpa apai ki go kusayo. Sidu, tifuo zingisayo Razaro be kpio, ko aapenga gupai namangiko rogo kpio yo te, bambiko kpikpi aboro ainongo pai te.​—Mo gedi Atambuahe 146:4; Batungusipai 9:5, 6, 10.

Ya mo Mbori na mbusa aboro na we fuo kpiyo? Wadu he nga Ziazia Kekeapai nayawee kpikpi aboro ainonga pai te, gu yugopai nga Mbori nazo aboro iferno yo nga zire yugopai.  Mbori zaatu naima soga gupai nikerehe nga i zo boro we yo.​—Mo gedi Yeremaya 7:31.

Mo bi gu vidio re Ginipai du Tipa Akpikpiyo?

Ka kpikpi boro furanga te na ka ní ginga pai a te. (Atambuahe 115:17) Ono gbegberẽ amaraika nga adaimona rengbe arengba ka fura fu aboro si kidu wa ka i ya gu boro naima kpi du nafura. (2 Petero 2:4) Yekova aidanga ani asadi ka fura na kpikpi aboro te.​—Mo gedi Pa Fu Rugute ni Ue he 18:10, 11.

Badungu amirioni aboro nga aguyo du rogo amurã yo i nika zingisayo tipa i raki auru kpotosende berewe. Zavura kura aboro naainongo Mbori ya na i kini mangi gbegberẽ apai, i nika zingisayo azingisa.​—Mo gedi Amokedi 24:15.

Agu aboro i nika zingisayo be kpio nikadu adu na rengba beyo tipa ka wirika rengo tipa Mbori na ki yugu gayo idapase kuti Yesu nigiayo sangbako. (Yugoti 20:11-13) Agu aboro i nika zingisayo be kpio i kini mangi weneapai, i nika raka nyeanye kindi auru kpotosende.​—Mo gedi Yoane 5:28, 29.

Mbori amoi maabangirise fu kpikpi aboro nikedako Wiriko ko ye ka kpi tipa rani. Pa zinga aboro be kpio nayugopa ga Yekova nyemuse na weneringise nga gu arẽnga aboro tipaha ya. Da nzunzu mo amaabangiro tipa ka bi ní ho i nika zingisa aboro ni be kpio?​—Mo gedi Yoane 3:16; ARomo 6:23.