Ani napekafuo agu arugute nga ga Baibiri sirisiri ho ani manga gu pumbo ni nga Ga Gbia Riahe, nga gu i ayambaha a nga “ga Gbia riahe nga ga nyemu,” Yangara Riahe Nga ga Nyemu, na Tingida Pakpio Yesu. (1 AKorindo 11:20; King James Version) Gu kparakparapai du ho nga dungu aida gbiati amangapai nga ga kura ariigbu pambori du na ngbanya dagbaha na gi pumbo re, mburuhe rogo Baibiri te.

 Gu ndupai ani amanga gu pumbo Ga Gbia Riahe ti ni nga, ka tingidapa Yesu na ka yugo gaani tambuahe tipa gu motumo ko afuhe tipa rani. (Matayo 20:28; 1 AKorindo 11:24) Anga gi mbakadapai re wa gu mbakadapai nga ga kura ariigbu apambori nga gu aboro abihe nga si nasa Mbori ko mbupai fuyo ti gayo aingapai te. Baibiri nayugo gupai nga i ima rengba ka mbupai furani ti gaani aingapai angianga riimburu agu mangapai watadu sunge vugahe nga ga apambori ya, ono kina riimburu idapase kuti Yesu sa.​—ARomo 3:25; 1 Yoane 2:1, 2.

 Yesu azinahe fu apefuoko nga i nimangi pumbo Ga Gbia Riahe, ono ko aapenga pa bange wai si aida i nimangihe te. (Ruka 22:19) Kura aboro nabihe nga si naida i nimangihe na adiwi dunduko, agu akurayo namangaha na aposo dunduko, na auru dunduko, aguyo namangaha ni dunguhe rogo uru sa, watadu kina wai boro abihe nga wo si aida ni nimangihe. Ono tie, bete bangua apai gere si aida mo wisigihe.

 Yesu asigira pa Ga Gbia Riahe ti gu ramediwi nangia ga aYudo Pumbo Susiri na ko akpi kusa kina rogo gu uru re. (Matayo 26:1, 2) Si airiwongo nga gipai re amangi wo te. Baibiri naringbisa ga Yesu motumo kuti Pumbo Susiri. (1 AKorindo 5:7, 8) I anaamanga Pumbo Susiri na agarã dunduko. (Gate 12:1-6; Pa Amotumo 23:5) Wa kina gure a, agu aKristano nadumbata kusayo anaamanga Tingidapa Kpio Yesu bara sa vuru garãyo, * na aDezire Yekova napekafuo gupai du mburuhe rogo Baibiri re.

 Gu kpiapai Yesu asigiraha nayugopa bara wai furani si aida i mangi Tingidapa Kpio Yesu, gini ramediwi na ti gini saa. Ko asigira gi mbakadapai re tingbafuo ti uru rogo Nisana 14, 33 F.B.K., ringbisihe kuti gu karendaria nga ga Baibiri nga Lunar. (Matayo 26:18-20, 26) Ani nandu kumbatayo kindi kaa manga Tingidapa Kpio Yesu ti gi ramediwi re na agarã dũ, ni peka ani fuo gu mangapai nangia ga agu aKristano naraki bakuru yo. *

 Wa vura duhe nga Nisana 14, 33 F.B.K. angia rago bisue, gu ramediwi nga ga manga pumbo gupai namangi, ima rengba ka ti ku rogo ai uru rogo poso yo rogo agarã ni basasa. Ani naino pa gu ramediwi Nisana 14 ati ku rogoho rogo agarã nibasasa ni manga ani pai ringbisihe kina kuti wai i anaageda ramediwi ti rago Yesu, kuba gu nga ga mangasunge na gu karendaria nga ga agu aYudo du ti gi gaani regbo re. *

 Pati gi vovo mbakadapai re, Yesu amangisunge na gu kpakuto adunga na agbooro rogo ya gbiati imekakue nga gu na nye tingbafuo Pumbo Susiri. (Matayo 26:26-28) Ni peka ani fuo gi kpiapai re, ani namangasunge na gu kpakuto adunga agbooro rogo ya watadu i amanganga kurahe kurogo ho ya gbiati gu zamba imekakue du ni kungboho zanga buda rogoho watadu ai guhe du ni nzinzirihe.

 Kura ariigbu pambori namangasunge na agu akpakuto du na agu ahe rogoho nafukosihe, ono agbooro watadu agu ahe nafukosi he i namangasunge na ni dedede rogo Baibiri si rukuba ingapai. (Ruka 12:1; 1 AKorindo 5:6-8; AGaratio 5:7-9) Sidu, kina gu kpakuto adunga agbooro rogo ya watadu i amanganga kurahe kurogo ho ya rengbe ka rẽ ka rukuba gu kpoto Yesu naandunga na ingapai ya. (1 Petero 2:22) Gu kura mangapai berewe Baibiri asongodanga ha ya nga ka mangasunge na gu kura nzinziri mbirimbiri ahe kuba imekakue. Gu kura akanisa namangaha wo mbiko gupai nga, i naka kuti gu gayo mangapai adunga mburuhe rogo Baibiri ya nga ka zahe ti mbirabuda.​—1 Timoteo 5:23.

 Gu kpakuto adunga agbooro rogo ya gbiati gu imekakue i amangasunge na ni ti regbo Tingida Pakpio Kristo narukuba kpoto Kristo na kureko. Anga iiriwopai ho namanga si ki satihe ku rogo ndikidi kpoto Yesu watadu ku rogo kureko wa gu kura aboro naaberãha te. Mo bingo agu agopai du rogo Baibiri nasarani ani rugutirani na gipai re wa gere.

•   Ka si adunga Yesu azinahe fu gako abawiriki nga i mbiri kureko, ka gure adu wa ko aape gupai fuyo nga i kuo gu ga Mbori andiko du tipa ri kure. (Bambata Pai 9:4; Amokedi 15:28, 29) Pai ho narengbe kadu wo te, mbiko Yesu aarengbanga ka fu rugapai fu kura aboro nga i kuo gu ga Mbori andiko du tipa bi kure ni ziaziaha te.​—Yoane 8:28, 29.

•   Amokedi aarengbanga ka mbira ndikidi kure Yesu bara ho ko adu ni kindi ni unga ko te. Kureko aaukanga kindi ti gu regbo re te.​—Matayo 26:28.

•   Ga Yesu motumo adu “bara sa ti yangara arago.” (AEbere 9:25, 26) Ono tie, ka si adu nga kpakuto na imekakue asatihe kurogo kpoto Yesu na kureko ti regbo Ga Gbia Riahe, si du tie, agu aboro naarihe ka gure adu wa i nafu kina gu motumo re a.

•   Yesu aya: ‘Oni ta manga gere nitingidi pa re,’ angianga “ni tumo tipa re ya.”​—1 AKorindo 11:24.

 Agu aboro idi kuti gupai nga kpakuto na imekakue asatihe ni ndikidi kpoto Yesu na kureko, namaa mburu gi gayo ayugopai re nibipa wai i asa kura fugo averesi. Ni kpiapai, rogo dungu sasa afugo Baibiri, I nagumba gupai yo tipa Yesu ho ko aafura ni tipa imekakue nga: “Gere nga kurere.” (Matayo 26:28) Ono tie, i ima rengba ka sa afugo Yesu a nga: “Gere narukuba kurere.” * Yesu amangisunge ane na fugo masaku a wa sinoko anidu dedede.​—Matayo 13:34, 35.

 Ho aDezire Yekova amanga pumbo Ga Gbia Riahe ni, kina bete rani gbua na ri kpakuto na ki mbiri imekakue. Tipagine du he ti ni wo?

 Gu kure Yesu nauka asigira “vovo ndika” nga gu nadi ba gu mozunga nadu dagba Mbori na aYisaraere. (AEbere 8:10-13) Agu aboro du rogo gu vovo mozunga re i du na ri kpakuto na kini mbiri imekakue pati Tingida Pakpio Yesu. Anga aKristano dunduko si akoda yo te ono kina “agu yo i ayambu yo” ngba kparakpara gene be Mbori. (AEbere 9:15; Ruka 22:20) I nga agu aboro nika zogarago na Yesu ngbangbaturũ yo na Baibiri naya aboro gbua 144,000 nagbia gi momu re.​—Ruka 22:28-30; Yugoti 5:9, 10; 14:1, 3.

 Kupati gu “umba rika aboro” nga aguyo i nayambu yo i zogorago na Kristo, dungu rani namaa bangirani kadu ni papara “bakere rimbasa aboro” nga aguyo nika gbia nyenye unga auru kpotosende ane. (Ruka 12:32; Yugoti 7:9, 10) Agu rani du na gu maabangirise nga ga raka auru kpotosende ane, ani aringa kpakuto na ki mbiri imekakue ti regbo Tingida Pakpio Yesu te, ani ninaandu ndu kupati ni yo tipa ka yugo gaani tambuahe tipa gu motumo Yesu afuhe tipa rani.​—1 Yoane 2:2.