Lo folleto ní chi byédielo ta rhónterhe bayochhi zaa lo Biblia, chi gokalén lí na yeni yelarheke kio len Jeobá. Na rhoon bayochhi tzeájteslo gzénilo yelarheke ní (1 Pedro 2:2). Chen sualho gago len Jeobá len ksédilo Xhtidze wápalo yelanabán tzalasa. Lo Biblia rne: «Kuenda gápake yelanabán tzalasa nakin tzeajkateze gonbeʼke Lí, toslo Dios li, len ki bene kselalo, Jesucristo» (Juan 17:3). Blaba Judas 21.

Tzalaka zeaj ryédielo masrhe ki Dios, yelarheajleʼ kio wákarhe tzotzo, len gonlo ta rheyolachhi Dios (Hebreos 11:1, 6). Yelarheajleʼ kierha rchhiga rhoʼ yilénerha ta chi benrha na yotzarha ka rhonrha. Lo Biblia rne: «Leyilenhe na leyebiʼ kuenda yixhi dolaxhkiá kielhe» (Hechos 3:19).

Naʼkala rheʼenelo kixhajeʼlho ki yebala bene ta chi byédielo. Nonho bi rdanhe ktzalaj rson chhiágazi len yezíkala bene. Weyédielo gónelho chhin Xhtidza Dios na ktzálajlo rson chhiágazi ta napeʼ ki ka bene lichhileyó. Blaba Romanos 10:13-15.

Nó len waka ktzalajlenlo. Waka sólholo len familia kio kan amigos kio. Lhézekan nakin ksluelho yelarheke len balaʼan. Bi rhala yékalone bi naka chhiʼa ka rheajleke, wenla btzalajlenke chhiadi rson chhiágazi napa Jeobá. Gzuá kuenda ta másterhe ryo ka bene ní naka ka rhonlo klega ka rtzálajlo. Lo Biblia rne: «Bene wenchhin ki Xhanrha bi nakin tile, sino gáke xhenlachhi len yogokaté» (2 Timoteo 2:24).

Tan ksédilo Xhtidza Dios wakalén lí sualho masrhe gago len Jeobá. Wechhin gákalo ka xhiʼin Dios. Jeobá rné: «Nedi xhchhinha gaka xhózilhe, na leʼn gákale xhi’inha» (2 Corintios 6:18).

Bi ksanlo ta rsédilo Xhtidza Dios (Hebreos 5:13, 14). Gnaba desédiekene lí len libro ¿Qué nos enseña la Biblia? Katí masrhe yédielo ki Jeobá masrhe yatzajyolaj sualho. Lo Biblia rne: «Yatzajyolaj naka ki bene kebi bata rzenague tan rheʼ ka bene malha leʼ [...]. Pero, ta rdánenhe masrhe naka tan zua lo ley ki Jeobá, na dza yelha rlabe le len rheyonte kuenda» (Salmo 1:1, 2). Blaba Salmo 73:27, 28.

Ki Jeobá, Dios yatzajyolaj, naka rson chhiágazi ta zaa lo Biblia. Wazékielo sualho gago len Leʼ chen rhedóbilo len bene yechhi kíe (Hebreos 10:24, 25). Chen lí rhueláchhiteslho rhonlo tan rheyolachhi Jeobá, wechhin «gápa[lo] yelanabán naka tabálaksi»: yelanabán tzalasa (1 Timoteo 6:19). Ta chhiaʼterhe ta waka gonlo naka tan sualho gago len Dios. Blaba 1 Timoteo 1:11.