Ca testigu stiʼ Jiobá de Gran Bretaña maʼ bizulú cucuicaʼ ti sucursal nacubi gaxha de Chelmsford, municipiu stiʼ Essex. Lugar sicarú riʼ nuu stale clase maniʼ ni cayapa Reino Unido casi ná ley de Vida Silvestre y del Campo ni biree lu iza 1981. ¿Xi cayuni ca testigu stiʼ Jiobá ra cucuicaʼ sucursal sticaʼ para gúnicaʼ ni ná ley nápacabe ne gápacaʼ ca maniʼ nuu raqué yaʼ?

Para cadi chuʼ ca lirón muscardino ca ra cayaca dxiiñaʼ que, ca testigu stiʼ Jiobá biquiiñecaʼ yaga ni biaanaʼ ra bíʼnicaʼ dxiiñaʼ para guzaʼcaʼ caadxi cajahuiiniʼ ra gúnicame nidu stícame. Laaca bitiidicabe puente luguiáʼ de carretera para tiidiʼ ca lirón riʼ, ti ganda checaʼ ra nuu ca yaga naroʼbaʼ ne ca yagahuiini’ ni caquiiñeca’ para cuézacaʼ. Ne laaca zinándacabe modo maca nexheʼ guni podárcabe yaga para cadi gacanapeʼ ca lirón riʼ. Cada ganda invierno runi podárcabe ca yagahuiini’ nuu raqué pur sección. Zacá rápacabe ra nabeza ca lirón ca ne qué riaadxaʼ ni gocaʼ.

Ca Testigu laaca rápaca’ caadxi maniʼ ni ruxubi ndaaniʼ ni nuu nezaqué, casi: beendaʼ de collar, lagartija vivípara ne lución (ti lagartija nahuiiniʼ ni qué gapa ñee ne náʼ). Biquiiñecabe caadxi teja para bíʼnicabe ra chuʼ ca maniʼ riʼ. Despué yenécabe laacame sti lugar zitu de ra cayaca dxiiñaʼ que. Raqué nuu caadxi cámara para gusigaandaʼ ra nuucame ne nuu reja para cadi guireecame. Gatigá riguuya ca Testigu ximodo nuu ca reja que ti cadi chuʼ ca maniʼ riʼ lugar ra cayúnicabe dxiiñaʼ, ra zándaca gacanácame.

Para cadi guchiiñacabe ca murciélagos vespertiliónidos ca huaxhinni la? huaquiiñeʼ ca Testigu lámpara LED para cadi guzaanipeʼ ra nuucame, ne guicaguí cani ora si tiidiʼ xiixa carru. Zacá riuucame ra nacahui. Cumu laacame ruyúbicame ni gócame lu ca yagahuiini’ nuu raqué la? zúnicabe stipa para cadi ugácabe stale de laacani. Laaca zudxiibarúcabe jma de chupa kilómetru arondaʼ de yagahuiini’. Neca bigácabe caadxi de laacani, laaca guluucabe cajahuiiniʼ para gúnicame nidu stícame ti gápacame ra gásicame.

Ca Testigu laaca cayúnicaʼ stipa pur gápacaʼ ca yaga nabé risaca ni runibiáʼcabe casi árboles veteranos. Maʼ stale iza de nabeza caadxi maniʼ ni qué gapa dxita ladi, murciélago ne ca maniʼ ni ripapa lu ca yaga riʼ. Ca dxi biʼniʼ ca Testigu dxiiñaʼ raqué qué nidíʼdicaʼ ra diidiʼ xcu ca yaga que. Zacá ne xcaadxi modo maʼ guninu ca, cusihuinni ca Testigu racaláʼdxicaʼ gápacaʼ ca maniʼ ni nuu Chelmsford.