Cadi xadxí de biluxe ca testigu stiʼ Jiobá ca dxiiñaʼ ni guca ra bisiroobacabe Hacienda sti’ Watchtower ni nuu Wallkill (Nueva York), bindaa ni xhoopa’ iza. Chupa iza ante guiluxe dxiiñaʼ riʼ jma nagueenda bí’nicabe ni, ngue runi gupa xidé biyubirúcabe yoo ra guiaana ca voluntariu ni gueeda guni dxiiñaʼ que. Bi’ni’ rentárcabe 25 yoo ni nuu gaxha de raqué.

¿Xi riníʼ ique ca dueñu stiʼ ca yoo que de ca testigu sti’ Jiobá ni yendeza ndaaniʼ cani yaʼ?

• Ti dueña que guníʼ: «Guizáʼ nayecheʼ nuudu né laacabe. Naa ne xheelaʼ nabézadu cueʼpeʼ yoo ra nabézacabe, racaneca’ laadu ne nacháʼhuicaʼ».

• Sti dueña ni laaca nabeza gaxha de ti yoo ni cuquixe que, bicaa sicaríʼ: «Galán ca experiencia gupanedu laacabe. Deche lídxidu nápadu ti guiiguhuiiniʼ ra zanda xhu’baʼ binni, ngue runi reeda ca joven que gatigá ora guni invitardu laacaʼ. Nabé riénecabe laadu ne nápacabe respetu laadu. Riuuláʼdxidu chúʼnedu laacabe juntu ne zabánadu guidúʼyadu laacabe ora maʼ canaguxooñecabe lu campu». Laabe guníʼrube: «Gástiruʼ sti experiencia jma galán que ndiʼ».

• Ti dueñu que guní’: «Guizáʼ galán biʼniʼ sentirdu guleza ca binni ca raríʼ purtiʼ cadi bedandezasícabe, sínuque gúcacabe vecinu».

¿Xi guníʼ ca dueñu stiʼ ca yoo que despué de maʼ zeʼ ca voluntariu que yaʼ?

• «Puntual laacabe para quíxecabe; guizáʼ guyuucabe cuidadu yoo ca ne galán nuu ni».

• Tobi de ca dueñu ni maca bizéʼtenu ante que gudxi ti Testigu: «Rudiee’ xquíxepeʼ lii ne guidubi organización Watchtower purtiʼ gúpatu lídxidu». Ne guníʼrube qué ñuu dxi niníʼ íquebe pabiáʼ «rusiá chaahuiʼ» ca Testigu.

• Ti gunaa bisiene: «Cumu nannaʼ qué ribaʼnaʼ organización stitu la? Qué ninábadu laacabe ñuni depositárcabe xiixa lu cuenta stidu. Dxi bidxiguétacabe laadu guiropaʼ lídxidu ni biʼniʼ rentardu laacabe galán nuu cani».

• Despué de biʼniʼ chaahuiʼ ca Testigu caadxi cosa lugar ra cayuni rentarcaʼ, gunabadiidxaʼ tobi de ca dueñu que sicaríʼ: «¿Ximodo guneʼ para guneʼ contratar ca trabajador stitu pue?». Ne laaca guníʼ: «Cada biaje gábicabe naa chigúnicabe xiixa dxiiñaʼ, qué zadiʼdiʼ diʼ dxi biaanadu que. Naa qué ridxela’ diaʼ tuuxa ni guni cumplir stiidxaʼ de lade ca binni ni reeda guni chaahuiʼ xiixa ra lidxeʼ».

• Ante guiluxe contratu de renta stiʼ ca yoo que, bicaa dueñu que ti carta para gabi ca testigu, pa gúnicaʼ sti contratu la? zandétebe lu renta que.

• Stobi de ca dueñu que guníʼ: «Ziuuláʼdxidu uquíxedu lídxidu organización Watchtower sti biaje pa caquiiñeʼ».