Rizácabe ndaaniʼ nisadóʼ ora riete ni para chiguni predicárcabe

XHÍDXINI LU

Nabeza biaʼ chonna gayuaa binni lu ca islahuiiniʼ ni láʼ Halligen, ni nuu lu nisadóʼ guiáʼ ni riaana gaxha de costa stiʼ estado Schleswig-Holstein (Alemania). ¿Ximodo runi ca Testigu para chigusiidicaʼ de Biblia racá yaʼ? (Mateo 24:14).

Riécabe lu barcu para chindácabe lu ca islahuiiniʼ riʼ. Peru para ganda guidxélacabe xcaadxi binni ni nabeza lu xcaadxi isla, riquiiñeʼ caadxi Testigu ti método gadxé: rizacaʼ biaʼ gaayuʼ kilómetru ndaaniʼ nisadóʼ ora riete ni. ¿Ximodo rúnicabe ni yaʼ?

Runi aprovechárcabe ora raca marea lu nisadóʼ

Racané ca marea stiʼ nisadóʼ laacabe. Cada xhoopaʼ hora, riguiʼbaʼ nisadóʼ guiáʼ ca o riete ni biaʼ chonna metru neza riaana Hallingen. Ora riete marea ca rihuinni xiroobaʼ layú sti nisadóʼ, óraca nga randa rindá ca Testigu a pie ra nuu chonna de ca islahuiiniʼ riʼ.

¿Ximodo rúnicabe viaje riʼ yaʼ? Ulrich, ti guía ni maʼ napa experiencia ni riné grupu que guníʼ: «Rindaʼdu biaʼ chupa hora para chindadu lu tobi de ca islahuiiniʼ sti Halligen. Stale biaje riuudu xie ñeʼdu. Zacá nga jma galán saʼ binni ndaaniʼ nisadóʼ. Peru ora nananda, rucáʼñeedu bota».

Cani ridúʼyadu nezaqué maʼ gadxé cani de ni maʼ biaʼdu guidúʼyadu. Ulrich guníʼ: «Ruluiʼpeʼ canazaluʼ lú sti planeta. Nuu ra napa layú que beñe, ra nuu guié ne nuu xcaadxi lugar ra daapa guixihuiiniʼ stiʼ nisadóʼ. Zanda guʼyuʼ pájaru ni ripapa lu nisadóʼ, cangreju ne xcaadxi maniʼ». Nuu tiru naquiiñeʼ tiidiʼ grupu que lu nezahuiiniʼ ra cuxooñeʼ nisa, ni riénecabe lu diidxaʼ Alemán casi Priele, ni reeda de lu ca charcu nisa que.

Laaca riuu guendanagana ora raca ca viaje riʼ. Ulrich bisiene: «Fácil guiniti binni, jmaruʼ si ora nuu gupa, nga runi guiráʼ biaje rizánedu ti brújula ne ti dispositivu GPS. Laaca nexheʼ ti horariu chinándadu para cadi guinaazeʼ marea que laadu».

Cayuni predicar chupa Testigu lu ti islahuiiniʼ stiʼ Hallingen.

¿Ñee ribeendúcabe xiixa né stipa naroʼbaʼ rúnicabe ca la? Ulrich guníʼ xi bizaaca ti hombre ni napa jma de 90 iza ne nabé ruundaʼ revista Torre stiʼ ni rapa ne ¡Despertad!: «Ti dxi, qué nigánnadu laabe purtiʼ huaxiéʼ tiempu nápadu. Peru ante chibiʼduʼ yeugaanda hombre que laadu né bicicleta stiʼ ne gudxi laadu: “¿Qué zudiitu naa revista Torre stiʼ ni rapa la?” Né stale guendanayecheʼ bidiʼdu ni laabe».