Lu beeu junio 2013 bilaahua Europa central purtiʼ biaba dxacha nisaguié. Casi guidubi ra rugaanda guiiguʼ Danubio ni ridiʼdiʼ Hungría bidxá tipa ne qué huayuu dxi guidxá ni biaʼ que.

Pur ni bizaaca riʼ, gunabaʼ Ministerio de Recursos Humanos stiʼ guidxi que sucursal stiʼ ca testigu stiʼ Jiobá de Hungría para gacanecaʼ gaca caadxi cosa ni maʼ gudixhe gobiernu ti cadi guilaahua binni. Xi biʼniʼ sucursal que yaʼ. Biʼniʼ invitar guiráʼ congregación stiʼ ca Testigu ni nuu biaʼ ra ridiʼdiʼ guiiguʼ Danubio, chigacanecaʼ gaca ni maʼ gudixhe ca xaíque guidxi que.

Nabé bidxagayaa binni modo gucané ca congregación que. Ca dxi gudiʼdiʼ que, jma de 900 Testigu de 72 congregación yegacanecaʼ para cadi guiree guiiguʼ. Gunábacabe laacaʼ chinecaʼ ti tarjeta ra cá lacaʼ, xquídxicaʼ ne ca diidxaʼ Testigu stiʼ Jiobá.

Ndaaniʼ tobi de ca guidxi que, biseendaʼ ti representante stiʼ Cruz Roja de Hungría ti guiʼchiʼ ra nuu tobi de ca congregación que ne na: «Rudiʼdu xquíxepeʼ laatu ne runi respetardu laatu. Cadi guiráʼ diʼ dxi ridúʼyadu binni casi laatu ni nuu tobi si ne ni riuulaʼdxiʼ gacané. Nánnadu zitu de ra beeda stale de laatu. Riuuladxeʼ gabeʼ binni xquidxeʼ nácatu ti ejemplu para laadu».

Laaca biseendaʼ presidente stiʼ ti organización ni racané binni gucaná lu xiixa desastre natural ti carta ra nuu sucursal, laaca nuube lu Parlamentu stiʼ Hungría, luni cudiibe xquíxepeʼ ca Testigu saca gucanecaʼ laacabe.