Lu beeu diciembre 2012, biʼniʼ ca testigu stiʼ Jiobá de Tailandia ti campaña nabé risaca para gacanecaʼ ca xcuidi cueenducaʼ ni galán ra scuela. Gande Testigu guyecaʼ ndaaniʼ ca scuela stiʼ Bangkok, bidagulisaanecaʼ ca director stícani ne bidiicaʼ ca maestru ne ca baʼduscuela revista ¡Despertad! stiʼ octubre 2012 ni láʼ «Cómo aprovechar al máximo la escuela».

Guleendúcabe ni galán pur campaña riʼ, ngue runi despué maʼ bíʼnicabe ni guidubi guidxi Tailandia. Lu ti iza arondaʼ yeganna ca Testigu 830 scuela. Nabé guyuulaʼdxiʼ ca maestru ne ca baʼduscuela revista riʼ dede gupa xidé guca imprimir ni xhonna biaje purtiʼ nabé gunabaʼ binni ni. Biʼniʼ imprimírcabe 30,000 revista primé biaje, peru cumu guizáʼ guyuulaʼdxiʼ binni ni la? gupa xidé bíʼnicabe xcaadxi dede gudiizicabe jma de 650,000 revista.

Oraqueca bidii ca director ne ca maestru que cuenta pabiáʼ risaca guiráʼ ni cusiene revista ¡Despertad! Ngue runi, sicaríʼ guníʼ ti maestra: «Revista riʼ zacané ni ca baʼduscuela chúʼnecaʼ bixhózecaʼ ne jñaacaʼ tobi si ne gúnicaʼ stipa ugaandacaʼ ni gacaláʼdxicaʼ lu xquendanabánicaʼ». Chupa chonna de ca scuela riʼ biquiiñecaʼ ni zeeda lu revista riʼ ora maʼ cudiicaʼ clase, ne xcaadxi scuela biquiiñeʼ ni para guiziidiʼ ca xcuidi guʼndaʼ chaahuicaʼ. Ndaaniʼ tobi de ca scuela riʼ, gunábacabe ca estudiante iquiiñecaʼ ni zeeda lu revista riʼ para gúnicaʼ ti tariá, ne cani jma galán biʼniʼ ni la? gucuaacaʼ premiu.

Ti baʼdudxaapaʼ rié scuela bidii xquíxepeʼ saca guleecabe tema «Cómo ganarle la batalla a la obesidad infantil y juvenil», ni zeeda lu revista ca. Bisiene baʼdudxaapaʼ riʼ maʼ ti guendahuará nga ora nabé riroo binni ne nabé nagana raca para ca xhamigu guiníʼ de tema riʼ. Ne guníʼrube: «Xquíxepeʼ laatu purtiʼ nayaʼniʼ modo rudiitu conseju ne cadi nagana para gúnidu cani».

Cani napa xiiñiʼ nabé bidiicaʼ xquíxepeʼ saca biree revista riʼ. Ti gunaa gudxi chupa gunaa Testigu ni yeganna laa ra lidxi ximodo gucané ca conseju zeeda lu revista riʼ xiiñidxaapaʼ cueendú ni galán ra scuela.

Pichai Petratyotin, ti hombre ni riníʼ pur ca testigu stiʼ Jiobá ni nuu Tailandia guníʼ: «Revista ¡Despertad! rusihuinni pabiáʼ risaca guiráʼ cani zeeda lu Biblia neca maʼ xadxí gucuá cani. Laadu, ca testigu stiʼ Jiobá, nánnadu nabé risaca guiziidiʼ binni, nga runi nayecheʼ nuudu quíʼzidu revista riʼ sin ti de gaayuʼ.