Revista Biblical Archaeology Review bizeeteʼ zanda guni crenu dxandíʼ bibani biaʼ 50 binni ni ruzeeteʼ Antiguo Testamento pur cani huadxela ca arqueólogo. Lade cani zeeda lá 14 rey biʼniʼ mandar Israel ne Judá, cani jma runibiáʼ binni nga David ne Ezequías, ne zeeda lá xcaadxi ni huaxiéʼ runibiáʼ binni, casi Menahem ne Péqah. Lu lista que laaca zeeda lá 5 Faraón ne lá 19 rey stiʼ Asiria, Babilonia, Moab, Persia ne Siria. Laaca ruzeeteni de ti escriba, ne chupa xaíque stiʼ ca sacerdote ne xcaadxi binni risaca.

Bizeeteʼ revista que guníʼ stale erudito dxandíʼ guyuu 50 binni ni bidxélacabe lá que. Peru laaca huadxela ca arqueólogo xcaadxi cosa ni rusihuinni dxandíʼ bibani xcaadxi binni ruzeeteʼ Nuevo Testamento, casi Herodes, Poncio Pilatu, Tiberio, Caifás ne Sergio Paulo.

Tiempu riʼ maʼ qué rihuinni lión lu ca layú ruzeeteʼ Biblia. Peru ruzeeteʼ Biblia de laame biaʼ 150 biaje, racá ridúʼyanu binibiáʼ ca binni bicaa Biblia maniʼ duxhuʼ riʼ. Stale biaje la? gadxé nga ni cusiene Biblia ora maʼ caníʼ de laame, peru laaca nuu biaje ruzeeteni de lión ni nabani. Ora guzéʼtenu de Sansón, David ne Benaya la? naquiiñeʼ gánnanu dxandíʼ biiticabe lión (Jueces 14:5, 6; 1 Samuel 17:34, 35; 2 Samuel 23:20). Xcaadxi la? biiti lión laacaʼ (1 Reyes 13:24; 2 Reyes 17:25).

Dxiqué nabé guyuu ti clase lión de Asia (Panthera leo persica) dede Grecia ne Asia Menor hasta Palestina, Siria, Mesopotamia ne noroeste stiʼ India. Nabé bidxibi binni laame ne biʼniʼ adorarcaʼ laame, laaca bihuinni dibuju stime lu ca obra de arte ni guyuu Oriente Próximo. Lu Vía Procesional stiʼ Babilonia que guyuu ti franja naroʼbaʼ de ladríu napa esmalte ra cá dibuju stiʼ caadxi lión.

Ruzeeteʼ binni guyuu soldadu ni gunaazeʼ lión guidxi Palestina ra ziluxe siglu 12. Nga runi maʼ qué ñuuruʼ lión lugar riʼ gudiʼdiʼ si ti tiempu despué de 1300. Peru guyuuruʼ lión Mesopotamia ne Siria lu siglu 19, ne laaca guyuuruʼ ca maniʼ riʼ Irán ne Irak ra bizulú siglu 20.