XI REEDA ndaaniʼ íqueluʼ ora gunadiágaluʼ de ti lugar ra risaʼbiʼ binni guixi. Cadi dxandíʼ niníʼ íqueluʼ ti lugar ra candáʼ yuudxuʼ la? Ne zándaca qué lica niníʼ íqueluʼ pa ñuu dxi nidxela binni ti tesoro risaca raqué.

Ngapeʼ nga ni guca raca ti gayuaa iza: bidxélacabe ti tesoro lade guixi. Dxandíʼ qué nidxeladícabe oro ne guié sicarú, peru bidxélacabe ti tesoro nabé risaca. Xipeʼ nga bidxélacabe yaʼ. Xiñee risaca gánnanu de laani.

Guca ni chiguzéʼtenu riʼ ra ziluxe siglu 19, dxi guyé profesor Bernard Grenfell ne Arthur Hunt guidxi Egipto, laacabe rúnicabe dxiiñaʼ ndaaniʼ Universidad stiʼ Oxford. Bidxélacabe stale pedasu papiro ti lugar ra risaʼbiʼ binni guixi ni nuu gaxha de valle stiʼ guiiguʼ Nilo. Gudiʼdiʼ si dxi, lu iza 1920, dxi cayuni registrárcabe cani bidxélacabe, gucuaa Bernard Grenfell xcaadxi pedasu papiro ni bidxela Egipto para chuʼ ndaaniʼ Biblioteca Universitaria John Rylands (Mánchester, Inglaterra). Peru guti guiropaʼ profesor riʼ ante guni registrarcaʼ guiráʼ ni bidxélacaʼ.

Maʼ Colin Roberts, sti profesor ni runi dxiiñaʼ ndaaniʼ Universidad stiʼ Oxford nga binduuxeʼ xhiiñacabe. Laga caguixhe chaahuibe ca pedasu papiro que, biiyabe ti ndaa de 9 pur 6 centímetru. Guyuuláʼdxibe ni bíʼndabe luni, purtiʼ ruluíʼ maca nánnabe xidé caniʼni. Ti ladu stini cá caadxi diidxaʼ stiʼ versículo 31 dede 33 stiʼ capítulo 18 ni zeeda lu Evangeliu stiʼ Juan, ne sti ladu que zeeda xcaadxi diidxaʼ stiʼ versículo 37 ne 38 stiʼ capítulo que. Óraque nga bidii profesor Roberts cuenta bidxela ti tesoro nabé risaca.

Para Colin Roberts la? guizáʼ maʼ nayooxhoʼ pedasuhuiiniʼ papiro que. Peru, xi ízapeʼ gucuá ni yaʼ. Bíʼnibe ti estudiu de paleografía para gánnabe ni. * Bichaagabe ca fragmentu riʼ né xcaadxi manuscritu ni maca napa fecha para gúʼyabe panda iza napa cani. Peru rápabe gana ganna chaahuibe pa dxandíʼ ni. Ngue runi, guleebe foto ca fragmentu que ne biseendabe cani ra nuu chonna papirólogo para gúʼyacaʼ panda iza napa cani. Xi bidxela ca hombre que yaʼ.

Biiyaʼ si guionnaʼ expertu que ximodo gucuá ca diidxaʼ que ne ca renglón stini, guniʼcaʼ zándaca biluxe bicaa binni cani lu iza 125 despué de ca dxi stiʼ Jesús; chupa si década de guti apóstol Juan. Peru laaca nuu ora ruchee estudiu stiʼ paleografía, nga runi riníʼ xcaadxi expertu zándaca gucuá cani lu intiica iza stiʼ guiropa siglu. Ndiʼ nga pedasu papiro ni jma nayooxhoʼ stiʼ Nuevo Testamento, o Escrituras Griegas, ni nuu ne qué huadxela diʼ nin stobi.

Xiñee risaca papiro riʼ para ca binni riuulaʼdxiʼ guʼndaʼ Biblia tiempu riʼ yaʼ. Nuu chupa razón. Primé, formatu stiʼ fragmentu riʼ rusihuinni  pabiáʼ bisisaca ca primé xpinni Cristu Stiidxaʼ Dios.

Gupa ca textu riʼ chupa formatu lu primé siglu: rollo ne códice. Para gaca ti rollo la? riguíbacabe o ruquiidicabe stale pedasu papiro o pergaminu ne rúnicabe ti tira ziuulaʼ, randa ridopa ti ladu rollo riʼ o sti ladu ni ora cuyúbicabe xiixa. Jma nga puru ti ladu si gucuá letra lu ca rollo que.

Peru fragmentu bidxela profesor Roberts que la? nápani letra guiropaʼ ladu. Nga runi zanda guininu biree ni lu ti códice, cadi lu ti rollo. Ti códice la? ridiibaʼ ne rieechuʼ ca yaza stiʼ casi ti libru, peru qué raca diʼ nga né ti rollo.

Xiñee jma galán códice riʼ que ti rollo yaʼ. Cumu nabé biquiiñeʼ ca primé xpinni Cristu Biblia para gucheechecaʼ stiidxaʼ Dios ra lidxi binni, luguiaa, ndaaniʼ calle ne ra tiica nuu binni la? ngue runi jma galán gápacabe Stiidxaʼ Dios lu ti códice (Mateo 24:14; 28:19, 20; Hechos 5:42; 17:17; 20:20).

Né formatu cubi riʼ jma nagueenda raca copia stiʼ Biblia para iquiiñeʼ tuuxa o para ti neza binni ridagulisaa. Ngue runi guca stale copia stiʼ ca Evangeliu que, ne gucané dxiiñaʼ riʼ para bidale binni ni guca xpinni Cristu.

Guiropa razón pur risaca fragmentu stiʼ Rylands riʼ para ca xpinni Cristu tiempu riʼ nga purtiʼ rusihuínnini caʼruʼ guidxaa diʼ ni zeeda lu Biblia. Chupa diidxaʼ si de ni bicaa Juan lu Evangeliu stiʼ nga zeeda luni, peru laaca laani nga zeedani lu ca Biblia nuu tiempu riʼ. Rusihuinni fragmentu riʼ caʼruʼ guchaa diʼ ni zeeda lu Biblia, neca guca stale copia stini lu guiráʼ siglu maʼ gudiʼdiʼ.

Papiro riʼ nga tobi de ca mil fragmentu ne manuscritu ni rusihuinni caʼruʼ guidxaa diʼ ni zeeda lu Biblia. Guidúʼyanu xi bisiene historiador Werner Keller, lu libru Y la Biblia tenía razón: «Ca manuscritu yooxhoʼ riʼ rusihuínnicani qué nidxaa diʼ gastiʼ lu Biblia, neca nuu binni riníʼ ique bidxaa xiixa luni ora guca copia stini».

Dxandíʼ cadi caquiiñeʼ diʼ guʼyaʼ cani dxandíʼ xpinni Cristu ni ridxela ca arqueólogo para gaca fe sticaʼ naguidxi, purtiʼ maca nánnacaʼ «Espíritu Santu uníʼ xi icá» lu Stiidxaʼ Dios (2 Timoteo 3:16). Peru, tesoro yooxhoʼ casi ni bidxela riʼ, rusihuínnini dxandíʼ ni guníʼ Biblia maʼ raca stale siglu: «Stiidxa [Jiobá] qué ziuu dxi initilú» (1 Pedro 1:25).