GUIRANU huadúʼyanu ora guidxiichi tuuxa, dede ne laanu huadxiichinu stale biaje. Nécapeʼ rábinu cadi naquiiñeʼ guidxiichi binni purtiʼ zuninani laa, peru ora laanu nga cadxiichinu la? rábinu gastiʼ naca, jmaruʼ si pa bíʼnicabe laanu xiixa cadi jneza. Ti artículo stiʼ Asociación Americana de Psicología na: «Gastiʼ naca guidxiichi binni ne racaneni para chuʼ binni nazaaca».

Pa guchaaganu ca diidxaʼ ca né cani guníʼ Pablu ruluíʼ dxandíʼ cani. Laabe guniʼbe nuu biaje ridxiichinu, ngue runi bidiibe conseju riʼ: «Ne pa idxiichi tu la? cadi udii tu lugar guiaazi gubidxa cadxiichi ru tu, sínuque lauyubi tidi ni nagueenda. Pacaa zuchee tu» (Efesios 4:26). Pur cani maʼ bizéʼtenu riʼ, zanda guininu cadi malu nga guidxiichi xhaataʼ binni la? O naquiiñeʼ gucueezanu laca lanu.

Ora bidii Pablu conseju riʼ, zándaca caníʼ íque ni zeeda lu Salmo 4:4 ra na: «Lagaca diti, peru cadi gucheetu». Ñee cayábibe ca xpinni Cristu que zanda guidxiichicaʼ la? Coʼ, cadi nga diʼ nga ni caniʼbe. Ximodo nánnanu ni yaʼ. Nánnanu ni pur ca diidxaʼ ni guniʼbe riʼ: «Lausaana de aca nanalaʼdxi tu binni, ne de idxiichi né tu laacaʼ, ne de chuʼ tu xiana, ne de guni char tu tuuxa o cuʼ dí tu laa. Lausaana de uyubi tu izaaca stobi xiixa» (Efesios 4:31). Ne casi na ti artículo stiʼ Asociación Americana de Psicología maʼ huahuinni ora guidxiichi xhaataʼ tuuxa dede guniná sti binni qué racaneni gaca chaahuiʼ guendanagana stiʼ, laga jmaruʼ si riroobani.

Xi zanda gúninu para cadi guidxiichinu nagueenda ne cadi gápanu guendanagana yaʼ. Sicaríʼ bicabi Salomón, ti rey nuu xpiaaniʼ guyuu guidxi Israel: «Ti hombre ni riene qué ridxiichi nagueenda, ne galán gúnibe pa gusiaandabe ni gucheenécabe laabe» (Proverbios 19:11). Zacapeʼ nga laani, guendariene ca racaneni para cadi gápanu xiana ndaaniʼ ladxidoʼno. Ximodo nga yaʼ.

Ti binni ni riene la? riníʼ ique ante guni xiixa. Pa gúninu sicaríʼ, zanda gacaneni laanu ora chuʼ xiixa guchiichi laanu o tuuxa gucaalú laanu.

Casi ora guidúʼyanu gacaʼ xiixa ni cadi jneza zanda guchiichini laanu. Pa gudiʼnu lugar guni ganar xiana ca laanu ne gucáʼlunu tuuxa la? zanda gacananu o guninanu sti binni. Cásica runitilú gui ti yoo la? zacaca zanda gunitilú guendaridxiichi ca modo runibiáʼ binni laanu pa qué gucueezanu laca laanu, ne maʼ qué zaná binni guidxaaga laanu ne laaca maʼ qué zanda chuʼnu galán né Dios. Nga runi, pa gudiinu cuenta qué ganda gucueezanu laanu la? naquiiñeʼ cuezadxinu ne guiníʼ íquenu. Pa guidúʼyanu xipeʼ nga cuchiichi laanu la? nga zacané gucueezanu laca laanu.

Rey David, bixhoze Salomón, bilá ñuutibe ti hombre láʼ Nabal. Qué ñúnibe ni purtiʼ gucané tuuxa laabe gudiibe cuenta cadi jneza diʼ ngue ni cá íquebe gúnibe. Guidúʼyanu xi bizaaca. Dxi guyuu David né ca hombre stiʼ lu desiertu stiʼ Judea, gupacabe ca dendxuʼ stiʼ Nabal. Dxi cugá ca xpinni Nabal guicha ladi ca dendxuʼ que, gúnabaʼ David laabe gudiibe ni gocaʼ. Peru Nabal bicabi laabe qué zanda diʼ gudii guendaró ni chitó ca mozo stiʼ ca binni ni qué runibiáʼ. ¡Aque feu ngue ni biʼniʼ Nabal laabe! Ngue runi, gucuaa David tapa guyuaa hombre stiʼ ne yeyúbicaʼ laabe para guuticaʼ laabe ne ca hombre stibe (1 Samuel 25:4-13).

Peru gunna Abigail, xheelaʼ Nabal ni bizaaca que ne biree yechagalú David. Ora bíʼyabe David bizuxibibe xañee ne gúdxibe laa ca diidxaʼ riʼ: «Guleza guiníʼ esclava stiluʼ ra diágaluʼ, ne bicaadiaga ca diidxaʼ stiʼ esclava stiluʼ». Gunabaʼ Abigail David gutiidilaʼdxiʼ guendahuati biʼniʼ xheelaʼ ne gúdxibe laa zaca arrepentir pa guquixe ni Nabal (1 Samuel 25:24-31).

Gucané Abigail David gudii cuenta xii ngue cá ique guni ne zaqué gunda bicueeza laca laa. Xi bidii David cuenta yaʼ. Primé la? bidiibe cuenta zaquepeʼ xpiaʼ Nabal né guiráʼ binni. Ne guiropa la? bidiibe cuenta ti guendahuati ngue ni cá íquebe gúnibe que. Pa chuʼ dxi guidxiichiluʼ casi bidxiichi David. Xi zanda gúniluʼ yaʼ. Ti artículo stiʼ Clínica Mayo ni rusiene ximodo zanda gucueeza binni laca laa ora cadxiichi na: «Gulezadxí ti ratu, gucuaa bi ne bigabaʼ de lu chii». Zacapeʼ nga laani, biiyaʼ xii nga cuchiichi lii ne guníʼ ique xi zazaaca pa gúniluʼ ni cá íqueluʼ gúniluʼ. Pa nácaluʼ ti binni ni riene la? qué zadxiichiluʼ nagueenda ne zucueezuʼ laca lii (1 Samuel 25:32-35).

Ca dxi stinu riʼ, stale tu huayacanécabe laa cásica gucanécabe David. Casi Sebastian, biziidiʼ gucueeza laca laa ra biindanécabe laa Biblia dxi deguyoo ndaaniʼ guidxi Polonia dxi napa 23 iza, laabe guniʼbe: «Primeru ruuyaʼ xi cuchiichi naa, oracaruʼ runeʼ pur chinandaʼ ca conseju zeeda lu Biblia. Gástiruʼ sti cosa ni zanda gacané laanu».

Laaca ngaca biziidiʼ Setsuo. Laa guníʼ: «Rietenalaʼdxeʼ dxiqué nabé rucaaʼ ridxi cani runeniáʼ dxiiñaʼ ora maʼ cuchiichicaʼ naa. Peru yanna ra maʼ nannaʼ xi rusiidiʼ Biblia, ni runeʼ ante gucaaʼ ridxi laacabe nga, rinabadiidxaʼ laca naa: “Tupeʼ nga napa donda pue. Ñee cadi naa nga napaʼ donda la?”». Ora guiníʼ íquebe zacá racaneni laabe gucueezabe laca laabe ne cadi guni ganar xiana laabe.

Nuu biaje ruluíʼ qué zanda gucueezanu xiana stinu, peru ca conseju ni rudii Biblia zanda gacané laanu. Pa gúniluʼ cani ne guinábaluʼ Dios gacané lii la? zácaluʼ ti binni ni riene ne qué zadxiichiluʼ nagueenda.